Jope 12 - Vakavakadewa Vou kei na iVola tale eso

Vosa o Jope: Sa Levu na Noqu Veiwalitaki

¹ A vosa o Jope, ka kaya,

² E sega ni vakabekataki ni o kemudou na domodra na tamata. Ia ena gauna dou sa mate kina, dou na mate vata kei na vuku.

³ Na noqu yalomatua sa tautauvata ga kei na nomudou; Ka'u sega sara ni toro sobu vei kemudou ena dua na ka; Ia na ka kece sara ga dou sa tukuna oti era sa kila tu na tamata kecega.

⁴ E dina ga ni'u yalododonu tu ka sega na ka au sa bau beitaki kina, Ia o iratou sara ga na noqu i tau E ratou sa mate ena veiwalitaki au; Ia ena dua na gauna e a dau sauma tiko mai kina na noqu masu na Kalou.

⁵ O kemudou e sega na nomudou leqa, Ia o dou qai mai veiwalitaki au tiko; O dou vacuka tiko e dua sa vakarau tiko me bale.

⁶ Ia o ira na daubutako kei ira na lecava na Kalou Era tu vinaka sara tu ga, Ka nodra kalou duadua wale sara ga na nodra kaukauwa.

⁷ E vuqa sara na ka ena rawa ni ra vakavulici kemudou kina Na manumanu vuka kei na manumanu yava i va;

⁸ Dou kerei ira na manumanu ni vanua mamaca kei ira mai wasawasa Me mai nomudou na nodra vuku.

⁹ Era kila kece tu na manumanu ni liga i Jiova ga sa buli ira.

¹⁰ Na Kalou ga sa lewa na i lakolako ni nodra bula Na manumanu kei na tamata; Ka tu sara ga ena nona kaukauwa na bula ni tamata yadua.

¹¹ Ia me vaka ga ni dau taleitaka na yamemu na tovolea na kakana, Sa taleitaka vaka talega kina na daligamu me dau vakarorogo ki na vosa.

¹² Sa tu na vuku vei ira na qase, Kei na yalo matau vei ira sa vuqa nodra siga.

¹³ Sa tu na rai yawa vei ira na qase; Ia sa tu vua na Kalou na rai yawa Kei na kaukauwa me vakayaco ka kina.

¹⁴ Ni sa basuraka sobu na Kalou, o cei ena qai tara vou tale; Se o cei ena sereka rawa na tamata sa biuta ki vale ni veivesu na Kalou?

¹⁵ Ena yaco na dausiga ni sega ni vakatauca na uca na Kalou; Ka na coka mai na dobui ni dolava na wai o koya.

¹⁶ Sa kaukauwa sara na Kalou Ka sa dau qaqa ena veigauna kecega, Ka rau vakarorogo ruarua ki na nona lewa O koya e dauveivakaisini kei koya e vakaisini.

¹⁷ Sa vakarusa na Kalou na nodra vuku na turaga, Ka vakasesea na nodra cakacaka na i liuliu Me vaka na cakacaka ni tamata lialia.

¹⁸ Sa vakasivoi ira na tui ka biuti ira me ra kaivesu;

¹⁹ Ka vakalolovirataki ira na bete kei ira na daulewa ka.

²⁰ Sa vagalui ira na tamata nuitaki, Ka kauta laivi na nodra vuku na qase.

²¹ E vakamaduataki ira na tu ena i tutu ni kaukauwa, Ka muduka vakadua na nodra kaukauwa na turaga.

²² E vakacilava yani o koya na rarama ki na veivanua ni yaloyalo ni mate.

²³ Sa vakaukauwataki ira na veimatanitu me ra qaqa ka rogo, Ia e muri, a qai vakamalumalumutaki ira ka vakarusai ira sara.

²⁴ Sa qai vakalialiai ira na i liuliu ni veimatanitu oqori o koya, Ka cakava me ra veilakoyaki vakaveitalia, Me ra veilecayaki ka mani lako sese;

²⁵ Ka ra vakayayamo voli ena butobuto ka ra tatabalebale Me vakataki ira na daumateni.