Jope 26 - Vakavakadewa Vou kei na iVola tale eso

Sauma o Jope: Na Cecere ni Kalou sa Dredre me Kilai

¹ A qai sauma o Jope, ka kaya,

² Sa soli vakaevei na veivuke vua sa sega na nona kaukauwa! Sa vukei vakaevei na liga i koya sa malumalumu!

³ Sa vakasalataki vakaevei o koya sa sega ni kila-ka, Ka solia vua na i vakasala vinaka!

⁴ O cei li dou nanuma ni na via rogoca na nomudou vosa? O cei e uqeti kemudou mo dou vosa vakaoqo?

⁵ Sa sautaninini na yalo ni mate Ena ruku ni wai kei vuravura.

⁶ Sa tadola tu vua na Kalou na nodra vuravura na mate; Ka segai na i ubi me vakalatia na nona raica yani.

⁷ Na Kalou sa tevuka yani na lomalagi mai na vualiku ki na vanua lala, Ka segai na ka sa vakarubeca tu kina na vuravura.

⁸ Sa vakasinaita tu na veio na Kalou ena wai, Ka sa tarova tu na bibi ni wai me kakua ni vakacabotetaki ira na veio.

⁹ Sa tabonaka na vula taucoko na Kalou ena daku ni dua na o.

¹⁰ Sa wasea na rarama kei na butobuto Mai na dua na laini mokimokiti sa vola e dela ni wasawasa.

¹¹ Ni sa vakarerei ira na duru era tabea cake tu na macawa na Kalou, Era sa qai sautaninini ena nodra rere.

¹² Sa vakamaravutaka na wasawasa na nona kaukauwa; Ia na nona liga maqosa, sa vakarusa kina na tevoro ni wasawasa, o Rapa.

¹³ Sa vakamakaretaka na macawa na nona cagi, Ia na ligana sa vakamatei kina na tevoro ni wasawasa.

¹⁴ Ia, na veika oqo era dusia wale sara ga na nona kaukauwa; Na nona vakasolokakanataki wale sara ga eda rogoca rawa. O cei e kila rawa na levu vakaidina ni nona kaukauwa na Kalou?