Joni 7 - Vakavakadewa Vou kei na iVola tale eso

O Jisu kei Iratou na Tacina

¹ Ni sa oti na veika o ya, sa qai vakalakova o Jisu na veivanua eso e Kalili. E a sega ni via veilakoyaki e Jutia, baleta ni ra sa via vakamatei koya tiko na Jiu.

² A sa voleka tiko mai na gauna ni nodra Solevu ni Valetabanikau na Jiu,

³ ka ratou a mani kaya kina vua na tacina, “Lako tani eke ka lako ki Jutia, me ra na raica talega na nomu tisaipeli na cakacaka o cakava tiko.

⁴ Ni sega ni dua e dau cakava vuni tu ga na ka kevaka e gadreva tiko me kilai. Me vaka ni o sa cakava tiko na veika oqo, vakaraitaki iko ki vuravura.”

⁵ (Ka ni ratou a sega tale tikoga ni vakabauti koya o iratou na tacina.)

⁶ Sa qai kaya kina vei iratou o Jisu, “E se bera ni yaco mai na noqu gauna. Ia sa donu vei kemudou na gauna kecega.

⁷ E sega ni rawa ni cati kemudou o vuravura, ia sa cati au ga, baleta ni'u sa tukuna tikoga vua ni sa ca na nona i valavala.

⁸ Dou lako cake ga oi kemudou ki na solevu. Au na sega mada ni lako ki na solevu oqo, baleta ni se sega ni yaco mai na noqu gauna.”

⁹ Ni sa kaya oti na veika oqo vei iratou, sa qai tiko voli ga yani e Kalili.

O Jisu ena Solevu ni Vale Tabanikau

¹⁰ Ia ni ratou sa lako oti na tacina ki na Solevu, sa qai lako cake talega kina o Jisu; a sega ni lako ena matana levu, ia sa lako vakavuni ga.

¹¹ Era a vakasaqarai koya na Jiu ena Solevu, ka ra kaya, “E vei mada o koya?”

¹² A sa levu na veivosaki lo me baleti koya ena kedra maliwa na lewe vuqa. Era a kaya eso, “E tamata vinaka o koya.” Era kaya eso tale, “E sega, sa vakacalai ira tiko na tamata.”

¹³ Ia e sega ga ni dua sa vosa doudou me baleti koya, ni ra sa rerevaki ira na nodra i liuliu na Jiu.

¹⁴ Ni sa yacovi yani na veimama ni gauna ni Solevu, sa qai lako cake o Jisu ki na Valenisoro ka tekivu veivakatavulici kina.

¹⁵ Era sa kurabui kina na nodra i liuliu na Jiu, ka kaya, “Sa dua tani na levu ni kila-ka ni tamata oqo! E la'ki rawata tu beka mai vei, ni a sega tu ni vuli?”

¹⁶ Sa qai sauma vei ira o Jisu, ka kaya, “E sega ni noqu na i vakavuvuli au sa vakatavuvulitaka tiko vei kemuni, sa nona ga ka sa talai au mai.

¹⁷ Kevaka e dua na tamata e via cakava na loma ni Kalou, ena kila na i vakavuvuli, se sa lako mai vua na Kalou, se'u sa vosa tiko vakai au ga.

¹⁸ O koya e vosa ena nona kaukauwa ga vakai koya sa vakasaqara voli ga na ka me dokai kina. Ia o koya sa vakasaqara na dokai me soli vua sa talai koya mai, sa tamata dina o koya, ka sa sega vua na cala.

¹⁹ E sega li ni sa solia na Lawa vei kemuni o Mosese? Ia sa sega ga ni dua vei kemuni sa muria na Lawa. A cava na vuna o ni sa via vakamatei au tiko kina?”

²⁰ Era sa qai sauma mai na lewe vuqa ka kaya, “E tiko vei iko e dua na tevoro: o cei e via vakamatei iko?”

²¹ Sa qai sauma o Jisu ka kaya vei ira, “Au a cakava e dua na cakacaka mana, ia o ni a kurabui kece kina.

²² E a vakaroti kemuni o Mosese mo ni cilivi ira na luvemuni tagane (e dina ga ni a sega ni vu mai vei Mosese na veicilivi, mai vei ira ga na qase), ka o ni a mani ciliva e dua na gonetagane ena Siga ni Vakacecegu.

²³ Ia kevaka sa cilivi na gonetagane ena Siga ni Vakacecegu, me kakua kina ni voroki na Lawa i Mosese me baleta na veicilivi, a cava o ni qai cudruvi au kina ni'u a vakabula, me bula vinaka sara e dua na tamata ena Siga ni Vakacecegu?

²⁴ Ni kakua ni dau lewa na ka ena kena i rairai ga, ia ni vakataulewa ga ena i vakarau ni lewa dodonu.”

Sa i Koya Li na Mesaia?

²⁵ Era sa qai kaya eso vei ira na kai Jerusalemi, “E sega li ni o koya oqo era a saga tiko na veiliutaki me ra vakamatea?

²⁶ Ia raica, e vosa tiko o ya o koya ena matana levu, ka ra bau sega ni kaya vua e dua na ka! E vakaevei? Era sa vakadeitaka beka e lomadra o ira na i liuliu ni sai koya dina oqo na Mesaia?

²⁷ Ia na Mesaia, ni sa lako mai, ena sega e dua e kila se lako mai vei. Ia na tamata oqo eda kila na vanua e lako mai kina.”

²⁸ Ia ni sa veivakatavulici tiko o Jisu ena Valenisoro sa kaci ena domo levu, ka kaya, “O ni sa kilai au dina li, ka kila talega na vanua au lako mai kina? Au sega ni lako mai ena noqu lewa vakai au. Ia sa dina o koya ka talai au mai, o koya o ni sega ni kila.

²⁹ Ia au sa kilai koya oi au, ka ni'u a lako ga mai vua, ka sa talai au mai o koya.”

³⁰ Era sa qai saga me ra vesuki koya, ia sa sega ga ni bau dua e tarai koya, ni a se sega ni yaco mai na nona gauna.

³¹ Ia era a vakabauta e lewe vuqa vei ira na tamata ka ra kaya, “Ni sa na lako mai na Mesaia, ena levu cake beka na cakacaka mana e cakava mai na kena sa cakava rawa na tamata oqo?”

Era sa Talai na Ovisa me Ra Vesuki Jisu

³² Era a rogoca o ira na Farisi na nodra veivosakitaki Jisu lo tiko vaka o ya o ira na lewe vuqa, ka ra a mani talai ira na ovisa o ira na bete levu kei ira na Farisi me ra la'ki vesuki koya.

³³ Sa qai kaya vei ira o Jisu, “Au na tiko vakalailai wale talega kei kemuni, ka'u sa na qai lako vua ka a talai au mai.

³⁴ O ni na vakasaqarai au, ka na sega ni kunei au, baleta ni o ni na sega ni rawa ni lako ki na vanua au na tiko kina.”

³⁵ Era a veikayaka kina vakai ira na nodra i liuliu na Jiu, “Evei beka na vanua ena lako kina na tamata oqo, me da na sega ni kunei koya rawa kina? Ena lako beka li vei ira na noda era dui veiseyaki tu ena veikoro vaka-Kirisi, ka la'ki vakatavulici ira na kai Kirisi?

³⁶ A cava beka na i balebale ni nona kaya, ‘Dou na vakasaqarai au ka sega ni kunei au; na vanua talega au na tiko kina dou na sega ni lako rawa kina?’ ”

Veiuciwai ni Wai Bula

³⁷ Ena i otioti ni siga ni Solevu, na siga bibi duadua sara ena Solevu, sa qai tu cake o Jisu ka kaci, ka kaya, “Kevaka sa viagunu e dua na tamata, me lako mai vei au, ka gunu!

³⁸ O koya sa vakabauti au, me vaka e kaya na i Vola Tabu, ‘Ena dave mai lomana na veiuciwai ni wai ni bula.’ ”

³⁹ A sa tukuna o Jisu na ka oqo me baleta na Yalo Tabu, ka na soli vei ira era sa vakabauti koya ena dua na gauna e muri. Ka ni a se sega ni soli na Yalo Tabu ena gauna o ya baleta ni se bera ni kau cake o Jisu ki na nona i tikotiko lagilagi.

Era sa Veileti na Tamata

⁴⁰ Ni ra sa rogoca na vosa o ya e lewe vuqa vei ira na tamata, era sa qai kaya, “Sa i koya dina oqo na Parofita.”

⁴¹ Eso tale era kaya, “Sa i koya ga na Mesaia!” Sa kaya eso tale, “Ena lako li mai Kalili na Mesaia?

⁴² E a sega li ni kaya na i Vola Tabu ni na tubu mai na kawa i Tevita na Mesaia, ka ni na sucu mai Peceliema, na koro ka a tiko kina o Tevita?”

⁴³ A mani tubu kina e dua na veisei vei ira na tamata me baleti koya.

⁴⁴ Era a via vesuki koya eso, ia sa sega ga ni tarai koya e dua na tamata.

Na Nodra Tawa Vakabauta na i Liuliu

⁴⁵ Ia ni ra sa lesu tale na ovisa ni valenisoro, era sa qai tarogi ira o ira na bete levu kei ira na Farisi, ka ra kaya, “A cava na vuna dou a sega ni kauti koya mai kina?”

⁴⁶ Era sa qai sauma na ovisa, ka kaya, “E sega ni se bau dua na tamata me vosa me vaka na tamata oqo!”

⁴⁷ Era sa qai kaya na Farisi vei ira na ovisa, “Dou sa rawai tale beka ga mai vei koya oi kemudou?

⁴⁸ Dou sa bau kila li e dua vei ira na i liuliu se vei ira na Farisi me vakabauti koya?

⁴⁹ O ira na lewe vuqa sa tu oqo era sa sega ni kila na Lawa i Mosese, ka sa yaco kina vei ira na cudru ni Kalou!”

⁵⁰ A sa dua vei ira na Farisi ka tiko e kea o Nikotimo, o koya ka a la'ki raici Jisu ena dua na gauna e liu. Sa qai kaya o koya vei ira na kena vo,

⁵¹ “Me vaka sa virikotori ena noda Lawa, e sega ni rawa ni da beitaka ni sa cala e dua na tamata kevaka eda se bera mada ni se rogoci koya ka dikeva na cala sa vakayacora.”

⁵² Era a qai sauma ka kaya vua, “E sega li ni o kai Kalili talega o iko? Vakasaqara mada na i Vola Tabu ka o na raica kina ni se sega mada ni bau dua na parofita me lako mai Kalili.”

⁵³ Era sa qai dui lako kecega na tamata ki na nodra veivale,