Jope 13 - Vakavakadewa Vou kei na iVola tale eso

¹ Na veika kece oqo sa raica na mataqu, Ka sa rogoca na daligaqu ka sa kila.

² Na ka dou sa kila, au sa kila talega, Ka'u sa sega ni lolovira sobu mai vei kemudou.

³ Sa gadreva na yaloqu me'u vosa vei Koya sa Kaukauwa, Ka veiletitaka na noqu kisi kei na Kalou.

⁴ Dou sa ubia na nomudou lecaika ena vosa lasu; Dou sa vakataki ira na vuniwai sa sega ni vakabula rawa e dua.

⁵ Kevaka wale ga mo dou vakadigagalu! Ena vukumudou, o ya na yalomatua.

⁶ Dou rogoca mada me'u tasereka na noqu kisi; Ka vakarogoca na kerekere ni tebenigusuqu.

⁷ A cava na vu ni nomudou lasu? Dou nanuma beka ni na yaga vua na Kalou na nomudou lasu?

⁸ Dou tovolea tiko li mo dou tovaka na Kalou? Dou na veiletitaka li na nona kisi ena mataveilewai?

⁹ Kevaka e raici kemudou matua na Kalou, Ena bau kunea kina li e dua na ka vinaka? Dou nanuma beka ni dou na rawa ni vakalialia na Kalou, Me vaka na nomudou vakalialiai ira na tamata?

¹⁰ Ena vunauci kemudou vakaidina, Kevaka dou sa cakacaka lo vakatawadodonu.

¹¹ Ena sega li ni vakarerei kemudou na nona cecere? Ena sega li ni lutuki kemudou na yalo ni rerevaki koya?

¹² Sa tawayaga me vaka na dravusa na nomudou i vakasala; Ka malumalumu me vaka na qele ni tuli kuro na nomudou i vakamacala.

¹³ Dou vagagalu mada ka vakalaivi au me'u vosa, Ka mo dou kakua ni leqataka na kena i soqoni.

¹⁴ A cava na vuna me'u biuti au kina ena dua na vanua dredre Ka vakavuna ga na noqu mate vakataki au?

¹⁵ Sa yali kece na noqu vakanuinui, ka cava ena yaco ke vakamatei au na Kalou? Au na vakaraitaka ki vua na ka me baleti au.

¹⁶ De lakolako ena vakabulai au na noqu yalo doudou, Ni sa sega na tamata ca me torovi koya rawa na Kalou.

¹⁷ Dou vakarorogo vinaka mada ki na noqu vosa, Kei na noqu vakatutu ki na daligamudou.

¹⁸ Sa vakarau me'u tukuna na ka e baleti au, Baleta ni'u kila ni'u sa caka dodonu.

¹⁹ Ena rawa li ki vua e dua me beitaki au ena cala eso? Kevaka sa vakakina, au sa tu vakarau me'u vagagalu ka mate yani.

²⁰ Ia mo ni solia ga vei au e rua na ka, kemuni na Kalou, Ka'u na qai sega ni vuni kina mai vei kemuni.

²¹ Mo ni muduka mada na nomuni totogitaki au tiko, Ka me kakua ni vakarerei au na veika rerevaki mai vei kemuni.

²² Kemuni na Kalou, ni vosa mai e liu, ka me'u qai sauma yani. Se me'u sa vosa yani, ka mo ni qai sauma mai.

²³ Na cala kei na i valavala ca cava soti au sa vakayacora? Ni vakatakila mada mai na noqu talaidredre kei na noqu malumalumu?

²⁴ A cava na vuna o ni sa vunia kina na matamuni? Ka wiliki au me'u kemuni meca?

²⁵ O ni na vakacacana beka e dua na draunikau sa cagina? Se vakacemuria e dua na draunico madu?

²⁶ O ni sa vola na veibeitaki wiwi me baleti au, Ka vakavuna me'u taukena na noqu i valavala ca ni tabagone.

²⁷ O ni sa vesuka na yavaqu ena sinucodo; Ka wanonova matua na noqu cavuikalawa kece, Ka vakadigova na we ni yavaqu.

²⁸ Ena ka oqo, au sa karusa kina me vaka na kau vuca, Me vaka na i sulu sa kania na sarasara.