Jope 18 - Vakavakadewa Vou kei na iVola tale eso

Vosa o Vilitati: Sa Dau Totogitaki Ira na Daucaka Ca na Kalou

¹ A qai kaya o Vilitati na luve i Sua, ka kaya,

² I Jope, era na sega ni rawa beka ni tiko lo na mataqali tamata vakataki iko? Ke o muduka na nomu vosa ka vakarorogo, Keitou na rawa ni vosa vei iko.

³ A cava o nanuma kina ni keitou lialia me vaka na bulumakau?

⁴ O sa vakararawataki iko wale ga ena nomu cudru. Ena vakalalai beka o vuravura ena vukumu? Era na kau tani beka na veiulunivanua ena vukumu?

⁵ Ena bokoci na cina ni tamata ca; Ka na sega ni caudre tale na kena yameyame.

⁶ Ena vakabutobutotaki na cina ena nona valelaca.

⁷ A kaukauwa vinaka tu eliu na nona cavuyava, Ia oqo e sa tatavutuvutu ga; Sa mani bale sara Ni sa kati koya ga vakai koya na nona i vakasala.

⁸ Sa butuka yani e dua na lawa Ka mani coko kina na yavana;

⁹ sa tacori na bukubuku ni yavana Ena dua na dai ka vesuki koya.

¹⁰ Sa vunitaki koto e dela ni qele e dua na kena dai; Io, sa vakotori koto e dua na dai ena nona gaunisala.

¹¹ Sa wawa wavokiti koya tu na veivakarerei; Ka sa muria tiko na nona i kalawa yadua.

¹² E a vutuniyau e liu o koya, Ia ena gauna oqo e sa viakana voli; Sa tu ka wawa voli e yasana na veivakarusai.

¹³ Sa teteva na yagona e dua na mate rerevaki, Ka vakavuna me vuca na ligana kei na yavana.

¹⁴ Sa cavuivuvutaki mai na valelaca e a tiko vakaruru kina, Ka yarataki yani ki na mata ni tui ni mate.

¹⁵ Ia ena gauna oqo, Sa rawa ni tawana e dua ga na tamata Na nona valelaca — Ia me vakamiraki taumada kina na sulifure Me vakawainimatetaki kina!

¹⁶ Sa qai malai ka madu sara na wakana kei na veitabana.

¹⁷ Sa qai mudu na nona rogo ena nona vanua Kei na veivanua tani; Ka sega ni dua me qai nanumi koya tale.

¹⁸ Ena qai vakasevi tani o koya mai na nodra vanua na bula tiko, Ka vakasevi tani mai na rarama ki na butobuto.

¹⁹ Sa sega na nona kawa, sa sega na kena i sosomi.

²⁰ Ia o ira kecega era rogoca na ka sa yaco vua, Mai na tokalau ki na ra, Era na sokonu ka sautaninini ena rere.

²¹ Oqo na kedra i tinitini na tamata ca, Se na ka ena yaco vei ira era sega ni kauwaitaka na Kalou.