Jope 37 - Vakavakadewa Vou kei na iVola tale eso

¹ Sa vakavuna na cagilaba me tatatukituki vakaukauwa na utoqu.

² Dou vakarorogo mada, oi kemudou kece, ki na domo ni Kalou; Ki na kurukuru ka lako tiko mai gusuna.

³ Sa vakatatibitaka vakababa na livaliva e loma ni macawa o koya; Mai na i yalayala kei vuravura e dua ki na kena ka dua.

⁴ Sa qai rogo mai na vadugu ni domona, Na rorogo vakaturaga ni kurukuru, Ia, ena gauna taucoko oqori, A veitibiyaki tikoga kina na livaliva.

⁵ Ena i vakaro ni Kalou, A qai yaco na veika vakurabui, Na veika taleitaki sa dredre me da kila rawa.

⁶ Sa vakarota na uca cevata o koya Me mimiri sobu mai ki vuravura, Ka vakatauca talega mai na uca tau bi.

⁷ E muduka o koya na nodra cakacaka na tamata; E cakava vakakina; Sa vakaraitaka vei ira Ni sai koya sara ga ka cakacaka tiko.

⁸ Era sa qai curu na manumanu kila Ki na nodra qara me ra la'ki tiko kina vakadua.

⁹ Sa qai liwa mai na cagilaba mai na mata ni ceva, Kei na cagi liliwa levu mai na vualiku.

¹⁰ Sa vakabatabatataka na wai na i cegu ni Kalou, Ka vukica me wai cevata.

¹¹ Sa tatibi na livaliva mai na veio,

¹² na veio era veiciriyaki wavoki tu Ka talai rawarawa ki na lewa ni Kalou. Era cakava na veika kecega e vakarota na Kalou, Ena veivanua kecega e vuravura taucoko.

¹³ Sa tala mai na Kalou na uca Me mai vakasuasuataka na vuravura; E rairai ni a tala mai na uca o koya Me totogitaki ira kina na tamata, Se me vakaraitaka kina vei ira na nona veitotaki.

¹⁴ Bau cegu vakalekaleka wale mada, Jope, ka vakarorogo; Vakasamataka mada na veika e veivakurabuitaki ka dau cakava na Kalou.

¹⁵ O bau kila beka ni solia ga e dua na i vakaro na Kalou Ka tatibi sara na livaliva mai na veio?

¹⁶ O kila li se ra dauciri tu vakaevei na veio e macawa, Na cakacaka maqosa ni liga ni Kalou?

¹⁷ E sega sara ga, Ka ni o sa kila wale ga na nomu vosota na katakata, Ni sa lauqa na vanua ena cagi mai na ceva.

¹⁸ E rawa beka ni o vukea na Kalou Ena nona birika cake na macawa Ka vakaukauwataka Me vaka na kaukauwa ni kaukamea dina?

¹⁹ Vakavulica mada vei keitou na ka me keitou tukuna vua na Kalou; Sa lala na neitou vakasama; Sa sega na ka me keitou tukuna.

²⁰ Au sa na sega ni kerea na Kalou me laivi au me'u vosa; Me i cavai me'u vakalaivi koya kina me vakarusai au?

²¹ Ia oqo, e sa rui ramase sara ga na rarama mai macawa, Ia sa remoremo vakaca kina na matadatou; Ka sa taviraka na cagi na macawa me savasava vinaka sara.

²² Sa laurai toka mai na vualiku e dua na mata ni rarama koula, Ka sa vakasinaiti kedatou ena rere na lagilagi ni Kalou.

²³ Sa rui levu na kaukauwa ni Kalou Ka sa sega ni rawa me tou toro voleka vua; Ia sa dodonu ga ka savasava Na nona vakataulewa vei keda.

²⁴ Sa rauta kina me ra qoroi koya ena vakarokoroko Na tamata kecega; Io, sa sega talega ni dau golevi ira na tamata Era sa dau viavia vuku.