Jope 39 - Vakavakadewa Vou kei na iVola tale eso

¹ O kila beka na gauna era sucu kina na me ni veiulunivanua? O sa bau sarava oti beka ni ra vakasucu na dia ni veikau?

² O wilika tiko beka na nodra vula ni bukete, Ka kila na gauna era na sucu mai kina na luvedra?

³ O kila beka na gauna era koto sobu kina Ka vakasucuma na luvedra ki vuravura?

⁴ Era sa qai tubu ka kaukauwa cake mai na luvedra Ena loma ni veikau loa. E ra sa qai dui lako ka ra sega ni lesu tale.

⁵ O cei beka sa solia vei ira na asa ni veikau na nodra galala? O cei beka sa sereki ira ka vakalaivi ira Me ra veilakoyaki vakaveitalia?

⁶ Au a solia vei ira me nodra koro na vanua talasiga, Ka vakalaivi ira me ra dau tiko ena veibuca ni masima.

⁷ Era vakatikitiki tani mai na mamauwe ni veikoro Ka sega ni dua e vakamanoataki ira rawa me ra cakacaka.

⁸ A nodra i kanakana na vanua veiulunivanua, Na vanua era vakasaqara kina na ka drokadroka kecega me ra kania.

⁹ Ena rawa beka vua e dua na bulumakau kila me cakacaka vei iko? Ena vakadonuya beka o koya me mai moce ena bogi Ena nomu bai ni vakamoce manumanu?

¹⁰ E rawa beka ni o tuya e dua ena dua na dali Ka kauta me la'ki siviyara? Se mo vakacakacakataka me rekitaka na nomu veiwere?

¹¹ E rawa beka mo vakararavi ki na nona kaukauwa levu Ka nuitaki koya me cakava na nomu cakacaka bibi?

¹² O nuitaki koya beka me la'ki kauta Mai na nomu i teitei na veika sa tamusuki oti, Ka la'ki kauta mai na vua ni nomu raisi Mai na vanua ni samuraki raisi?

¹³ Sa dua tani dina na totolo ni vakacakurobaroba ni taba ni ositeriji! Ia e sega na ositeriji e bau vuka rawa me vaka na belo.

¹⁴ E dau biuta tu ga na nona yaloka ena dela ni qele na tina ni ositeriji Me ra qai vakatakatataki ga ena katakata mai na qele.

¹⁵ E sega ni bau kila na tina ni ositeriji ni na rawa ni ra butu voroki na yaloka Se ni na dua na manumanu kila me na vorolaki ira.

¹⁶ Na i vakarau ni tina ni ositeriji e vaka ni ra sega ni nona na yaloka, Ka sega ni bau kauwai ni sa maumau wale na nona sasaga.

¹⁷ Oi au sara ga au a vakalialia na ositeriji Ka'u sega ni solia vua na yalomatua.

¹⁸ Ia, ni tekivu ga me cici e dua na ositeriji, Sega, na ose kei koya ka vodoka toka, Ena dredrevaki rau ruarua ga o koya!

¹⁹ O iko beka, Jope, o a cakava me ra rui kaukauwa sara na ose, Ka solia vei ira na nodra tobe babalavu?

²⁰ O a vakavuna beka me ra dau lade na ose Me vakataki ira na vodre Ka ra vakarerei ira na tamata ena nodra surusuru?

²¹ Era qeuraka na qele ena qakilo; Ka ra vakusakusa ki na i valu ena nodra kaukauwa taucoko.

²² Era sega ni kila na rere, Ka sega na i seleiwau me na vakalesui ira rawa.

²³ E tatamelamela ka tatatibitibi Na nodra i yaragi na sotia dauvodo ose ni sa cilava na siga.

²⁴ Ia ni ra sautaninini tu na ose ni ra sa via vala, Era sa qai sorova yani ki liu na cici; Era sa sega ni tu vakadua rawa ni sa tagi mai na davui.

²⁵ Era suru na ose ena tagi yadua mai ni davui; Ka ra boica rawa na vala ni ra sa bera ni volekata yani, Ka ra rogoci ira na turaganivalu ni ra kacivaki i vakaro vakaivalu.

²⁶ E a mai vuli vuka beka vei iko e dua na manulevu Ni sa tevuraka na tabana vaka ki na ceva?

²⁷ E waraka beka na ikeli mo vakaroti koya Me la'ki caka nona sova sara ki cake ena veiulunivanua?

²⁸ E vakavale tiko na ikeli ena veivatu e cake sara Ka nona i tikotiko ni valu na veiulunivanua gagata.

²⁹ Mai kea, sa qai la'ki vakaraica toka mai kina Na ka me vakamatea me kania.

³⁰ Era sosova vata na ikeli na ka sa vakamatei, Ka ra gunuva na luvedra na kena dra.