Jope 15 - Vakavakadewa Vou kei na iVola tale eso

Vosa o Elifasi

¹ A qai vosa o Ilivasi na kai Temani, ka kaya,

² Na nomu vosa, Jope, sa rui tawa yaga! Sa sega sara ga na betena!

³ E sega na tamata vuku e vaka tu oqori na nona i vosavosa, Se me sasabai ena vosa e sega na kena i balebale.

⁴ O iko o sa vakayalolailaitaki ira tiko na tamata me ra kakua Ni rerevaka na Kalou; Ka tarovi ira me ra kakua ni masu vua.

⁵ Na i valavala ca ni lomamu Sa i koya sara ga sa vosa tiko mai oqori; O iko o tovolea wale tikoga me nomu i vunivuni na vosa qaseqase.

⁶ E sega na betena vei au me'u beitaki iko mo ca; Ni sa beitaki iko ga mo ca Na vosa yadua sara ga o sa tauca tiko mai.

⁷ O nanuma beka ni o iko na i matai ni tamata ka sucu mai? O a tiko beka ena gauna ka bulia kina na Kalou na veiulunivanua?

⁸ O a rogoca butako beka na i naki vuni sa cakava na Kalou? E nomu duadua beka ga na vuku vakatamata?

⁹ E sega ni dua na ka o kila me keitou lecava.

¹⁰ Na neitou vuku keitou a vulica mai vei ira sa sikoa na uludra, O ira na qase era a sucu e liu vei tamamu.

¹¹ Sa surevaka tiko vei iko na Kalou na vakacegu; A cava na vuna o besetaka tiko kina? Keitou vosa tiko oqo ena vukuna Ena vosa malumu ka tau vakamalua.

¹² Ia o iko o sa qai tavaiyaya ka wadravi keitou Ena mata cudrucudru.

¹³ O sa cudruva na Kalou ka vosacataki koya.

¹⁴ E rawa beka ni dua na tamata sa savasava sara ga vakaoti? E rawa beka ni dua sa dodonu sara vua na Kalou?

¹⁵ Mo kila sara, ni Kalou sa sega mada ga ni vakabauti ira na nona agilosi; Ka ni o ira sara mada ga era sega ni savasava sara e matana.

¹⁶ Sa nodra mesamesa na tamata na cakava na i valavala ca; Ka sa vaka wale tu ga na gunu wai vei ira. Io, sa tauvi dukadukali na tamata; Ka sa tawa yaga sara ga o koya.

¹⁷ I Jope, mo vakarorogo mada ki na ka au kila.

¹⁸ Era a vakavulici au na tamata vuku ena veika dina, Era a vulica mai vei ira na tamadra, Ka sega sara ga ni dua na ka vuni era a bau vunia.

¹⁹ Ia me vaka ni sega sara na kai tani e a bau tu ena nodra vanua, Sa mani sega kina ni dua e vagolei ira tani mai vua na Kalou.

²⁰ Na tamata ca ka dau vakasaurarataki ira na tani Ena nona ga na leqa ena gauna taucoko ni nona bula.

²¹ Ena qoqolou tikoga e daligana na domo ni veivakarerei, Ia ena gauna sara ga sa nanuma kina o koya ni sa vakarurugi Era sa qai buturaki koya na daubutako.

²² Sa sega sara ni dro tani rawa o koya mai na butobuto, Ka ni dua dina ga na vanua sa waraki koya tiko kina E dua na i seleiwau me vakamatei kina,

²³ Ka ra sa wawa voli na ikeli me ra kania na yagona. Sa kila tu o koya ni nona gauna mai muri ena butobuto sara ga;

²⁴ Na veivakarusai levu, me vaka e rawa ni cakava e dua na tui, Sa wawa tiko me ravuti koya.

²⁵ Oqori na ka ena nona i tinitini Na tamata ka buli i vacu vua na Kalou, Ka bolea na veivala kei koya na Kaukauwa.

²⁶ Na tamata oqori sa rui viavialevu ka dauveivorati;

²⁷ Sa dulaka cake vakadomoqa na nona i sasabai Ka cici yani me rau vala kei na Kalou.

²⁸ Na tamata oqori sa vakadruka na veikoro lelevu Ka kovea na veivale era sa dro oti na kena i taukei. E tamata urouro ka vutuniyau; Ia na i valu ga ena qai vakarusa na veikoro lelevu kei na veivale oqori.

²⁹ Ena sega ni dede na nona vutuniyau na tamata oqori; Ka sega na ka e taukena ena tudei. Na kena rugurugua sara talega ena yali yani,

³⁰ Ka na sega ni dro tani rawa o koya mai na butobuto. Ena qai tautauvata ga o koya kei na dua na vunikau Sa kama na veitabana ena bukawaqa, Ka ra cagina tani na sena ni liwava na cagi.

³¹ Kevaka e rui tamata lialia ka vakararavi ki na ka ca Ia na ka ca sara ga, sai koya ena tauca o koya.

³² Ni bera ni oti na nona gauna, e sa na malai ga mai, Ena malai me vaka e dua na taba ni kau Ka na sega ni drokadroka rawa tale.

³³ Ena tautauvata o koya kei na dua na vunivaini Sa lulutu na vuana ni ra sa bera ni dreu; Ka vaka e dua na vuniolive e sega sara ga ni bau vua vakadua.

³⁴ Era na sega ni vakawa na tamata lecava na Kalou, Ka vakarusai ena bukawaqa Na veivale era tara ena veitemaki ca.

³⁵ Oqo o ira na tamata dau nakita na veivakaleqai ka cakava na ka ca; Ka sa dau sinai tu ga na lomadra ena veivakacalai.