Jope 14 - Vakavakadewa Vou kei na iVola tale eso

¹ Na i lakolako ni bula ni tamata e tautauvata ga, Ena kena rui leleka ka voravora.

² Era tautauvata ga kei na senikau Ena totolo ni nodra se mai ka mira tale yani; Ka ra yali yani me vaka na o cagina tani.

³ Kemuni na Kalou, o ni na bau galeleta beka na raici au, Se mo ni kauti au yani ki matamuni me'u la'ki lewai?

⁴ E sega sara na ka savasava e rawa ni taka mai na dua na Ka dukadukali vaka na tamata.

⁵ Na balavu ni nona bula e dua Kei na i wiliwili ni veivula me bula tiko kina, Sa lewai rawa tu ni bera na nona sucu mai. O ni sa vakataulewa oti tu ena ka oqori, Ka sa sega sara ni veisautaki rawa.

⁶ Ni gole tani mai vua ka laivi koya me lewai koya; Ni laivi koya me bau marautaka mada Na nona bula ni cakacaka vakaukauwa.

⁷ Na vunikau sa musu oti sa sega ni mate sara; Ena rawa ni bula cake tale ka vakadrauna.

⁸ E dina ga ni ra sa qase sara na wakana, Ka mate sobu ki qele na vuna,

⁹ Ia kevaka e domica rawa na wai, ena qai tubu tale ka Vakadrauna me vaka e dua na vunikau gone.

¹⁰ Ni sa mate e dua na tamata, Sa i koya sara ga oqori na kena i otioti; Sa mate o koya, Ka sa na qai tiko tale beka e vei?

¹¹ Ena yaco mai na gauna me ra maca kina na veiuciwai, Ka ra na maca talega na veiwasawasa.

¹² Ia ena segasega sara ni tucake tale na tamata sa mate; Era na sega sara ni yadra ka yacova na i vakataotioti; Era na sega sara ni yavala mai na nodra sa moce koto.

¹³ Au sa gadreva dina mo ni la'ki vunitaki au bulabula Ena nodra vanua na mate; Me'u la'ki vunitaki tu Me yacova ni sa oti na nomuni cudru, Ka mo ni qai lokuca ga na gauna Mo ni qai nanumi au tale kina.

¹⁴ E rawa beka ni bula tale e dua na tamata Kevaka sa mate oti? Ia o au, au sa na waraka sara ga na gauna e bau vinaka cake; Me'u wawa me yacova sara ni sa oti na gauna ni leqa oqo.

¹⁵ Oti o ya, au sa na qai rogo mai ni o ni kaci yani, Mo ni na qai rekitaki au, oi au na nomuni ka buli.

¹⁶ O ni sa na qai vakaraica vakavinaka na i cavucavu ni yavaqu, Ia o ni na sega ga ni vakasaqara na noqu i valavala ca.

¹⁷ O ni na bokoca na noqu i valavala ca ka kauta laivi sara; Ka bokoca laivi kecega na ca au a cakava oti.

¹⁸ Ena yaco mai e dua na gauna me ra na babale kina na veiulunivanua, Ka ra tosoi laivi talega na veibari ni vatu.

¹⁹ Ena vakavurumemeataka na veivatu na kaukauwa ni wai, Ka na qeqeta laivi yani na qele na uca tau bi; Ia sa vaka oqori na nomuni vakarusa Na ka ni bula sa vakanuinui kina na tamata.

²⁰ E dua na tamata o ni sa vakamalumalumutaka Ka kauti koya laivi sara vakadua; Sa mate ka sa veidreyaki na matana.

²¹ E ratou rawa i covi ni veidokai na luvena, Ia na ka oqo e sa sega ni kila o koya, Ka na sega talega ni kila kevaka e ratou vakamaduataki.

²² Na ka wale sara ga e vakila o koya sai koya na momosi ni Yagona kei na rarawa ni lomana.