Jope 30 - Vakavakadewa Vou kei na iVola tale eso

¹ Ia ena gauna oqo, era sa vakalialiai au O ira na tamata ka ra gone sobu sara mai vei au! O ira na tamadra e sega sara tu mada ga na betedra Ka sega sara ni rawa vei au me'u vakadonuya Me ra vukei ira na noqu koli ena vakatawa sipi.

² Oqo na i lala tamata vakasavuliga ka vucesa, Ka rui tawa yaga me ra cakacaka vei au.

³ Sa rui levu na nodra dravudravua kei na viakana Ka rawa me ra barilaka na wakanikau ena veivanua lala mai veikau.

⁴ Era vakacavuta ka kania na veika era tubu vakaveitalia tu ga e loma ni veikau, Ka ra bau kania talega na waka ni junipa!

⁵ Na tamata kecega e dau vakasavi ira ka qolouvaki ira, Me vaka na noda dau qolouvaka e dua na daubutako.

⁶ Sa nodra i tikotiko ga na veiqara vatu, Era keli ena yasa ni veibari ni vatu.

⁷ Era qolou mai loma ni veikau loa me vaka e tagi na manumanu kila, Ka ra sorosoroni ena veiruku ni kau.

⁸ Na i lala tamata tawa yaga ka sega na ka era rawata!

⁹ Ia oqo era sa mai veiwalitaki au; Au sa sega ni dua na ka, ka'u sa nodra ka wale ga ni veiwali.

¹⁰ Era cakava vei au na i tovo vakasisila; Ka ra nanuma ni ra vinaka cake mai vei au, Ka ra kakasivi ni ra raica na mataqu.

¹¹ Era sa saumaki lesu ka saqati au ena kaukauwa taucoko ni nodra cudru, Baleta ni ra sa raica ni sa vakamalumalumutaki au vakaca sara ga na Kalou.

¹² Era cavutu mai yasaqu i matau na i lala dauvakacaca oqo; Era vakasavi au; Ka ra vakarautaka na i otioti ni nodra samuti au.

¹³ Era sogota na noqu sala ni dro ka ra tovolea me ra vakarusai au vakadua; Ka sega sara ni dua e bau tarovi ira.

¹⁴ Era curuma mai na veivanua galala ena noqu bai ni valu, Ia ni sa kasura na bai, era qai tabili kece mai vei au.

¹⁵ Sa qai bikai au e dua na rere levu ka cagina na noqu dokai Me vaka na ka sa liwava yani na cagi; Ka cagina laivi na noqu vutuniyau Me vaka e dua na o.

¹⁶ Ia oqo au sa vakarau mate Ka'u sa sega ni vakacegui ena noqu rarawa.

¹⁷ Sa mosi kece na suiqu ena bogi, Ka'u sega ni vakacegu rawa ena mosi.

¹⁸ Sa taura vakaukauwa na noqu i sulu na mosi oqo; Ka muloraki au me vaka e muloraki na domo ni noqu kote.

¹⁹ Sa viritaki au na Kalou ki na veilolobo; Ka sega sara na keirau duidui kei na soso ni lolobo.

²⁰ Au kaci yani vei kemuni na Kalou, O ni qai sega ni rogo mai; Ia ni'u masu, o ni sega sara ga ni maleleta.

²¹ O ni vakararawataki au; Ka vakacacani au ena nomuni kaukauwa taucoko.

²² O ni sa laiva na cagi me vukataki au tani; O ni kolotaki au vaka ka vaka ni sa liwa tiko na cagilaba.

²³ Au kila tu ni o ni sa kauti au tiko ki na noqu mate, Ki na i tinitini sa vakarautaki tu me nona na tamata yadua.

²⁴ A cava o ni valuta tiko kina e dua na tamata sa vakacacani tu Ka sega na ka e cakava rawa, Ka vakavo ga me vakamamasu me bau lomani?

²⁵ E sega li ni'u a bau tagi vata kei ira na leqa Ka rarawa ena vukudra era viakana ka vakaloloma tu?

²⁶ Au a nuitaka tu me yaco mai na marau kei na rarama, Ia sa qai kena i sosomi ga mai na leqa kei na butobuto.

²⁷ Au sa veilecayaki ga ena lomaocaoca kei na mosi; Ka sega sara na ka tani sa tu mai liu, na rarawa duadua ga.

²⁸ Au sa lako ena loma ni butobuto ka sega kina na veivakacegui; Au tucake e matanalevu ka cikeva na veivuke.

²⁹ Sa rarawa ka galili na rorogo ni domoqu Me vaka na tagi ni dua na jekeli se dua na ositeriji.

³⁰ Sa vuki na i rairai ni kuliqu me loaloa; Ka sa curumi au vakaukauwa na katakata ni tauvi mate.

³¹ Ena vanua au a dau rogoca kina na domo ni vakatagi marautaki, Sa yaco tiko kina ena gauna oqo na vakaloloku kei na tagi.