Jope 38 - Vakavakadewa Vou kei na iVola tale eso

Sauma na Kalou na Vosa i Jope

¹ Ia, mai na loma ni cagilaba, a qai vosa mai kina o Jiova vei Jope:

² O cei o iko mo taroga na noqu vuku Mai na nomu vosa ni lecaika?

³ Ena gauna oqo, mo tu vakatagane; Ka sauma mai na veitaro au na taroga yani.

⁴ O a sa bula tiko li ena gauna au a bulia kina na vuravura? Kevaka o kila tu e levu na ka, Ia mo tukuna sara mai vei au.

⁵ O cei beka sa lewa se me vakacava na kena levu? O cei e a dodoka e delana na wa ni vakarau? Na ka kece oqo o kila tu o iko, se vaka e vei?

⁶ Na cava e vakaduri ira tu na duru Ka taqa toka kina na vuravura? O cei beka sa vakasobura na duru ni tutu ni vuravura?

⁷ Era a lagalaga sere vata na veikalokalo Ena kida ni mataka ni siga o ya, Ka ra kaikaila ni marau na agilosi ni Kalou.

⁸ O cei sa sogosogoti ira na matamata Me tarovi kina na kui mai ni waitui, Ni sa kacabote na wai mai na kete ni vuravura?

⁹ Sa i au ga sa ubia na wasawasa ena veio Ka solega ena butobuto.

¹⁰ Au a makataka e dua na i yalayala ni wasawasa Ka vakataudeitaka ena matamata sa sogo vakavinaka.

¹¹ Au a kaya ki na wasawasa, Mo yaco ga mai ki ke, Ia mo kakua ni sivia! Na vanua ga oqo me ra yaco kina na kemu biau lelevu.

¹² Ena nomu bula taucoko, Jope, o a sa bau vakarota rawa mada Me kida mai na mataka ni dua na siga?

¹³ O a sa bau vakarota mada na kida ni mataka me vesuka na vuravura Ka kureitaki ira na tamata ca mai na nodra i vunivuni?

¹⁴ Ena rarama ni siga, Era sa qai votu mamaca kina na veidelana kei na veiqakilo Me vaka na sasanukinuki ni dua na i sulu.

¹⁵ Sa rui ramase na rarama ni siga vei ira na tamata ca, Ka sa tarovi ira mai na nodra vakayacora na i tovo kaukauwa Kei na vakacaca.

¹⁶ O sa bau lesu oti beka mai na veimataniwai vure mai na boto ni wasawasa? O a sa bau lakova oti beka na boto ni wasawasa?

¹⁷ E a sa bau dua beka e vakaraitaka vei iko na veimatamata E dau yadravi kina na nodra vuravura butobuto na mate?

¹⁸ O bau kila rawa beka se vaka e vei na levu ni vuravura? Kevaka o kila kece tu na ka oqo, Ia mo sauma mai na noqu taro.

¹⁹ O kila beka na vanua sa vu mai kina na rarama, Se na cava e vakavuna na butobuto?

²⁰ E rawa beka ni o vakaraitaka vei rau Na rarama kei na butobuto na vanua Me rau yaco kina, Se mo vakalesui rau tale?

²¹ Au vakabauta ni rawa vei iko, Baleta ni o iko o sa qase sara ga, Ka o a sa sucu oti tu ni qai buli na vuravura.

²² O sa bau taleva oti mada mai Na veivale ni yaya au dau maroroya tu kina Na uca vulavula kei na uca cevata?

²³ Au vakarautaki rau tu me baleta na gauna ni leqa, Na veisiga ni vala kei na i valu.

²⁴ O sa lesu oti beka mai na vanua sa dau cabe mai kina na matanisiga, Se na vanua e dau liwa tiko mai kina na cagi tokalau?

²⁵ O cei beka sa kelia e dua na i keli me baleta na uca tau bi, Ka vagalalataka na sala me muria na kurukuru kei na cagi?

²⁶ O cei e vakatauca na uca ena vanua e sega ni dua e tiko kina?

²⁷ O cei e vakasuasuataka na vanua mamaca sara ka sa viagunu tu, Me rawa kina ni qai tubu mai na co?

²⁸ E rau vakatamani li na uca kei na tegu?

²⁹ O cei beka na tinadrau na wai cevata kei na tegu cevata

³⁰ Oi rau ka rau vukica na wai me vatu Ka vakacevatataka na dela ni wasawasa?

³¹ E rawa beka ni o vesuki ira Vata na veikalokalo ka yacadra na Peliatisi, Se mo vakaluluqataka na i vau Ka vesuki ira vata tu Na veikalokalo ka yacadra na Orioni?

³² E rawa beka ni o vakauti ira na veikalokalo Mai na dua na draki ni yabaki ki na kena tale ka dua, Ka lewa na nodrau i lakolako na Bea lalai kei na Bea Levu?

³³ O kilai ira beka na lawa ka lewai tu kina na macawa e cake, Ka na rawa beka mo cakava me ra lawa talega ni vuravura?

³⁴ E rawa beka ni o kacivaki i vakaro ki na veio, Me ra vakasuasuataki iko ena uca.

³⁵ Ia kevaka o vakarota na livaliva me tatibi mai, Ena qai lako beka mai vei iko na livaliva me mai kaya vakaoqo, E dua beka na ka o vinakata me'u cakava?

³⁶ O cei beka sa solia na yalomatua ki lomada, Se solia na kila-ka vua na tamata?

³⁷ O cei sara mada na vuku e rawa ni wiliki ira na o, Ka biuti ira vakatatiki me ra sovaraka mai na uca,

³⁸ na uca ka sosoqona vata na kuvu ni qele me soso dregadregata?

³⁹ Sa rawa ni o vakasaqaqara kedra na laione, Ka vakamamautaki ira na luvedra era viakana tu,

⁴⁰ Ena gauna era vuni koto kina ena nodra veiqara vatu, Se ra wawa lo koto ena veivanua era dau tobo kedra kina?

⁴¹ O cei sara mada e vakani ira na reveni Ni ra veivukayaki voli ena viakana, Ka ra tagi kakana mai vei au o ira na luvedra?