Jope 32 - Vakavakadewa Vou kei na iVola tale eso

Na Vosa i Ilaiu

¹ E ratou a qai muduka o Ilivasi, o Vilitati kei Sofa na nodratou a tovolea tiko me ratou sauma na vosa i Jope baleta ni sa dei vakavinaka sara tu ga e lomana ni sega dina ga na nona cala.

² A mani sega ni tarova rawa na nona cudru e dua na tamata na yacana o Ilaiu, baleta ni vakamacala i Jope sa vakadonui koya tikoga kina vakai koya, ka bilitaka tiko ni cala na Kalou. O Ilaiu e luve i Parakeli, e dua na kawa i Pusa, ena mataqali i Rama.

³ A cudruvi iratou talega na lewe tolu na i tokani i Jope o Ilaiu baleta ni ratou a sega ni bau kunea rawa e dua na sala me ratou sauma kina na vosa i Jope, ka sa mani rairai kina ni vaka e cala dina tiko na Kalou.

⁴ Me vaka ni gone duadua o Ilaiu vei iratou oqo, sai koya a mani wawa tikoga kina o koya ka yacova sara ni sa oti na nodratou vosa na kena vo.

⁵ Ia ni kila o koya ni ratou a sega ni sauma rawa na lewe tolu oqo na vosa i Jope, a qai cudru,

⁶ ka tekivu sara me sa vosa: Oi au, au gone, ia o kemudou o dou qase, Ena ka oqo au a mani rere tiko kina ni tukuna na noqu nanuma.

⁷ Au a kaya lo tiko e lomaqu ni dodonu ga mo dou vosa o kemudou, Ka dodonu talega vei kemudou na qase mo dou veisolitaka na nomudou vuku.

⁸ Ia na yalo ga ni Kalou Kaukauwa Sa i koya ka mai curumi ira na tamata ka soli vuku vei ira.

⁹ Na qase cake tiko ni tamata e sega ni soli vuku vei ira na tamata, Se me vukei ira me ra kila na ka e dodonu.

¹⁰ Sa i koya au sa vinakata kina mo dou vakarorogo mada vei au; Ka me'u tukuna sara oqo vei kemudou na noqu nanuma.

¹¹ Au a vakarorogo vakavinaka sara tikoga ena gauna dou a vosa tiko kina, Ka'u a mani wawa voli ga ni dou a sa vakasaqara tiko Eso na vakasama vuku mo dou tukuna.

¹² Au a vakatudaliga vakavinaka sara tikoga Ka'u rogoca ni dou sa vakadrukai; O dou a sega ni vakacala rawa na ka sa kaya o Jope.

¹³ Dou sa kila rawa vakacava ni dou sa kunea na yalomatua? Na Kalou sara ga e dodonu me sauma na vosa i Jope, Baleta ni dou a sega ni rawata o kemudou.

¹⁴ E a vosa tiko vei kemudou o Jope, Ka sega ni a vosa tiko vei au, Ia oi au mada ga, Au na sega sara ga ni bau sauma na nona vosa Ena kena i sausaumi o dou cakava o kemudou.

¹⁵ Sa maca koso na vosa vei iratou oqo, Jope; Sa sega na ka me ratou sauma kina na nomu vosa.

¹⁶ Me'u sa wawa voli mada ga, Ni ratou sa vagagalu tu o iratou? E ratou sa tucake tu ga oqori Ka sa sega tale na ka me ratou tukuna.

¹⁷ Au sa na sega ni wawa, Au sa na sauma sara ga oqo na nomu vosa, Ka me'u tukuna sara vei iko na ka au nanuma.

¹⁸ Sa bau dredre sara ga na noqu wawa tiko me'u qai vosa. Au sa sega ni tarova rawa na gu cake mai ni vosa.

¹⁹ Ke sa sega na noqu gauna ni vosa, Au na kacabote me vaka na bolaniwaini Sa sinai tu ena waini vou.

²⁰ Au sa sega ni vosota rawa. Au sa na vosa sara ga.

²¹ Au na sega ni tovaka e dua ena veileti oqo; Ka'u na sega ni cavilaka e dua.

²² Au sega ni kila na veicavilaki, Ia ke'u kila, ena totolo sara ga ni kuitataki au na Kalou.