Jope 29 - Vakavakadewa Vou kei na iVola tale eso

Otioti ni Vosa i Jope

¹ A qai tekivu vosa tale o Jope ka kaya,

² Isa! Au diva mada ga na noqu bula me vaka tale Na kena ena gauna a vakatawai au tiko kina na Kalou.

³ Ena gauna o ya, a sa dau tiko voli ga kei au o koya, Ka vakararamataki au ni'u a dau lakova na butobuto.

⁴ Oqori na gauna au a vutuniyau tu kina, Ka maroroya vinaka na noqu vale na nona veitokani na Kalou.

⁵ A sa tiko kina kei au na Kalou Kaukauwa, Ka ra sa viribaiti au o ira na luvequ.

⁶ Era sa solia vakalevu na sucu na noqu qele ni bulumakau kei na me, Ka tubu bulabula na noqu veiolive ena qele veivatu.

⁷ Ena veigauna era dau bose kina na kena turaga ena koro, Ka la'ki dabe maliwai ira,

⁸ Ena gauna ga era a qai raici au kina na cauravou, Era a vakatikitiki tani sara, Ka ra tucake na kena turaga me i vakaraitaki ni nodra dokai au.

⁹ Era a muduka na nodra veivosaki na turaga ni vanua.

¹⁰ O ira sara mada ga na vakaitavi lelevu era a tiko lo.

¹¹ O ira kecega era a sa bau raici au se rogoca na kequ i rogorogo Era a vosa vakavinakataka ga na veika au a sa dau cakava oti e liu.

¹² Ni ra tagi mai na dravudravua, au a dau vukei ira; Ka'u vukei ira na luveniyali ka sega tu na vanua me ra vakanamata kina.

¹³ Era vakacaucautaki au na tamata ka vakaleqai sara vakaca, Ka'u a vukei ira na yada me ra tiko vakacegu ka marau.

¹⁴ Au dau cakacaka vakadodonu sara ka sega ni veitotaki.

¹⁵ Au dau vukei ira na mata boko kei na lokiloki.

¹⁶ Au a vaka e dua na tama ni gone vei ira na dravudravua, Ka'u dau vukea na vulagi kevaka sa dua na nona leqa.

¹⁷ Au a vakarusa na nodra kaukauwa na tamata dauveivakararawataki Ka vukei ira cake era vakararawataki.

¹⁸ Au a namaka ena veigauna kece me'u tamata bula balavu, Ka me'u qai mate ena vakacegu ena noqu vale sara ga.

¹⁹ Au a vaka na vunikau sa dautiko ga na wai ena wakana, Ka sa vakasuasuataki vinaka na tabana ena tegu.

²⁰ Era a vakalevulevui au tu ga na tamata, Ka sega sara ga ni bau malumalumu na noqu kaukauwa.

²¹ Ni'u dau veivakasalataki, era a dau vagagalu sara ga Ka ra vakarorogo vakavinaka na tamata ki na ka au tukuna;

²² Ka sega tale ni ra qai dau tukuna e dua na ka ni sa oti na noqu vosa. A lutu vinaka sara ki lomadra na noqu vosa Me vaka na lulutu ni mata ni uca ki na qele;

²³ Sa ka levu dina na nodra dau taleitaka na vakarorogo, Ka vaka sara ga na nodra dau taleitaka na dauteitei Na tau ni uca ena vula i tubutubu.

²⁴ E vaka ga era sega ni vakabauta rawa na noqu dau matadredredre vei ira; Ia na nodra mata rarawa e sega sara ni dau vakayalolailaitaki au.

²⁵ Au a veiliutaki ka vakatau lewa; Au liutaki ira me vaka na nona liutaki ira na nona mataivalu e dua na tui, Ka vakacegui ira ni ra sa yalo lailai mai.