Jope 34 - Vakavakadewa Vou kei na iVola tale eso

Vakatusa na Dodonu ni Kalou o Ilaiu

¹ A qai sauma tale o Ilaiu, ka kaya

² O kemudou oqo dou sa bau vuku sara ga, Dou sa matai dina; Ia dou bau vakarorogo mada ki na ka au tukuna tiko.

³ E rawa ni dou tukuna ni kana vinaka e dua na kakana ni dou tovolea; Ia na cava ga o dou sega kina ni tukuna rawa Na veivosa vuku ni dou sa rogoca?

⁴ Na lewai ni veileti oqo e sa vakatau sara ga vei kedatou.

⁵ Sa suguta tiko o Jope ni dodonu tu, Ka besetaka tiko na Kalou ni vakatauca vua na lewa dodonu.

⁶ Sa taroga o Jope, E rawa vakacava me'u lasutaka ni'u cala? Na noqu vakamavoataki au, au sa na mate kina, Ia au sega sara ga ni bau i valavala ca.

⁷ O dou sa bau raica oti mada e dua e tautauvata kei na tamata oqo o Jope? E sega sara ga ni bau vakaraitaka o koya na rokovi ni Kalou.

⁸ Sa vinakata o koya na salavata kei ira na tamata ca Ka dau veigadeyaki vata talega kei ira na tamata i valavala ca.

⁹ E kaya o koya ni sega na ka vinaka e rawa mai na via Muria na loma ni Kalou.

¹⁰ O kemudou na tamata yalomatua. Ia, dou vakarorogo mada vei au. Ena cakava beka na ka ca na Kalou Kaukauwa?

¹¹ E dau sauma o koya na ka era cakava na tamata Ka cakava vei ira na ka sara ga e ganita me caka vei ira.

¹² Sa sega sara ni dau caka ca na Kalou Kaukauwa; Sa sega talega ni dau cakava vua e dua na tamata na ka e sega ni dodonu.

¹³ Sa rawata beka na nona kaukauwa na Kalou mai vua e dua na tani? E dua beka na tani e solia me liutaka na vuravura na Kalou?

¹⁴ Kevaka e vakasuka lesu tale na Kalou na i cegu ni bula,

¹⁵ Era na mate na tamata kecega era bula tiko Ka ra vuki tale me kuvu ni qele.

¹⁶ Kevaka o dou yalomatua, ia dou vakarorogo vei au.

¹⁷ O dou nanuma beka ni besetaka na lewa dodonu o koya na Kalou kaukauwa? O dou sa vakacalai koya tiko beka na Kalou yalo savasava?

¹⁸ Na Kalou ga e vakacalai ira na tui kei ira na turaga, Ena gauna sa sega kina na betedra se ni ra sa tamata ca.

¹⁹ Sa bulia na tamata kecega na Kalou; Sa sega ni tovata kei ira na turaga, Se me tovaki ira na vutuniyau ka sega o ira na dravudravua.

²⁰ E rawa ni mate vakasauri tu ga ena bogi e dua na tamata. Sa samuti ira na tamata na Kalou me ra rusa; Ka vakaweleweletaka tu ga na vakamatei ira na tamata qaqa.

²¹ Sa vakaraica vakavinaka sara ga o koya Na nodra cavu i kalawa yadua na tamata.

²² Sa sega na butobuto e butobuto vinaka sara Me rawa ni vuni kina mai vua na Kalou e dua na tamata.

²³ Sa sega ni kena dodonu me dau lokuca na Kalou Na gauna ni nodra lako yani vua na tamata Me la'ki vakatau lewa vei ira.

²⁴ E sega talega ni kena dodonu me cakava o koya E dua na veivaqaqai me ra vakasivoi kina na i liuliu Ka ra vakaisosomitaki vou tale.

²⁵ Me vaka ni sa kila tu o koya na ka era cakava, Sa vakasivoi ira ga ka vakarusai ira ena bogi.

²⁶ Sa kuitaki ira na tamata ca o koya ena vanua sara ga Me ra raica kina na tamata kecega,

²⁷ me baleta ni ra a sa muduka na nodra muri koya Ka ra buturaka na nona i vakaro kecega.

²⁸ Era vakasaurarataki ira na dravudravua Me ra qai tagi qoqolou yani kina vua na Kalou, Ka sa mani rogoca sara o koya na nodra kaci ni veivuke.

²⁹ Kevaka e lewa na Kalou me sa laivi ira tu mada ga, Ena sega ni vakalewai koya rawa kina e dua na tamata. Kevaka e tabonaka tani na matana o koya, Era na vakaloloma sara ga na tamata.

³⁰ Sa na sega na ka era cakava rawa na veimatanitu Me tarova na nodra lewai ira na tui dauveivakasaurarataki.

³¹ I Jope, o sa vakatusa oti beka vua na Kalou na nomu i valavala ca, Ka o sa yalataka oti tale beka ga Ni o sa na sega ni valavala ca tale?

³² O a sa kerea oti beka vua na Kalou Me vakaraitaka vei iko na nomu cala, Ka o a sa vakadonuya tale beka ga Ni o sa na muduka na cakava na ka ca?

³³ Me vaka ni o besetaka na ka sa cakava na Kalou, O na rawa beka ni nuitaka Ni na cakava o koya na ka o vinakata? Sa nomu na lewa, ka sega ni noqu; Ia tukuna mai oqo vei keitou na ka o nanuma.

³⁴ Na tamata yalomatua ena duavata sara ga kei au; Na tamata vuku talega e rogoca na noqu vosa ena tukuna,

³⁵ Ni o Jope sa vosa tiko mai ena nona lecaika, Ka sega sara ga na ka e tukuna e bau dua na kena i balebale.

³⁶ Ni o vakananuma na veika kece e tukuna o Jope, O na kunea rawa ni vaka na vosa ni dua na tamata ca na nona vosa.

³⁷ Sa besetaka o koya ni muduka na nona i valavala ca; Ia ena matadatou kece sara ga, Sa qai vosacataka ka rulaka tiko na Kalou.