Jope 20 - Vakavakadewa Vou kei na iVola tale eso

Vosa o Sofa: Taura na Kena i Sau Dodonu na Caka Cala

¹ A qai sauma o Sofa, na kai Neama, ka kaya,

² I Jope, o sa vakayalocataki au. Au sa sega ni tiko dei ni'u sa via sauma na veika o tukuna tiko.

³ Na ka o sa tukuna oti sa dua na ka ni veibeci, Ia au sa sega ni kila se me na saumi vakacava vei iko.

⁴ Au vakabauta ni o sa kila tiko, Ni a tekivu mai na gauna makawa sara,

⁵ E sega ni sa bau dua mada na tamata ca me marau tiko vakadede.

⁶ Ena tubu cake beka na nona rogo ka kilai me yaco ki macawa, Se me mani rui cere na uluna me tara na veio,

⁷ Ia ena cagina wale ga yani o koya me vaka na kuvu ni qele. E ra na qai vakataroga o ira era a kilai koya e liu Se sa lako kivei.

⁸ Ena yali ga yani o koya me vaka e dua na tadra, Se na raivotu ena bogi, Ka na sega ni qai raici tale vakadua.

⁹ Sa na qai yali o koya mai na nona i tikotiko;

¹⁰ Ka ratou na qai sosomitaka na luvena Na veika sa butakoca o koya mai vei ira na dravudravua.

¹¹ Sa dau bulabula ka yavavala na yagodra eliu, Ia e sega ga ni dede ni sa vuki me kuvu ni qele.

¹² E kana vinaka vua na i valavala ca ka vunia ena ruku ni yamena;

¹³ Ka kubuta voli ga eso me dau diva voli kina na kena i kanakana.

¹⁴ Ia ena loma ni nona davuibuco, Sa la'ki vuki kina me gaga sara na kakana oqo, Io, me vaka na gaga ni dua na wai ni mate gaga.

¹⁵ Sa qai luaraka mai na tamata ca na i yau sa butakoca; Ka sa taura lesu tale na Kalou, Ka talaucaka talega mai na loma ni nona davuibuco.

¹⁶ Na ka era sa tiloma na tamata ca sa vaka na wainimate gaga; Sa vakamatei ira me vaka na i kata ni gata bati gaga.

¹⁷ Ena sega ni bula tiko o koya me raica na uciwai ni waiwai olive, Se na veiuciwai sa dave mai kina na sucu kei na oni.

¹⁸ Sa kena dodonu me biuta laivi o koya na ka e buno kina; Sa sega na gauna me marautaka kina na nona i yau;

¹⁹ Baleta ni vakasaurarataki ira ka sega ni qaravi ira na dravudravua, Ka kovea na veivale era a tara na tani.

²⁰ E sega ni vakamamautaki rawa na nona kocokoco.

²¹ E sega sara ga ni vo e dua na ka ni sa kana o koya, Ia oqo sa mai oti koto na nona tiko sautu.

²² Ena gauna vinaka duadua sara ga ni nona rawa ka, Ena qai vorolaki koya vakadua na bibi kecega ni tiko vakaloloma.

²³ Me vakalaivi tiko mada me kania na levu ni ka e vinakata! Ena qai warumisa ni sa kuitataki koya na Kalou ena nona cudru kaukauwa.

²⁴ Ni tovolea o koya me dro mai na i seleiwau kaukamea, Ena qai lau gasau ena dua na gasau parasa.

²⁵ Ia ni sa ucu laivi mai yagona na gasau o ya, Sa titiri tu na nona dra mai na matana taliva, Ka sa qai yacovi koya e dua na rere levu.

²⁶ Na i yau kecega e a maroroya rawa tu sa qai vakarusai; Ka sa qai vakamai o koya kei na nona vuvale Ena dua a bukawaqa sa sega ni vakawaqara na tamata.

²⁷ Sa vakaraitaka o lomalagi na i valavala ca ni tamata oqo, Ka sa soli i vakadinadina ni nona cala o vuravura.

²⁸ Ena qai vakarusai na nona i yau kecega Ena dobui levu ni cudru ni Kalou.

²⁹ Oqo na nodra i tinitini na tamata ca, Na i tinitini sa lesia vei ira na Kalou.