Jope 19 - Vakavakadewa Vou kei na iVola tale eso

Sauma o Jope: Au Kila ni Bula Tiko na Noqu i Vakabula

¹ A qai sauma o Jope, ka kaya,

² A cava na vu ni nomudou vakararawataka na lomaqu ena vosa?

³ O dou rulaki au tu ga ena veigauna, Ka sega sara ni o dou bau vakaraitaka Ni dou sa maduataka na nomudou rukaki au.

⁴ Me da kaya mada ni'u sa caka cala, E la'ki mosi vakacava vei kemudou oqori?

⁵ O dou nanuma beka ni dou vinaka cake mai vei au, Mo dou nanuma kina ni sai vakadinadina ni noqu cala na noqu leqa?

⁶ E sega beka ni dou raica rawa ni Kalou ga e cakava na ka oqo? E a vakotora koto o koya e dua na dai me'u coko kina.

⁷ Au sa qolouvaka na nona i tovo kaukauwa, Ia e sega ni dua me vakarorogo; Au sa vakasaqara na lewa dodonu, Ia e mani sega ni tiko e dua.

⁸ Sa sogota na Kalou na gaunisala, Ka'u sa sega ni curu basikata rawa; Sa ubia o koya na noqu gaunisala ena butobuto.

⁹ Sa kauta kecega na noqu i yau, Ka vakarusa na kequ i rogorogo vinaka.

¹⁰ Sa qaqiraki au mai na veiyasana kecega. Sa cavuraka laivi na noqu i nuinui, Ka qai biuti au tu me'u malai ka mate yani.

¹¹ Sa cudru na Kalou ka sevaki au sara ga; Ka cakava me'u vakataka na kena meca levu duadua.

¹² Sa vakatala mai o koya na nona mataivalu me mai valuti au; Era sa kelia na nodra i keli ni i valu Ka ra tuva i valu me ra valuta na noqu valelaca.

¹³ Sa cakava na Kalou me ratou biuti au na taciqu; Au sa vulagi vei ira era a kilai au tu e liu;

¹⁴ Era sa yali na wekaqu kei na noqu i tokani.

¹⁵ Era sa guilecavi au o ira era a tiko vakavulagi ena noqu vale; Au sa vaka e dua na tamata vou ka kai tani Vei ira na noqu yalewa dauveiqaravi.

¹⁶ Ni'u kaciva e dua na dauveiqaravi, E sega sara ni bau rogo mai O ya ni'u vakamasuti koya sara ga me bau mai vukei au mada.

¹⁷ Sa sega ni vosota rawa na watiqu na boi ca ni noqu i cegu, Ka ratou sega sara ni toro volekati au mai na taciqu.

¹⁸ Era sa beci au na gone ka ra veidredrevaki ni ra raici au.

¹⁹ Era sa vakasisilataki au na noqu i tokani voleka duadua; Ka ra sa rubuti au o ira au a dau lomani ira vakalevu duadua.

²⁰ Sa voleka sara me veikalikali na kuliqu kei na suiqu; Ka sa vo lailai sara me cavuka na noqu i cegu.

²¹ O kemudou na noqu i tokani! Dou bau lomani au mai! Sa mokuti au na liga ni Kalou.

²² A cava e dodonu rawa kina na nomudou vakacacani au Me vaka na ka e cakava na Kalou? Sa sega beka ni rauta na nomudou vakararawataka na lomaqu?

²³ Au sa vinakata dina me volai na noqu vosa, Ka me toqai tu e dua na i vola vivigi!

²⁴ Se me na ceuti na noqu vosa ena dua na vatu, Me volai tu kina, Ka me kakua sara ni taqusi rawa tale.

²⁵ Ia au kila ni sa bula tiko na noqu i Vakabula, Ka na qai lako mai ena i vakataotioti me taqomaki au.

²⁶ Ke sa mani kanalaka sara mada ga na kuliqu na mate, Ia ena yagoqu dina ga oqo au na raica kina na Kalou.

²⁷ Au na raici koya sara ga ena mataqu dina, Ka sega ni mata vou vei au o koya. Sa yali vei au na noqu yalo qaqa baleta ni o dou kainaka,

²⁸ E datou vakararawataka vakacava na lomana? O dou a vakasaqara e dua na ka Me i ulubale ni nomudou mokuti au.

²⁹ Ia oqo, dou rerevaka mada na i seleiwau Na i seleiwau me ravuta kina na i valavala ca na cudru ni Kalou Ka me rawa kina ni dou kila tiko e dua sa dauveilewai.