Jope 16 - Vakavakadewa Vou kei na iVola tale eso

Vakadeitaka o Jope na Nona Tawa Cala

¹ A qai vosa o Jope, ka kaya,

² Na vosa vaka oqori au sa rogoca oti e liu; Na veivakacegui o dou sa mai solia E veivakararawataki wale ga.

³ O dou sa na vosa tiko beka ga Ka sega ni mudu rawa? Mo dou na dau tauca beka ga oi kemudou Na i otioti ni vosa?

⁴ Kevaka mada me datou veisau, Mo dou vakataki au o kemudou, Ena rawa sara ga vei au me'u tukuna Na ka kecega o dou tukuna tiko. Au rawa ni kureitaki ulu vakavuku Ka vakaluvuci kemudou ena levu na vosa.

⁵ Au na rawa ni vakaukauwataki kemudou ena vosa ni vakasala Ka tauca tikoga na vosa mo dou vakacegui kina.

⁶ Ia sa sega ga ni yaga na ka au sa tukuna voli. Na tiko vagagalu talega Ena sega sara ni vukea na noqu mosi.

⁷ Kemuni na Kalou, o ni sa vakaocai sara ga o kemuni; O ni a vakalaiva me ra vakamatei na noqu vuvale.

⁸ O ni sa vesuki au. Oi kemuni na kequ meca. Au sa lila sara ga ka suivotu, Ka ra sa vakabauta na tamata Ni oqo na i vakadinadina ni noqu cala.

⁹ Ena levu ni cudru ni Kalou sa qai basuraki au; Ka vakawaqa vei au na matana ni cudru.

¹⁰ Era vakadudu gusu ka vakidi ucu vei au na tamata; Era oso wavokiti au ka ra sabaka na mataqu.

¹¹ Sa soli au na Kalou vei ira na tamata ca.

¹² Au a tiko voli ena vakacegu, Ka qai taura vakaukauwa na domoqu na Kalou Ka buturaki au, ka vorolaki au. Sa vakayagataki au o koya me'u nona takete ni vuli vana

¹³ Me qai vanalaki au mai na veiyasana kecega ena dakaititi Ena gasau ni dakaititi era cobacoba vei au Ka vakamavoataki au. Ia ni sa vaka tu oqori, E sega ga ni bau vakaraitaka vei au na nona loloma.

¹⁴ Sa vakamavoataki au mada, Ka sa vakamavoataki au tale; Ni sa vaka sara ga e dua na sotia Sa lialia ka sinai ena cudru.

¹⁵ Au sa vakaloloku tiko ka vakaisulu ena i sulu taga, Ka'u sa qai mai dabe tiko ena kuvu ni qele eke, Ka'u sa vakamalumalumutaki sara ga.

¹⁶ Au a tagi tiko ka yacova ni damudamu mai na mataqu, Ka vuvuce na dakudaku ni mataqu, Ka levu na i yaloyalo ni ka e ra tu wavoki e mataqu,

¹⁷ Ia au a sega ga ni vakayacora e dua na i tovo kaukauwa, Kei na noqu masu talega vua na Kalou e masu dina sara ga.

¹⁸ O iko, na qele, mo kakua sara ni vunia na ca sa caka vei au! Kakua sara ni vakalaiva me vagalui Na noqu kaci ni vakasaqara na lewa dodonu!

¹⁹ E dua e tiko mai lomalagi Ena tucake ena vukuqu me totaki au.

²⁰ Au vinakata me raica na wai ni mataqu na Kalou Ka rogoca talega na noqu masu.

²¹ Au sa vinakata e dua me cikecike vua na Kalou ena vukuqu, Me vaka e dua na tamata ka cikecike ena vuku ni wekana.

²² Sa sivi tiko yani na noqu veiyabaki, Ka'u sa lakova tiko oqo na sala ena sega ni lesuvi tale mai.