Jope 23 - Vakavakadewa Vou kei na iVola tale eso

Sauma o Jope: Rui Mosimosi na Noqu Kudru

¹ A qai sauma o Jope, ka kaya,

² Ena gauna oqo au na vorata tikoga ka vosa kudrukudrutaka na Kalou; Ka'u sa sega ni tarova rawa na noqu vutugu ni sa qai bibi ga vei au na ligana.

³ Sa dua tani dina na noqu via kila na vanua me'u kunei koya kina, Kei na sala me'u yaco rawa kina ki na nona i tikotiko.

⁴ Au na la'ki vakamacalataka sara ga ena matana na ka e baleti au, Ka serelaka vua na i le kecega au na vakadonui kina.

⁵ Au via kila na ka ena tukuna, Kei na ka ena i sau ni noqu i vakamacala.

⁶ Ena vakayagataka beka na Kalou na nona kaukauwa taucoko Me saqati au kina? Sega, ena vakarorogo o koya ni'u tukutuku tiko vua.

⁷ Oi au na tamata dina; au rawa ni veivosaki vakavinaka sara kei na Kalou; Ka na qai kacivaka o koya ni'u sa talaci ni sega na noqu cala — Edaidai kei na veigauna kecega.

⁸ Au sa vakasaqaqara oti mai na tokalau, Ia e yali mai kina na Kalou; Ka'u sega talega ni kunei koya ni'u vakasaqaqara mai na ra.

⁹ E a cakacaka tiko mai na vualiku o koya, Ka sa lako oti talega ki na ceva, Ia au sa sega tikoga ni raici koya.

¹⁰ Na Kalou e kila yadua sara ga na noqu cavu i kalawa; Ke vakatovolei au o koya, Ena kunea ni'u dodonu ka savasava.

¹¹ Au muria tu ga ena yalodina na gaunisala sa digitaka, Ka'u sega sara ni lako vakaveitalia yani mai na yasa ni sala ruarua.

¹² Au vakayacora ena veigauna kece na ka e vakarota na Kalou; Au muria na lomana, ka sega sara ga na noqu gagadre.

¹³ E sega ni dauveivukiyaki na Kalou. E sega ni dua e vorati koya rawa, Se me tarova na ka sa lomana me cakava.

¹⁴ Ena vakayacora o koya na ka sa nakita ena vukuqu; Na i naki oqori sa dua wale ga vei ira na i naki e vuqa ka tu vua.

¹⁵ Ena vuku ni ka oqo, Au sa rere sara ga kina ni'u tu e matana; Ia ni'u vakananuma, Sa qai dua tani ga na noqu rerevaki koya.

¹⁶ Sa vakamatea vakadua na Kalou Kaukauwa na noqu yalo qaqa.

¹⁷ Sa vakavuna ga na Kalou na noqu rere, Ka sa sega ni vu mai na butobuto, Ka dina ga ni butobuto sa vakavuna me'u mataboko.