Jope 11 - Vakavakadewa Vou kei na iVola tale eso

Vosa i Sofa: Na Cala i Jope e Ganita me Totogitaki

¹ A qai sauma o Sofa na kai Neama, ka kaya,

² E sega beka ni dua me na sauma rawa na vosa lialia oqo? Ena vakadodonutaka rawa beka e dua na tamata na levu ni vosa e cakava?

³ O nanuma beka, Jope, ni keitou na sega ni sauma rawa na nomu vosa? Me na vagalui keitou li na nomu vosa ni veivakalialiai?

⁴ O suguraka tiko ni dina na ka o tukuna; O qai tukuna ni o sega na nomu cala ena mata ni Kalou.

⁵ Au diva ga me sauma sara ga vei iko na Kalou na nomu vosa!

⁶ Ena tukuna vei iko ni vuku e vuqa tu na kena basoga; Era tu na veika titobu ka dredre ni kila na tamata. E lailai tiko na i totogi e solia vei iko na Kalou mai na ka e dodonu mo sotava.

⁷ E rawa beka ni o bau raica na i yalayala ni vanua E yaco kina na rogo levu ni Kalou kei na nona kaukauwa?

⁸ Na macawa e cake e curu basikata o koya, Ia o iko o sega sara ga ni bau yacova rawa. E kila na Kalou na nodra vuravura na mate, Ia na vuravura oqori o sega sara ni kila o iko.

⁹ Na kilai levu ni Kalou e sivia na raraba ni vuravura, Ka raraba cake mai na wasawasa.

¹⁰ Ke vesuki iko ka veilewaitaki iko na Kalou, O cei ena tarovi koya rawa?

¹¹ E kilai ira vinaka na Kalou na tamata sega na betedra; Ka raica rawa na ca kecega era cakava.

¹² Kevaka sara era sa manoa na luve ni asa ni veikau ni ra Sa qai sucu mai, era sa na qai yalomatua rawa na tamata lialia.

¹³ Vakadodonutaka mada na lomamu, Jope. Dodo liga yani vua na Kalou.

¹⁴ Biuta tani na i valavala ca kei na ka cala mai na nomu vale.

¹⁵ Ni oti oqori, mo qai tudei sara ka yalo qaqa Mo veiqaravi tale kei na vuravura.

¹⁶ Sa na qai seyavu na nomu leqa kecega mai na nomu nanuma, Me vaka na dobui sa sivi ka guileca sara yani.

¹⁷ Ena qai daumaka cake na nomu bula Mai na rarama ni siga ena sigalevu tutu, Ka na qai rarama mai me vaka na kida ni mataka Na gauna ni oca kei na vakaloloma levu duadua ena nomu bula.

¹⁸ O sa na qai tiko vakacegu ka sinai ena vakanuinui; Ka sa qai viribaiti iko ka vakacegui iko na Kalou.

¹⁹ O na sega ni rerevaka e dua na meca; Ka na vuqa sara na tamata era na mai kere veivuke vei iko.

²⁰ Era sa na qai veiraiyaki tu na tamata ca ena nuiqawaqawa, Ia era sa sega ni kunea na sala me ra dro rawa kina. Na nodra i nuinui duadua ga sai koya me yaco mai o mate.