Jope 28 - Vakavakadewa Vou kei na iVola tale eso

Sa Vakacaucautaki na Vuku

¹ Era tu na qara vatu me keli kina na siliva, Ka ra tu na vanua ni vakasavasavataki koula.

² Era kelia na tamata na kaukamea mai na loma ni qele, Ka ra vakawaicalataka na vatu me rawa kina na kopa.

³ Era vakasaqaqara na tamata ena vanua butobuto sara, Era vakasaqaqara ena boto ni vuravura, Ka vakelia mai na veivatu ena vanua butobuto.

⁴ Era kelia na tamata na qara ni vatu talei, Ena vanua yawa sara mai na vanua tikori, Se sa bau butuka na yava ni tamata. Era la'ki cakacaka tu e kea ka ra galili, Ka kube dali voli e loma ni qara.

⁵ E tubu cake na kakana mai na qele, Ia ena loma ni qele vata ga oqori Sa kabasu ka vurumemea kina na ka kecega.

⁶ Na veivatu e loma ni vuravura e tu kina na safaia, Ka tu na koula ena kuvu ni qele.

⁷ E sega na manulevu e sa bau raica na sala ki na qara, Ka sega na ikeli e sa bau vuka-baleta.

⁸ E sega na laione se na manumanu rerevaki tale eso Me bau lakova na veigaunisala lala oqo.

⁹ Era sa kelia na tamata na veivatu kaukauwa sara, Ka cavuraka na yavu ni veiulunivanua.

¹⁰ Ni ra sa kelikeli e loma ni veivatu, Era sa kunea na veivatu talei.

¹¹ Era kelikeli yani ki na i vurevure ni veiuciwai Ka ra kauta mai ki na rarama na veika vuni.

¹² Ia e tiko beka e vei na i takataka ni vuku? E vei na vanua e rawa ni da vuli kina me da kila?

¹³ E sega ni kune rawa vei ira na tamata vuku; E sega sara ni dua e kila dina na kena talei

¹⁴ E rau kaya mai na wasa liwa titobu kei na wasawasa Ni sega ni kunei mai kina na vuku.

¹⁵ E sega ni voli rawa na vuku ena koula se na siliva.

¹⁶ Na koula dina duadua kei na i ukuuku vatu talei E rau sega ni yacova na i sau me voli kina na vuku.

¹⁷ E talei cake na vuku mai na koula Ka talei cake mai na i tutu ni senikau koula kei na iloilo.

¹⁸ E talei cake sara na vuku mai na lase damudamu, Se na karisitala, se na rupi.

¹⁹ E ka wale sara na talei ni topasa ni Eciopea ka, Ka wale na koula dina mai na talei ni vuku.

²⁰ E taka beka mai vei na vuku? E vei beka e rawa ni da vuli kina me da yalomatua?

²¹ E sega na ka buli ka cegu me bau raica rawa na vuku, Ka sega talega na manumanu vuka e bau raica rawa.

²² O Mate talega kei Rusa e rau vakadinadinataka Ni rau sa rogoca wale tu ga na kena i rogorogo.

²³ Na Kalou duadua ga sa kila na kena gaunisala, Kei na vanua sa tiko kina na vuku.

²⁴ Baleta ni o koya ga e raica rawa na i yalayala ni vuravura, Ka raica na veika kecega ena ruku i lomalagi.

²⁵ Ni sa solia na Kalou vua na cagi na nona kaukauwa Ena gauna e a solia kina na Kalou ki na cagi na kaukauwa, Ka sa vakarautaka na levu ni wasawasa;

²⁶ Ena gauna sa lewa kina o koya na vanua me tauca na uca Kei na sala me muria na o loaloa ni kurukuru,

²⁷ sai koya ga oqori na gauna sa kunea kina na vuku Ka vakatovolea na kena talei, Sa vakadeitaka sara ka solia kina na nona veivakadonui.

²⁸ A qai kaya na Kalou vei ira na tamata, Mo ni rerevaka na Kalou kevaka o ni vinakata na yalomatua. Mo ni gole tani mai na ca kevaka o ni vinakata na kila-ka.