Jope 4 - Vakavakadewa Vou kei na iVola tale eso

Vosa o Elifasi: E Caka Cala o Jope

¹ Sa qai vosa o Elifasi na kai Temani, ka kaya,

² I Jope, o na rarawa beka ke'u vosa? Sa dredre sara vei au me'u vagagalu toka ga.

³ O iko o a vakavulici ira e lewe vuqa na tamata, Ka vakaukauwataki ira era liga malumalumu sara.

⁴ Ni tarabe e dua ni a malumalumu ka oca, Ena tucake ga o koya ena veivakaukauwataki ni nomu vosa.

⁵ Ia oqo ni yaco mai na nomu gauna ni rarawa, O sa qai kidacalataka ka dredre ni qarava.

⁶ O a dau qarava na Kalou bula, Ka sa dodonu ka savasava na nomu bula; Sa dodonu ga kina mo vakanuinui tiko ka vakabauta.

⁷ Bau vakanananu lesu tale mada; Mo tukuna mada e dua na i vakaraitaki Sa sotava kina na rarawa levu e dua na tamata dodonu.

⁸ Au sa bau raica oti talega, Na tamata era bucina ka tea na ka ca; Ni ra na tamusuka dina talega.

⁹ Na cudru kaukauwa ni Kalou, E sa vaka e dua na cagilaba, Ena vakarusai ira kece sara.

¹⁰ Era sa dau vosavosa na tamata ca Me vaka na tagi ni laione rerevaki; Ia sa vagalui ira ga na Kalou, Ka vorolaka kece na batidra.

¹¹ Ia me vaka na laione era sa leqa, Ni sa sega na ka era toboka me kedra; Era a qai dui mate yani, Ia na luvedra era a qai veiseseyaki.

¹² A sa basika lo mai vei au e dua na i tukutuku, Sa lako lo mai ka dredre sara me'u rogoca rawa.

¹³ E a vakarerei au sara ga Ka vakavuna me'u moce vakaca.

¹⁴ Na kaukauwa ni noqu rere kei na kena vakasauri, A yavalati au sara ga ka'u sautaninini.

¹⁵ E dua na cagi mudre malua sa liwava na mataqu; Ka la'ki se sara kina na votoqu.

¹⁶ Au a qai wadrava matua yani ni sa tu e kea, Ia na kena i rairai ga, au sega ni kila. Au sa qai rogoca e dua na domo e loma ni vakadigagalu.

¹⁷ Sa rawa li vua na tamata me dodonu sara ena mata ni Kalou? Se savasava sara e matana na Dauveibuli?

¹⁸ Na Kalou sa sega ni vakanuinui vei ira na nona i talai vakalomalagi; Sa raica talega na cala e kedra maliwa na nona agilosi.

¹⁹ Ia a qai wacava sara mada na nona sega ni vakadinati na tamata; Na tamata ka dau tiko ga ena vale qele, Ni o koya e a buli ga mai na kuvu ni qele; Ka rawa ni qiliraki ga ka ciba me vaka e dua na manumanu ni cina?

²⁰ Ena mataka, sa na rawa ni bula tiko e dua na tamata; Ia ena yakavi, sa na rawa ni ciba yani, ka guilecavi.

²¹ Sa qai kau tani na nona veika kecega; Sa mate o koya, ia na yalomatua sa sega ga vua.’