Jope 24 - Vakavakadewa Vou kei na iVola tale eso

Kudruvaka o Jope na i Vakarau Kaukauwa e Vuravura

¹ A cava beka e sega ni lokuca kina na Kalou na gauna ni veilewai, Me dua ga na siga ni lewa me nodra na dauqaravi koya?

² Era sa dau tosoya na tamata na i yalayala ni nodra vanua, Me levu kina na kedra tiki ni qele; Era butako sipi ka la'ki biuta vata kei na nodra dui qele ni sipi.

³ Era butakoca na nodra asa na gone luveniyali, Ka ra taura na nona bulumakau na marama yada Me yacova na gauna sa sauma oti kina na nona dinau.

⁴ Era tarovi ira na dravudravua mai na nodra rawata na nodra dodonu, Ka ra vakasaurarataki ira na vakaloloma me ra la'ki vunitaki ira.

⁵ Me vakataki ira na asa ni veikau, Era sa la'ki vakasaqaqara kakana na dravudravua ena vanua talasiga; Ka ni sa segai tale na vanua me ra kune kakana kina me kedra na luvedra.

⁶ Era na tatamusuki ena tikinivanua ni tamata tani Ka veti qerepi ena veivaini ni tamata ca.

⁷ Ni sa sega na nodra i sulu, era sa moce luvaiwale ena bogi; Ka sega na i tutuvi me taqomaki ira mai na batabata.

⁸ Era suasua vakaca sara ena uca ka tau ena veiulunivanua, Ka ra dui lokini ena veiyasa ni vatu me ra vakaruru kina.

⁹ O ira na tamata ca era sa vakabobulataki ira na gone luveniyali, Ka tauri ira na luve ni dravudravua me ra i vakadei ni kena saumi lesu na dinau.

¹⁰ Ia era na lako luvaiwale ga na dravudravua me ra taqomaki kina; Ka ra na walokai ena viakana ni ra tatamusuki tiko ena veiloga ni witi.

¹¹ Era sa loba olive me waiwai, Ka ra loba qerepi me waini, Ia o ira vakai ira era sa karamaca ena viagunu.

¹² Ena voqa mai loma ni koro na nodra tagi na mavoa kei ira era sa vakarau ciba, Ia na Kalou sa sega ni malele ki na nodra masu.

¹³ Era tu na mataqali tamata era dau besetaka na rarama; Era sega ni kila na rarama ka ra levea na vanua e cila yani kina.

¹⁴ Sa duri cake na daulaba ena kida ni mataka, Ka sou yani me labata na tamata dravudravua, Ka sa butako ena bogi.

¹⁵ E waraka koto na lutu ni yakavi na tamata dauveidauci Ka vunia koto na matana me kakua ni dua e kilai koya.

¹⁶ Era sa basu vale na daubutako ena bogi, Ia ena siga, era sa vuni ka levea na rarama.

¹⁷ Era rerevaka na rarama ena siga, Ia na butobuto e sega sara ga na ka era rerevaka kina.

¹⁸ Sa kuitaki laivi na tamata ca ena dobui, Ka sa lutuka koto na kena tiki ni qele na cudru ni Kalou; Ka sa mudu na nona la'ki cakacaka ena nona loganivaini.

¹⁹ Me vaka na yali vakadua ni uca cevata mai na katakata kei na lauqa, Sa yali vakakina na tamata i valavala ca mai na nodra vanua na bula tiko.

²⁰ Sa sega ni qai nanumi ira tale na marama tinadra; Sa kani ira na bacaniqele; ka mani rusa vakadua kina.

²¹ Sa yaco na veika oqo baleta ni ra caka ca vei ira na yada, Ka sega ni yalololoma vei ira marama sega ni vakaluveni.

²² Ia na Kalou, ena nona kaukauwa sa yarataki ira laivi yani na tamata qaqa; E cakacaka na Kalou ka ra vakaleqai na tamata ca.

²³ Na Kalou ena rawa ni vakalaivi koya me tiko vinaka mada ka bula sautu, Ia sa wanonova matua ga na veika era cakava.

²⁴ Sa na dede vakalailai mada na nona rawa-ka tiko na tamata ca, Ia ena qai malai yani me vaka na co ca, Me vaka na vu ni sila sa tamusuki oti.

²⁵ E dua beka ena cakitaka rawa na dina ni ka oqo? E dua li e rawa ni vakadinadinataka ni sega ni dina na noqu vosa?