Jope 31 - Vakavakadewa Vou kei na iVola tale eso

¹ Au a sa cakava oti na noqu vosa ni yalayala Ni'u na sega ni garova e dua na goneyalewa ni'u raica.

² A cava beka e dau cakava na Kalou Kaukauwa vei keda na tamata? E dau sauma beka vakacava o koya na cakacaka ni tamata?

³ Sa dau vakauta mai o koya na rusa kei na veivakacacani Vei ira era caka ca.

⁴ Sa kila na Kalou na veika kecega au cakava; Na i cavucavu yadua ni yavaqu sa raica vinaka o koya.

⁵ Au bubuluitaka ni'u sa sega mada ni bau cakava e dua na ka ca, Ka'u sega mada ni sa bau tovolea me'u vakacalai ira na tani.

⁶ Me qai vakarautaki au mada na Kalou Ena dua na i vakarau bibi e dodonu vinaka tu, Me qai raica rawa kina ni sega sara ga na noqu cala.

⁷ Kevaka au sa gole tani mai na sala dodonu, Se vakalaivi au me'u malele yani ki na ca, Se kevaka sa mani vakadukadukalitaka na ligaqu na i valavala ca,

⁸ Ia me qai kena i sau me vakalaivi na vua ni noqu i teitei me vakarusai, Se me ra vakalaivi ga na tani me ra kania na kakana au tea.

⁹ Kevaka au sa maleleta na wati na wekaqu, Ka'u sa la'ki wawa vuni voleka koto e mata ni katuba ni nona vale,

¹⁰ Ia me qai vakalaivi sara na watiqu Me la'ki vakasaqa kena kakana e dua na tagane tani Ka mani moce sara ena i mocemoce ni tagane tani.

¹¹ Sa ka vakasisila dina sara na i valavala ca vakaoqo Ka kena i totogi ga na mate.

¹² Na mate oqo e vaka sara ga na veivakarusai ni bukawaqa mai eli, Ka me qai rusa kece sara kina na noqu i yau.

¹³ Ni vosa vakatukutukutaki au e dua na noqu tamata dauveiqaravi, Au na vakarogoca mada na nona vakatukutuku Ka'u na cakava vakadodonu sara na kena i wali.

¹⁴ Ke'u sega ni cakava na ka oqo, Au na qai douvaka rawa vakacava Me'u veiqaravi kei na Kalou? A cava tale me'u na qai kaya rawa Ni sa mai vakatau lewa vei au o koya?

¹⁵ Na Kalou vata ga ka buli au, Sa bulia talega na noqu tamata dauveiqaravi.

¹⁶ E sega vakadua ni'u sa bau besetaka Na vukei ira na dravudravua, Ka sega vakadua talega ni'u sa bau vakalaivi ira na yada Me ra tu ga ena dela ni nuiqawaqawa,

¹⁷ Se me'u sa bau kana mada Ka laivi ira na luveniyali me ra viakana tu ga.

¹⁸ Ena noqu bula taucoko, Au dau maroroi ira vakavinaka sara ga na vaka tu oqo.

¹⁹ Ni'u raica e dua ni vakaloloma tu, ni rui dravudravua Ka sega ni rawa ni volia na nona i sulu,

²⁰ Au na solia sara ga vua na i sulu sipi Ka tali mai na vutidra na noqu qele ni sipi. Ena qai vakacaucautaki au o koya Mai na lomana taucoko sara ga.

²¹ Kevaka au vakaisina e dua na luveniyali Baleta ni'u kila ni na sega ni kilai,

²² Ia me qai ramusu ruarua sara mada ga na ligaqu; Me rau basuraki tani sara ga mai na vatuvatu ni tabaqu.

²³ Sa sega sara ni'u veivakaisini vakaoqo Baleta ni'u rerevaka na i totogi ni Kalou.

²⁴ Au sega ni vakararavi ki na i yau,

²⁵ Se me'u sakitaka na noqu vutuniyau.

²⁶ Au sega vakadua ni sa bau masuta na matanisiga ni serau vinaka tu, Se na vula ni vakaciriloloma tu mai na kena i rairai.

²⁷ E sega vakadua ni'u sa bau temaki me'u cakava na ka oqo.

²⁸ Na i valavala ca vakaoqo sa cakitaki kina na Kalou Kaukauwa.

²⁹ Au sega ni marautaka me ra vakararawataki na noqu meca, Se me'u vakavinavinaka ni ra sota kei na rusa,

³⁰ Ka sega talega ni sa bau masulaka me ra mate Ka ni'u sai valavala ca kina.

³¹ Era kila kecega na noqu tamata cakacaka Ni'u dau kidavaki ira na vulagi ena noqu vale.

³² Au kidavaki ira na dauveilakoyaki me ra curu mai ki na noqu vale, Ka'u sega vakadua ni vakalaiva me ra moce tu ga e gaunisala.

³³ Eso na tamata era dau tovolea me ra vunia na nodra i valavala ca, Ia oi au, au sega sara ga ni bau vunia na noqu.

³⁴ Au sega sara ni bau rerevaka na ka era tukuna na tamata; Au sega vakadua ni bau tiko lo se me'u sa tiko vakadua ga e loma ni vale Ni'u rerevaka na nodra kakase ni veivakacacani.

³⁵ Sa sega beka ni dua ena bau vakarorogo ki na ka au tukuna tiko? Au sa bubuluitaka ni vosa yadua oqo e dina sara ga. Laiva vua na Kalou Kaukauwa me sauma mai na noqu vosa. Ke volai mada ga na ka sa beitaki au kina na tamata keirau veisaqasaqa tiko, Me rawa kina ni matata tu vakaivola vei au,

³⁶ Au na dokadokai au sara ga Ka'u na mai vakarubeca voli ga e domoqu na i vola, Ka'u na dau dulaka cake vei ira na tamata kecega me ra raica.

³⁷ Au na tusanaka vua na Kalou na veika kece sara au a sa vakayacora oti, Ka'u na sega ni lolou se madua ni'u sa tu e matana.

³⁸ Kevaka au a butakoca na vanua au teitei tiko kina Ka kovea mai vei ira na kena i taukei dina —

³⁹ Kevaka au kania na ka e tei ena qele oqori ka'u sega ni sauma, Ka biuti ira na dauteitei era a tea me ra viakana tu ga,

⁴⁰ Ia, me qai kakua sara mada ni bula na witi kei na barile ena vanua oqori Ka me qai bula ga kina na co kei na kau vakavotona me kena i sosomi. Sa yala eke na vosa i Jope.