Joni 4 - Vakavakadewa Vou kei na iVola tale eso

O Jisu kei na Yalewa ni Samaria

¹ Era sa rogoca na Farisi na nona sa rawai ira ka papitaisotaki ira tiko e lewe vuqa cake na tisaipeli o Jisu mai vei Joni.

² (Ia sa sega ni veipapitaisotaki o Jisu, o iratou ga na nona tisaipeli.)

³ Ni sa rogoca oqo o Jisu, sa qai biuti Jutia ka lesu tale ki Kalili;

⁴ ka sa tiki ni nona gaunisala na loma ni vanua o Samaria.

⁵ Sa mani yaco sara o Jisu ki na dua na koro kei Samaria, ka yacana o Saika; e voleka ki na tiki ni vanua ka a solia o Jekope vei Iosefo na luvena.

⁶ E tiko kina na i keliwai i Jekope. Ia ni sa oca ena taubale o Jisu, sa qai la'ki dabe toka ena bati ni keliwai ni rauta na tinikarua na kaloko ena siga levu tutu.

⁷ Sa qai lako yani ki kea e dua na yalewa ni Samaria me la'ki taki wai, ka sa kaya vua o Jisu, “Au kerea mada me'u gunu.”

⁸ (E ratou sa lako tu na nona tisaipeli me la'ki voli kakana ki na koro ena gauna o ya.)

⁹ Sa qai kaya vua na yalewa ni Samaria, “E rawa vakacava vei iko, ni o kai Jutia, mo kere wai vei au, ni'u yalewa ni Samaria?” (Ni sa sega ni rawa vei ira na Jiu me ra vakayagataka vata na bilo kei na i takitaki era sa vakayagataka na kai Samaria.)

¹⁰ Sa qai sauma o Jisu ka kaya vua, “Kevaka walega o sa kila na i solisoli ni Kalou kei koya sa kere gunu tiko oqo vei iko, ke o sa kerekere vua, ena solia vei iko o koya na wai ni bula.”

¹¹ Sa qai kaya vua na yalewa, “E sega saka tu na nomuni i takitaki, ka sa titobu na i keliwai, o ni na kauta mai vei na wai ni bula?

¹² O ni sa uasivi cake beka vei Jekope na tama i keimami, ka a solia vei keimami na toevu, ka a gunu kina o koya, kei iratou na luvena, kei na nona manumanu?”

¹³ Sa qai sauma o Jisu ka kaya vua, “O koya ena gunu ena wai oqo ena viagunu tale;

¹⁴ ia o koya ena gunu ena wai au na solia vua ena sega ni viagunu ka tawamudu; ia na wai au na solia vua ena yaco me wai vure ena lomana ka tovure yani ki na bula tawamudu.”

¹⁵ Sa qai kaya vua na yalewa, “Ni solia saka mai vei au na wai oqori, me'u kakua kina ni viagunu tale, se lako tale mai ki ke me'u taki.”

¹⁶ Sa qai kaya vua o Jisu, “La'ki kaciva mada mai na watimu mo drau lako mai ki ke.”

¹⁷ A sauma na yalewa ka kaya, “E sega na watiqu.” Sa qai kaya vua o Jisu, “O sa kaya dina, ‘E sega na watiqu,’

¹⁸ ni o sa vakawati oti kei na lima na tagane, ka sega ni watimu dina o koya o drau tiko vata oqo. Sa dina sara na nomu vosa ena vuku ni ka oqo.”

¹⁹ Sa qai kaya vua na yalewa, “Au sa raica rawa saka ni oi kemuni e dua na parofita.

²⁰ Era dau lotu na neimami qase ena ulunivanua oqo, ia o ni kaya ni tikoga mai Jerusalemi na tikina e dodonu me da lotu kina.”

²¹ Sa qai kaya vua o Jisu, “Yalewa, vakabauti au, sa roro tiko mai na gauna o ni na sega ni lotu kina vua na Tamada ena ulunivanua oqo se mai Jerusalemi.

²² O ni sa lotu tiko vei koya o ni sega ni kila; keimami sa lotu vei koya keimami sa kila; ka ni na lako mai vei ira na kai Jutia na veivakabulai.

²³ Ia ena yaco mai na gauna, ka sai koya sara ga oqo, ni ra na lotu vakayalo ka vakaidina vei Tamada o ira era sa lotu dina, ni sa qara o Tamada me ra vakaoqo o ira era lotu vua.

²⁴ A yalo na Kalou, o ira era lotu vua e dodonu me ra lotu vakayalo ka vakaidina.”

²⁵ Sa qai kaya vua na yalewa o ya, “Au sa kila ni na lako mai ena dua na gauna na Mesaia; ia ena gauna sa yaco mai kina, ena mai tukuna vei keda na veika kecega.”

²⁶ Sa qai kaya vua o Jisu, “Oi au ga ka'u vosa tiko oqo vei iko, na Mesaia.”

²⁷ Ena gauna sara ga o ya, e ratou sa yaco mai kina na nona tisaipeli, ka ratou kurabui ni veivosaki tiko o koya kei na dua na yalewa; ia sa sega ga ni dua me taroga, “Na cava o vinakata?” se “A cava o ni vosa tiko kina vua?”

²⁸ Sa qai biuta tu na nona saqa ni wai na yalewa ka lesu tale ki na koro, ka sa kaya vei ira na tamata mai kea,

²⁹ “Lako mai ka raica mada na tamata ka tukuna vei au na veika kecega au dau cakava tu. E rawa beka ni o koya oqo na Mesaia?”

³⁰ Era sa qai biuta na koro ka lako vei Jisu.

³¹ Ia ni ra se bera yani, e ratou sa qai cikevi Jisu na tisaipeli, ka kaya, “Vakavuvuli, mo ni kana mada!”

³² Sa qai kaya vei iratou o koya, “Sa tu vei au na kakana me'u kania, ia dou sa sega ni kila.”

³³ E ratou sa qai veitarogi kina na tisaipeli ka kaya, “E dua beka na tamata sa rairai kau kakana mai vua?”

³⁴ Sa qai kaya vei iratou o Jisu, “Na kequ kakana sai koya me'u cakava na loma i koya sa talai au mai, ka vakaotia na nona cakacaka.

³⁵ E sega li ni o ni dau kaya, ‘Sa vo ga e va na vula me qai yaco mai na gauna ni tatamusuki.’ Raica, au sa kaya vei kemudou, dou tacake ka rai yani ki na i teitei ka ra tu oqori; era sa matua mai ka ra sa waraka tu me ra tamusuki.

³⁶ O koya sa tatamusuki sa saumi sara tiko ka sa kumuna tiko na vuata ki na bula tawamudu; me rau marau vata kina na daukabukaburaki kei koya na dautatamusuki.

³⁷ Sa dina kina na vosa o ya, ‘E dua sa kaburaka, ka dua tani a qai tamusuka.’

³⁸ Au a talai kemudou mo dou tamusuka na ka dou a sega ni cakacakataka; era a cakacaka kina eso tani, ia dou sa mai tauca na vua ni nodra cakacaka.”

³⁹ Era sa vakabauti Jisu e lewe vuqa na kai Samaria ena koro o ya baleta na vosa i koya na yalewa o ya, ni sa kaya vakaoqo: “A sa tukuna vei au o koya na ka kecega au sa cakava.”

⁴⁰ Era sa lako mai kina na kai Samaria ki vua, ka cikevi koya me tiko vata mada kei ira; ka sa mani tiko kina o koya ka siga rua.

⁴¹ Era a lewe vuqa sara tale era a qai vakabauta ena vuku ni vosa i Jisu;

⁴² ka ra a kaya vua na yalewa, “Oqo keimami sa vakabauta, e sega ni baleta na nomu vosa, ia baleta ga ni keimami sa qai rogoci koya sara oi keimami, ka kila ni sai koya oqo na i Vakabula kei vuravura.”

Sa Vakabula o Jisu e Dua na Gone Tagane

⁴³ Ia ni sa oti e rua na siga, sa qai lako sara ki Kalili o Jisu.

⁴⁴ A sa tukuna oti o koya, “Sa sega ni dau dokai na parofita ena nona vanua.”

⁴⁵ Ia ni sa yaco ki Kalili, era sa marautaki koya na tamata, baleta ni ra a raica na veika kece ka a cakava o koya mai Jerusalemi ena gauna ni Solevu ni Lakosivia; ka ni ra a lako talega ki na solevu o ira oqo.

⁴⁶ Sa qai lako tale o Jisu ki Kena mai Kalili, na koro ka a vukica kina na wai me waini. A tiko kina e dua na i vakailesilesi ni matanitu ka sa tauvimate tiko na luvena tagane mai Kapenaumi.

⁴⁷ Ni sa rogoca o koya ni sa lako tani mai Jutia ki Kalili o Jisu, sa qai lako vua, ka kerea me lako sobu mada me la'ki vakabula na luvena, ni sa voleka ni mate.

⁴⁸ Sa qai kaya vua o Jisu, “Ena sega ni dua vei kemuni ena vakabauta rawa ka vakavo duadua ga kevaka sa sarava e matana na cakacaka mana kei na ka veivakurabuitaki.”

⁴⁹ Sa qai kaya vua na i vakailesilesi, “Me daru mai lako sobu saka, ni bera ni mate na luvequ.”

⁵⁰ Sa qai kaya vua o Jisu, “Lako ga, sa bula na luvemu!” A sa vakabauta na vosa i Jisu na tamata o ya ka sa lako yani.

⁵¹ Ni sa lako tiko ki na nona vale, e ratou sa mai tavaki koya na nona tamata ka kaya vua, “Sa bula cake mai o luvemu!”

⁵² Sa qai vakataroga vei iratou o koya se gauna cava sa tekivu me bula cake kina na gone. E ratou a qai kaya vua, “Sa takali vua na katakata ena dua na kaloko ena yakavi ena noa.”

⁵³ A sa qai nanuma sara o tama ni gone ni sa gauna vata o ya ka a tukuna kina vua o Jisu, “Sa bula na luvemu.” Sa mani vakabauta kina o koya kei ira kece na nona lewe ni vuvale.

⁵⁴ Sa i koya oqo na i karua ni cakacaka mana sa cakava o Jisu ni sa lesu ki Kalili ena nona a tiko mai Jutia.