Jope 27 - Vakavakadewa Vou kei na iVola tale eso

Maroroya o Jope na Nona Tamata Dina

¹ A sa tomana o Jope na nona vosa, ka kaya,

² Me vaka ni sa bula na Kalou, O koya sa kauta laivi na noqu dodonu, O Koya sa Kaukauwa, Ka sa vakararawataka na yaloqu,

³ Io, ena gauna taucoko au bula kina, Ka tiko e ucuqu na i cegu ni Kalou,

⁴ Ena sega na ka ca me basika mai tebenigusuqu, Ka sega na vosa lasu ena cavuta na yamequ.

⁵ Au na sega ni tukuna ni dou sa dodonu; Ka'u na tusanaka tikoga ni'u sega ni cala Me yacova na noqu mate.

⁶ Ena sega ni mudu na noqu tukuna voli ni'u sa yalododonu; Ka sa galala kina na yaloqu.

⁷ Me ra totogitaki me vakataki ira na tamata ca ka dukadukali O ira kece era sa vorati au, ka'u sa veivala vata.

⁸ Era sa vakanuinui beka ki na cava O ira na tamata sa lecava na Kalou Ena gauna sa kauta laivi kina na Kalou Na nodra bula?

⁹ Ena rogoca li na Kalou na nodra tagi Ni sa yacovi ira mai na leqa?

¹⁰ Era na kunea li na marau vei Koya sa Kaukauwa? Era na masuta li na Kalou ena veigauna kece?

¹¹ Me'u vakavulici kemudou mada ena kena vakaitamera na kaukauwa ni Kalou, Ka vakamacalataka na veika sa nakita tu na Kalou Cecere.

¹² Ia na veika oqo dou sa sarava oti. A cava tale na vuna Me qai ia kina na i vakamacala vakaoqo Ni sa sega ni yaga?

¹³ Sa vakaoqo na nona sala na Kalou Cecere Ni sa totogitaki ira na tamata i tovo vakasisila ka i vakarau kaukauwa.

¹⁴ Era na lewe vuqa beka na luvedra, Ia era na mate kecega ena i valu; Ka na sega ni veirauti na kedra kakana o ira na luvedra.

¹⁵ O ira era bula mai na i valu ena qai vakamatei ira na mate lelevu, Ka na sega ni vakalolokutaka na nodra mate o ira na nodra yada.

¹⁶ E dina ga ni na levu cake na siliva era kumuna na tamata ca Ka vaka na i binibini qele na levu ni nodra i sulu,

¹⁷ Ia na veika era sa binia ena vakaisulu kina na yalododonu, Ka vota na siliva o ira sa sega ni cala.

¹⁸ Era sa tara na tamata ca Na nodra i tikotiko me vaka Na vale ni viritalawalawa, Se vaka na nona bure na bobula Sa lesi me yadrava na i teitei.

¹⁹ Era sa davo sobu Ena dela ni nodra vutuniyau, Ia ni ra yadra cake, Sa yali na nodra i yau kece sara.

²⁰ Sa tarai ira na rere levu me vaka na waluvu; Ka liwavi ira tani na cagi ni bogi;

²¹ Na cagi tokalau ena laveti ira cake, Ka ra na lako tani sara; Sa taviraki ira mai na nodra i tikotiko;

²² Ena liwavi ira yani vakaukauwa ka sega ni loloma Ni ra tovolea ena nodra i gu me ra dro.

²³ Sa vakacevaruru na cagi ni ra sa dro, Ka vakarerei ira na kena kaukauwa ni veivakarusai.