Jope 17 - Vakavakadewa Vou kei na iVola tale eso

¹ Sa voleka sara ni oti na noqu bula. Sa dredre sara me'u cegu vakavinaka; Sa sega tale na ka e vo tiko vei au, Na i bulubulu ga.

² Au sa vakaraica tiko Na levu ni nodra vakalialiai au na tamata.

³ Kemuni na Kalou, oi au na tamata dina. Ni vakadinata na noqu vosa. Sa sega tale ni dua me na tokona na ka au sa tukuna.

⁴ O ni sa sogota na veika mai na nodra vakasama; Ni kakua ni laivi ira me ra vakalevulevui au ena gauna oqo.

⁵ O koya sa veilalitaka na nona i tokani Me rawata kina na i lavo Era na qai leqa ga kina na luvena.

⁶ Ena gauna oqo, era sa vakayagataka vei au Na vosa vakaibalebale oqo; Ni ra rogoca na tamata, Era qai lako mai ka mai kasivita na mataqu.

⁷ Na noqu rarawa sa buwawa mai kina na mataqu; Ka sa vaka ga na i yaloyalo ni ka Na lila ni ligaqu kei na yavaqu.

⁸ Era sa kurabui o ira era kaya tiko ni ra sa tamata dina, Ka ra beitaki au kecega ni'u lecava na Kalou.

⁹ O ira era kaya tiko ni ra tamata rokovi, Sa kaukauwa cake tikoga na nodra vakabauta ni ra sa dodonu tiko.

¹⁰ Ia kevaka era lako kece mai ka mai tu e mataqu, Au na sega ni kunea rawa e duabau vei ira ni tamata vuku.

¹¹ Sa sivi yani na noqu veisiga; Sa vodi na noqu i naki; Sa yali na noqu i nuinui.

¹² Ia o iratou na noqu i tau E ratou kainaka ni bogi na rarama ni siga; E ratou kaya ni sa voleka mai na rarama, Ia oi au, au sa tiko ga ena butobuto.

¹³ Sa noqu i nuinui duadua ga na nodra vuravura na mate, Na vanua au na la'ki davo koto kina ka moce ena butobuto.

¹⁴ Au na qai kaya ni sa tamaqu ga na i bulubulu, Ka tinaqu ka ra ganequ na baca ni qele era kania na yagoqu.

¹⁵ Sa qai evei na ka me'u vakanuinui kina? O cei sa kunea rawa na ka au sa nuitaka?

¹⁶ Ni'u sa lako ki na nodra vuravura na mate, Ena sega ni salavata kei au na vakanuinui.