Jope 33 - Vakavakadewa Vou kei na iVola tale eso

¹ Ia oqo, Jope, mo vakarogoca vakavinaka sara na ka kece au na tukuna.

² Au sa na tukuna yani na ka sara ga ka tiko ena noqu vakasama.

³ Na noqu vosa taucoko sara ga e dina, Ka dina sara talega na ka au kainaka tiko.

⁴ E a buli au na yalo ni Kalou ka solia vei au na bula.

⁵ Mo sauma mai na noqu vosa, Kevaka o rawata. Vakarautaka na nomu i le.

⁶ O iko vata kei au, Jope, E daru tautauvata sara ga ena mata ni Kalou, E daru a buli ruarua ga mai na qele.

⁷ Sa sega kina na nomu ulubale mo rerevaki au kina; Ka'u na sega ni vakamalumalumutaki iko.

⁸ Oqo na veika au a rogoca ni o kainaka:

⁹ Au sega ni cala. E sega ni dua na ka au a cakava e cala. Au dodonu tu, ka'u galala mai na i valavala ca.

¹⁰ Na Kalou ga e kila na i ulubale ni nona mokuti au Ka cakava vei au na i vakarau ni veimecaki.

¹¹ E vesuka na yavaqu o koya ena sinucodo; Ka vakaraica vakavinaka na noqu veitosoyaki kecega.

¹² Ia me'u tukuna sara vei iko, Jope, Ni o iko o cala. E uasivi cake na Kalou mai na tamata kecega.

¹³ A cava na vu ni nomu beitaka na Kalou Ni sega ni dau sauma mai na nona vakatukutuku yani Vua e dua na tamata?

¹⁴ E dina ga ni vuqa tu na sala ni nona dau vosa na Kalou, Ia e sega ga ni dua e dau vakarorogo ki na ka e kainaka.

¹⁵ E dau vosa mai na Kalou ena tadra kei na raivotu Ka dau basika mai ni ra sa moce tu na tamata ena bogi.

¹⁶ Na cakacaka ga ni Kalou era vakarorogo rawa kina na tamata Ki na ka e tukuna, Ka ra sa rerevaka na nona veivakaroti.

¹⁷ Sa vosa na Kalou me ra muduka kina na tamata Na nodra vakayacora tiko na i valavala ca Ka me muduka talega na nodra dokadokai ira cake tiko.

¹⁸ Ena sega sara ni vakalaiva na Kalou me ra vakarusai; Ka viribaiti ira mai na veimate.

¹⁹ E vakadodonutaka e dua na tamata na Kalou Ena nona vakatauva vua na mate Ka vakamosia kecega na yagona.

²⁰ Sa qai yali na nona garova na kakana na tamata tauvi mate, Ia na kakana vinaka duadua sara mada ga e rairai vakasisila vua.

²¹ Sa qai lila sobu mai na yagona Ka sa rawa mo raica kecega na nona sui;

²² sa vakarau lako tiko na tamata oqo Ki na nodra vuravura na mate.

²³ De dua ena qai mai vukei koya e dua na agilosi E dua vei ira na udolu vakaudolu na agilosi ni Kalou, Era dau mai vakadreta vei ira na tamata na nodra i tavi.

²⁴ Ena nona loloma, sa qai kaya na agilosi, Sereki koya! Me kakua ni lako sobu o koya Ki na nodra vuravura na mate. Oqo na i sau me sereki kina o koya.

²⁵ Ena rairai bulabula tale o koya Ka kaukauwa vinaka na yagona.

²⁶ Ni masu, ena qai sauma mai na Kalou; Ena qai masuta na Kalou ena yalo mamarau; Ka na qai vakadodonutaka tale na Kalou na veika Me daumaka kina o koya.

²⁷ Ena qai tukuna o koya ena matanalevu, Au sai valavala ca. Au a sega ni bau caka dodonu, Ia sa vakavotaka tikoga na Kalou na noqu bula.

²⁸ Sa tarova o koya Na noqu lako ki na nodra vuravura na mate, Ka'u sa bula tikoga ena gauna oqo.

²⁹ Na veika kece oqo e dau cakava tu ga na Kalou ena veigauna;

³⁰ sa taqomaka o koya na bula ni dua na tamata, Ka solia vua na bula mamarau.

³¹ Ia oqo, Jope, mo vakarorogo mada ki na ka au tukuna tiko; Mo vagagalu tiko mada ga ka laivi au me'u vosa.

³² Kevaka e dua na ka o via tukuna, Ia mo tukuna sara mai oqo me'u rogoca; Ena ka ni marau me'u vakadinadina ni o dodonu tiko.

³³ Kevaka e sega, ia mo vagagalu mada ka vakarorogo vei au, Me'u na vakavulica vei iko na ka mo cakava mo na qai vuku rawa kina.