Jope 22 - Vakavakadewa Vou kei na iVola tale eso

Ai Katolu ni Veitalanoa ( 22.1–27.23 ) Vosa o Ilivasi: Sa Rui Levu na i Valavala Ca nei Jope

¹ A qai vosa o Ilivasi na kai Temani, ka kaya,

² Sa yaga beka li na tamata vua na Kalou? Ena rawa li vua na tamata vuku duadua sara me yaga vua?

³ E dua beka na betena vua na Kalou na nomu caka dodonu, Se ena vukei koya beka na nomu caka vinaka?

⁴ E sega ni bale ki na nomu rerevaka na Kalou Na nona veilewaitaki iko ka totogitaki iko.

⁵ E sega ni vaka o ya! Sa bale duadua ga ki na sivia ni nomu i valavala ca Vata kei na levu ni ca o sa cakava!

⁶ O sega ni dau solia wale e dua na ka me dinautaka na wekamu Kevaka e sega na ka o taura mai vua me i vakadei ni dinau; O taura mai vua na ka kei na i sulu Me qai dravudravua ka tu wale sara o koya.

⁷ O bureitaka na wai ni gunu vei ira era oca, Ka bese ni vakani ira era viakana voli.

⁸ O vakacolasautaka na nomu kaukauwa kei na nomu i tutu Me rawa kina ni nomu na vanua taucoko.

⁹ E sega wale ga ni o besetaka na vukei ira na yada, O butakoci ira talega ka vakatotogani ira na luveniyali.

¹⁰ Oqo na vuna era sa tuva wavoliti iko kina na veika mo tacori kina, Ka yacovi iko vakasauri na rere levu.

¹¹ Sa toro cake na butobuto ka sa sega na ka o raica rawa; Ka sa qai luvuci iko na waluvu.

¹² E sega beka ni tiko na Kalou mai na lomalagi e cake sara, Me qai irovi ira sobu mai na veikalokalo Ka veitalia na kedra yawa ki lagi?

¹³ Ia o se taroga ga, A cava sara mada e kila na Kalou? E rawa vakacava vua me vakatau lewa vei keda Ni ra tabonaki koya tani tu na veio?

¹⁴ O nanuma ni veio vavaku ena vakalatia na nona rai, Ena nona veilakoyaki voli ena ruku ni dela i lomalagi.

¹⁵ Sa lomamu dina li mo muria tikoga Na sala era a dau muria tu e liu na tamata ca?

¹⁶ O ira oqori era a mate dole Ka kuitaki ira laivi yani na dobui.

¹⁷ Oqori o ira na tamata era besetaka na Kalou Ka ra vakabauta ni sega na ka e cakava rawa vei ira o koya.

¹⁸ Ia na Kalou ga vakaikoya e a vakavutuniyautaki ira. Au sa drukataka dina na nodra vakasama na tamata ca.

¹⁹ Era marau na tamata dodonu ka ra dredre na tamata vinaka Ni ra raica ni ra sa totogitaki na tamata ca.

²⁰ Sa qai vakarusai na nodra i yau kecega na tamata ca, Ka vakamai ena bukawaqa na nodra i yau sa vo.

²¹ Ena gauna oqo, Jope, mo drau veiyaloni mada kei na Kalou Ka muduka na nomu raici koya tiko me vaka na kemu meca; Ke o cakava oqo, ena qai vakalougatataki iko o koya.

²² Mo ciqoma na i vakavuvuli sa solia vei iko; Ka tugana sara ki lomamu na nona vosa.

²³ Io, e dodonu mo lesu sara ga vua ena yalo malumalumu, Ka muduka vakadua na ca kecega ka vakayacori tiko ena nomu vale.

²⁴ Kolotaka laivi na nomu koula; Kolotaka na nomu koula talei duadua ki na veivatu ni wai drodro.

²⁵ Me qai nomu koula ga na Kalou Kaukauwa, Ka nomu siliva talei duadua talega o koya.

²⁶ Ia o na qai dinata kina na Kalou ena gauna kece, Ka vakadinadinataka ni sai koya ga na Kalou na i takataka ni nomu reki.

²⁷ Ni o qai masu vua, sa na qai sauma mai o koya; Ia mo vakayacora sara na ka o sa yalataka vua.

²⁸ Na ka kece o cakava o na rawata vakavinaka, Ka na serauna na nomu sala na rarama.

²⁹ Sa vakalolovirataki ira na viavialevu na Kalou Ka taqomaki ira na yalo malumalumu.

³⁰ Ena vakabulai iko o koya ke sega na nomu cala, O ya kevaka e dodonu na ka o cakava?