Joni 8 - Vakavakadewa Vou kei na iVola tale eso

Na Yalewa ka a Vesu ni Veibutakoci Tiko

¹ Era sa qai lako ki na nodra veivale na tamata, ia sa lako ga o Jisu ki na Ulunivanua ni Veiolive.

² A sa lesu tale ki na Valenisoro o koya ena mataka lailai ni siga ka tarava. Era sa soqoni vata yani vua na tamata kecega; ka sa dabe sobu ka tekivu vakatavulici ira.

³ Era sa qai kauta yani vua o ira na daunilawa kei ira na Farisi e dua na yalewa sa vesuki mai ni sa veibutakoci, ka ra vakaturi koya ena kedra maliwa.

⁴ Era sa qai kaya vua, “Vakavuvuli, sa vesu mai na yalewa oqo ni se ia tiko na veibutakoci.

⁵ Ena noda Lawa, sa vakarota kina o Mosese me ra vakaviriki o ira era cakava na ka oqo. Ia, na cava o sa kaya kina?”

⁶ Era sa kaya oqo me ra veretaki koya ka beitaki koya rawa kina. Ia sa cuva ga o Jisu ka volavola ena buturara ni vale (nuku) ena nona i qaqalo.

⁷ Ni ra se tucake tu ga e kea ka vakatarogi koya tiko, a sa qai tu cake vakadodonu o koya ka kaya vei ira, “O koya vei kemuni e sega na nona i valavala ca, me viritaka na i matai ni vatu.”

⁸ A sa qai cuva sobu tale ka volavola ena buturara ni vale.

⁹ Ia ni ra sa rogoca oqo, era sa qai curucuru yadudua yani ki tautuba, ka tekivu sara ga vei ira na qase. E rau sa qai mai vo tikoga e kea o Jisu kei na yalewa o ya.

¹⁰ Sa qai tu cake o Jisu, ka kaya vua, “Yalewa, sa evei o ira oqo? Sa sega tale li ni dua e vo me lewai iko mo cudruvi?”

¹¹ Sa qai sauma lesu na yalewa ka kaya, “Sa sega saka ni dua e vo.” Sa qai kaya o Jisu, “Oi au talega sa sega ni lewai iko mo cudruvi. Mo lako ga, ia mo kakua ni valavala ca tale.”

O Jisu na Rarama kei Vuravura

¹² Sa qai vosa tale vei ira na Farisi o Jisu, ka kaya, “Oi au na rarama kei vuravura. O koya yadua sa muri au ena tiko vua na rarama ni bula ka na sega ni lako ena butobuto.”

¹³ Era sa qai kaya vua na Farisi, “O iko o sa tukuni iko tikoga; sa sega ni dina na veika o tukuna tiko.”

¹⁴ A sauma o Jisu, ka kaya vei ira, “E segai sara. E dina ga ni'u sa tukuna tikoga na veika me baleti au, ia sa dina ga na noqu i tukutuku, baleta ni'u sa kila na vanua ka'u sa lako mai kina kei na vanua au sa lako tiko kina. Oi kemuni o ni sa sega ni kila na vanua ka'u sa lako mai kina se na vanua au sa lako tiko kina.

¹⁵ O ni sa dau vakalewa na ka ena sala vakatamata; ia, oi au, au sa sega ni vakalewa e dua na tamata.

¹⁶ Ia kevaka me'u vakayacora vakakina, ena dina ga na noqu vakalewa na ka, baleta ni'u sa sega ni vakayacora duadua vakai au na ka oqo; na Tamaqu ka sa talai au mai sa tiko vata kei au.

¹⁷ Sa volai tu ena nomuni Lawa ni sa dina na i tukutuku kevaka sa vakadonuya vata e lewe rua na i vakadinadina.

¹⁸ Au sa vakadinadinataka na ka ena vukuqu, ka sa vakadinadina talega ena vukuqu na Tamaqu sa talai au mai.”

¹⁹ Era sa qai tarogi koya, “E vei ga o tamamu?” Sa qai sauma o Jisu ka kaya, “O ni sa sega ni kilai au se Tamaqu. Kevaka o ni sa kilai au, o ni na kilai Tamaqu talega.”

²⁰ Sa cavuta na veivosa oqori o Jisu ni sa vakatavuvuli tiko ena loma ni Valenisoro, ena rumu ka dau maroroi kina na kato ni soli. Ia sa sega ni dua e vesuki koya, baleta ni se bera ni yaco mai na nona gauna.

Dou na Sega ni Lako Rawa ki na Vanua Au sa Lako Tiko Kina

²¹ Sa qai kaya tale vei ira o Jisu, “Au sa lako tiko ena noqu i lakolako; o ni na qai vakasaqarai au, ia o ni na mate ena vuku ni nomuni i valavala ca; o ni na sega ni lako rawa ki na vanua au sa lako tiko kina.”

²² Era sa qai kaya kina na nodra i liuliu na Jiu, “E tukuna o koya ni da na sega ni rawa ni lako rawa ki na vanua sa lako kina. E kena i balebale beka oqo ni na vakamatei koya ga vakai koya?”

²³ Sa qai kaya vei ira o koya, “Oi kemuni, o ni lewe ni vuravura ka tiko oqo e ra, ia oi au, au lako mai cake. Oi kemuni, o ni lako mai na vuravura oqo, ia oi au, au sega ni lako mai kina.

²⁴ O koya oqo au sa kaya kina vei kemuni ni o ni na mate ena vuku ni nomuni i valavala ca; ka o ni na mate ena vuku ni nomuni i valavala ca kevaka o ni sa sega ni vakabauta ni sai au o Koya.”

²⁵ Era sa qai kaya vua, “O cei o iko?” Sa qai kaya vei ira o Jisu, “Na ka ga au sa tukuna vei kemuni mai na i vakatekivu.

²⁶ E vuqa tu na ka me'u tukuna ka vakalewa me baleti kemuni, ia sa dina o koya ka a talai au mai; ka'u sa tukuna ki vuravura na ka ga au a rogoca mai vua.”

²⁷ Era a sega ni kila rawa ni a vosa tiko o Jisu me baleti Tamana.

²⁸ Sa qai kaya tale vei ira o koya, “Ni o ni sa na laveta cake na Luve ni Tamata, o ni na qai kila ni Sa i Au oi Au; o ni sa na qai kila talega ni sega ni dua na ka me'u cakava vaka i au ga. Ia au sa dau tukuna ga na veika e vakatavulici au kina o Tamaqu.

²⁹ Sa tiko vata ga kei au o koya ka a talai au mai; e sega ni biuti au me'u tiko duadua ga; ni'u sa dau cakava tikoga na ka e vinakata.”

³⁰ Era a mani vakabauti koya e lewe vuqa vei ira era a rogoca na nona vosa.

Na Dina ena Veisereki me Rawati na Bula Galala

³¹ Sa qai kaya o Jisu vei ira na Jiu ka ra sa vakabauti koya, “Kevaka o ni muria tikoga na noqu vosa, o ni sa qai noqu tisaipeli dina;

³² ka o ni na kila na ka dina, ka na sereki kemuni na ka dina.”

³³ Era sa qai kaya vua, “Oi keimami na kawa i Epara-ama; keimami a sega ni bau bobula vua e dua na tamata ena dua na gauna. A cava na i balebale ni nomu kaya, ‘O ni na sereki’?”

³⁴ Sa qai kaya vei ira o Jisu, “Au sa tukuna vakadodonu sara vei kemuni, o koya ga sa kitaka na i valavala ca sa bobula ki na i valavala ca.

³⁵ Sa sega ni lewe ni vuvale tudei o koya na bobula, ia na luvena tagane ga na i taukei ni vale o ya sa lewe ni vuvale tudei ka tawamudu.

³⁶ O koya oqo, kevaka sa sereki kemuni na Luvena, o ni sa na qai sereki dina sara kina.

³⁷ Au sa kila ni o ni kawa i Epara-ama. Ia o ni sa via vakamatei au tiko, baleta ni o ni sa sega ni vakadinata na noqu vosa.

³⁸ Au sa dau tukuna ga na veika sa vakaraitaka mai vei au o Tamaqu, ia e dodonu vei kemuni mo ni sa cakava na veika o ni sa rogoca mai vei tamamuni.”

Na Tamamuni na Tevoro

³⁹ Era sa qai vosa ka kaya vua, “Na tama i keimami o Epara-ama.” Sa qai kaya vei ira o Jisu, “Kevaka o ni sa luve i Epara-ama dina, ke o ni na kitaka na veika sa cakava o Epara-ama.

⁴⁰ Na ka ga au sa bau kitaka, o ya me'u tukuna na veika dina au a rogoca mai vua na Kalou, ia oi kemuni, o ni sa via vakamatei au tiko. E a sega ni bau cakava e dua na ka vakaoqo o Epara-ama!

⁴¹ O ni sa cakava tikoga na ka sa cakava na tamamuni.” Era sa qai kaya vua, “Keimami a sega ni sucu mai ena veibutakoci. E duabau ga na tama i keimami, o ya ga na Kalou.”

⁴² Sa qai kaya vei ira o Jisu, “Kevaka e tamamuni dina na Kalou, ke o ni a lomani au, baleta ni'u sa lako mai vua na Kalou ka'u sa tiko oqo edaidai. Au a sega ni lako mai vakai au ga, ia sa talai au ga mai o koya.

⁴³ A cava o ni sega ni kila tiko kina na i balebale ni noqu vosa? E baleta ga ni o ni sa sega ni via vakarogoca.

⁴⁴ Na tamamuni na Tevoro, ka o ni sa gadreva mo ni cakava na veika sa gadreva na tamamuni. A sa daulaba mai na i vakatekivu o koya, e sega ni dau tovaka na dina, ka ni sega ga vua na dina. Ni sa tukuna o koya e dua na i tukutuku lasu, sa dodonu sara tu ga vua o ya, ka ni sa daulasulasu o koya ka sa vu mai vua na lasu kecega.

⁴⁵ Ia au sa tukuna tiko oqo na ka dina, ni sai koya o ya na vuna o ni sa sega kina ni vakabauti au.

⁴⁶ O cei vei kemuni e rawa ni vakadinadinataka ni tiko e dua na noqu i valavala ca? Kevaka au sa tukuna tiko vei kemuni na ka dina, a cava na vuna o ni qai sega ni vakadinati au kina?

⁴⁷ O koya sa lako mai vua na Kalou sa dau vakarorogo ki na vosa ni Kalou. Ia, oi kemuni, o ni sa sega ni lako mai vua na Kalou, ka oqori na vuna o ni na sega ni vakarorogo kina.”

O Jisu kei Epara-ama

⁴⁸ Era sa qai sauma na Jiu, ka kaya vua, “E sega li ni dina na neimami a kaya ni o kai Samaria, kei na neimami a kaya talega ni curumi iko tiko e dua na tevoro?”

⁴⁹ Sa qai kaya o Jisu, “E sega ni curumi au tiko na tevoro. Au sa vakarokorokotaki Tamaqu, ia o ni sa vakalialiai au ga.

⁵⁰ Au sa sega ni vakasaqara na noqu lagilagi, sa tiko e dua sa vakasaqara ka vakatau lewa kina.

⁵¹ Au tukuna vakadodonu sara vei kemuni, kevaka e dua e katona e lomana na noqu vosa ka talairawarawa kina, ena sega sara ni mate.”

⁵² Era sa qai kaya vua o ira na Jiu, “Sa qai macala vei keimami ni curumi iko dina tiko e dua na tevoro! Sa mate o Epara-ama; era sa mate talega na parofita; ia o iko, o kaya, ‘Kevaka e dua sa katona na noqu vosa ka talairawarawa kina ena sega sara ni mate.’

⁵³ O iko beka o cecere cake vei Epara-ama, na tama i keimami? Sa mate o koya ka ra sa mate talega na parofita; o nanuma tiko o cava o iko?”

⁵⁴ Sa qai sauma tale o Jisu, ka kaya, “Kevaka au vakalagilagi au ga, ena ka wale na noqu lagilagi; ia o Tamaqu, o koya o ni kaya tiko ni nomuni Kalou, o koya ga e vakalagilagi au.

⁵⁵ O ni sega ni kilai koya: ia au kilai koya oi au. Kevaka au na kaya ni'u sega ni kilai koya, au sa na wili vaka tamata lasulasu me vakataki kemuni; ia au sa kilai koya, ka sa katona ka muria tiko na nona vosa.

⁵⁶ E a marautaka vakalevu o Epara-ama, na tamamuni, ni a tiko me raica na gauna ni noqu lako mai. Ia sa mani raica ka reki kina.”

⁵⁷ Era sa qai kaya vua o ira na Jiu, “O sa raici Epara-ama dina? E se sega mada ga oqo ni o yabaki limasagavulu!”

⁵⁸ Sa qai kaya vei ira o Jisu, “Au tukuna vakadodonu sara vei kemuni, ni se bera ni sucu o Epara-ama, au sa bula tu oi au.”

⁵⁹ Era sa qai tomi vatu me ra vakaviriki koya, ia sa vunitaki koya o Jisu ka lako tani mai na Valenisoro.