Jope 21 - Vakavakadewa Vou kei na iVola tale eso

Sauma o Jope

¹ A qai sauma o Jope, ka kaya,

² Dou vakarorogo mada ki na ka au tukuna tiko; Oqori duadua ga na veivakacegui au bau kerea vei kemudou.

³ Dou dolava mada vei au e dua na gauna me'u vosa kina, Ia ni sa oti, dou qai vakidi ucu ka vakadudu gusu kevaka o dou vinakata.

⁴ Au sega ni veicudruvi tiko kei na tamata vakayago; E tiko na vu ni noqu sa sega ni dabe dei rawa.

⁵ Dou raici au mai. Na nomudou raici au sa sega li ni Rauta mo dou wadra balavu kina ka galu ena kidroa?

⁶ Ni'u vakananuma na ka sa yaco tiko vei au, Au sa qai domobula vakalevu sara ka'u sautaninini.

⁷ A cava beka e vakalaivi ira kina na tamata na Kalou me ra Qase sara ka vutuniyau?

⁸ Era sa tubu cake e matadra o ira na luvedra kei na makubudra.

⁹ Sa sega ni bau vakarusa na Kalou na nodra veivale; Ka ra sega ni bula tu ena dela ni rere.

¹⁰ Io, era luvea kecega na nodra bulumakau Ka sega na leqa ni nodra vakasucu.

¹¹ Era veiciciyaki na luvedra ka ra veiqitori me vaka na luve ni sipi;

¹² ka ra meke ki na domo ni api kei na bitu ni vakatagi.

¹³ Era vakayagataka na nodra bula ena bula ni tiko sautu, Ka ra mate vakacegu yani ka sega ni ra bau vakararawataki.

¹⁴ Era tukuna vua na Kalou na tamata i valavala ca me laiva, Me ra lewai ira tu ga; Era sega ni via kila na lomana me baleta na nodra bula.

¹⁵ Era nanuma ni sega na betena na qarava na Kalou, Se ni dua na betena na masu vua.

¹⁶ Era suguta ni ra rawa ka mai na nodra kaukauwa sara ga, Ia oi au, au sega sara ni vakadonuya na nodra vakasama.

¹⁷ E dau bokoci vakavica beka na nodra cina na i valavala ca? E sa bau dua beka vei ira e vakarusai? E sa bau totogitaki ira li na tamata ca na Kalou Ena dela ni nodra cudru,

¹⁸ se biligi ira tani me vaka na draunico madu sa liwava laivi na cagi, Se me vaka na kuvu ni qele sa cagina ena cagilaba?

¹⁹ Dou sa kaya voli ni sa totogitaka na Kalou E dua na gone lailai ena vuku ni caka cala nei tamana. E sega! Na Kalou me kuitataki ira sara ga na tamata i valavala ca, Me vakaraitaka kina ni vakayacora na ka oqo ena vuku ni nodra i valavala ca.

²⁰ Laiva vei ira na tamata i valavala ca me ra dui cola na nodra i totogi; Ka me ra vakila sara mada na kaukauwa ni cudru ni Kalou Cecere.

²¹ Ni sa muduki koso na noda bula na tamata, Eda kauwaitaka dina li ke ra marau tiko se segai o ira na luveda?

²² Ena rawa li vua e dua me vakavulica na Kalou, Me vaka ni o koya sa lewai ira talega era sa cecere?

²³ Eso na tamata era sa bulabula vinaka me yacova na nodra mate; Era sa mate ni ra marau tu ka yalo vakacegu.

²⁴ A sa totoka tu na i tuvaki ni yagodra, Ka bulabula vinaka na nodra sui.

²⁵ Eso tale na tamata sa sega vei ira na marau; Era sa bula ka mate yani ni rarawa tu ga na lomadra.

²⁶ Ia era sa tautauvata ga ni ra sa mate ka bulu; Ka robota na yagodra kecega na baca ni qele.

²⁷ Au sa kila deivaki na ka dou vakasamataka voli, Kei na i tuvatuva eso mo dou vakacalai au kina.

²⁸ Dou sa taroga, Sa evei na nodra vale na tamata dokai? Sa evei na nodra vale na tamata i valavala ca?

²⁹ Dou sa sega beka ni dau veitalanoa kei ira na tamata dauveilakoyaki? Dou sega beka ni kila na i tukutuku era kauta lesu mai?

³⁰ Ena siga sa cudru ka veivakanakuitataki kina na Kalou, Sa o ira na tamata ca ka ra dau calata na kuita ena vuqa na gauna.

³¹ Sa sega e dua me beitaki ira na tamata ca, Se me sauma lesu vei ira na veika ca era sa vakayacora oti.

³² Ni sa colati na yagodra ki na i bulubulu, Ki na nodra qara sa yadravi vakavinaka,

³³ Sa udolu vakaudolu na tamata era la'ki veitalaci ena i bulubulu, Ka sa bika vakamalua yani na yagodra na qele malumu.

³⁴ Ia o kemudou! Dou sa via vakayalovinakataki au ena nomudou lialia! Sa lasu taucoko sara na i sau ni taro dou sa tukuna vei au!