Joni 3 - Vakavakadewa Vou kei na iVola tale eso

O Jisu kei Nikotimo

¹ E dua na nodra i liuliu na Jiu, a yacana o Nikotimo, ka lewe ni lawalawa ka ra vakatokai na Farisi.

² A qai lako o koya vei Jisu ena dua na bogi ka kaya vua, “Vakavuvuli, keimami sa kila ni o ni sa lako mai vua na Kalou me i vakavuvuli, ni sega ni dua na tamata e cakava rawa na veicakacaka mana o ni sa cakava oqo ke sega ni tiko vata kei koya na Kalou.”

³ Sa qai sauma o Jisu ka kaya vua, “Au tukuna vakadodonu sara vei iko: kevaka e sega ni sucu tale e dua na tamata, ena sega ni raica rawa na matanitu ni Kalou.”

⁴ Sa kaya vua o Nikotimo, “Ena sucu rawa vakaevei e dua na tamata ni sa tamata bula tu? E rawa li ni curu tale ki na kete i tinana ka me qai la'ki sucu tale mai?”

⁵ Sa qai kaya o Jisu, “Au tukuna vakadodonu sara vei iko: kevaka e sega ni sucu e dua na tamata ena wai kei na Yalo Tabu, ena sega ni curu rawa ki na matanitu ni Kalou.

⁶ Sa vakayago o koya sa sucu ena yago, ka sa vakayalo o koya sa sucu ena Yalo Tabu.

⁷ Kakua ni kurabui ni'u sa kaya vei iko, ‘E dodonu mo sucu tale.’

⁸ Sa dau liwa na cagi ki na yasana e digitaka; o sa rogoca ga na kena rorogo, ia o sega ga ni kila na yasana e lako mai kina se na yasana sa lako yani kina. Sa vaka talega kina o ira yadua era sa sucu ena Yalo Tabu.”

⁹ Sa qai vosa o Nikotimo ka kaya vua, “Ena yaco rawa vakaevei na veika oqo?”

¹⁰ Sa qai sauma o Jisu ka kaya vua, “O iko e dua na nodra i vakavuvuli levu na Isireli, ia o qai sega tu ni kila na veika oqo, ne?

¹¹ Au tukuna vakadodonu sara vei iko, keitou sa kaya tiko na veika keitou sa kila, ka tukuna na veika keitou sa raica; ia sa sega ga ni dua vei kemudou sa gadreva me vakabauta na neitou i tukutuku.

¹² Kevaka au sa tukuna vei kemudou na veika vakavuravura ka dou sa sega ni vakabauta, dou na qai vakabauta rawa vakaevei kevaka au sa tukuna vei kemudou na veika vakalomalagi?

¹³ Sa sega ni dua na tamata e se bau lako cake oti ki lomalagi ka vakavo duadua ga na Luve ni Tamata, o koya ka sa lako sobu mai lomalagi.”

¹⁴ Me vaka ga na nona sa laveta cake na gata parasa o Mosese mai na loma ni vanua lala, sa dodonu me na laveti cake talega vakakina na Luve ni Tamata,

¹⁵ me nodra kina na bula tawamudu o ira vakayadua era sa vakabauti koya.

¹⁶ Ni sa lomani vuravura sara vakalevu vakaoqo na Kalou, sa solia kina na Luvena e duabau ga, me ra kakua ni mate kina o ira yadua era sa vakabauti koya, ia me nodra ga na bula tawamudu.

¹⁷ Ni sa sega ni tala mai na Luvena ki vuravura na Kalou me veilewaitaki vuravura, ia me ra vakabulai ga na kai vuravura ena vukuna.

¹⁸ O ira sa vakabauta na Luvena era na sega ni lewai; ia o ira era sa sega ni vakabauta sa lewai oti tu, baleta ni ra sa sega ni vakabauta na Luve ni Kalou e duabau ga.

¹⁹ Oqo na yavu e tau kina na lewa: a sa lako mai na rarama ki vuravura, ia era sa vinakata ga na tamata na butobuto ka cata na rarama, baleta ni sa rui vakasisila na nodra i valavala.

²⁰ O ira kece sa kitaka na i valavala ca era sa cata na rarama ka sega ni lako mai ki na rarama, baleta ni ra besetaka me kunei na nodra i tovo vakasisila.

²¹ Ia o ira sa vakayacora na ka dina sa lako mai ki na rarama. Oqo me vakaraitaki kina ni veika era sa kitaka sa vakayacori mai na nodra talairawarawa vua na Kalou.

O Jisu kei Joni

²² Ni sa oti na veika o ya, e ratou sa qai lako o Jisu kei iratou na nona tisaipeli ki na vanua o Jutia; a sa tiko mai kina kei ira ka veipapitaisotaki.

²³ A veipapitaisotaki tale tikoga o Joni mai Enoni, voleka ki Selimi, ka ni levu kina na wai. Era sa lako tikoga yani vua na tamata ka sa papitaisotaki ira o koya.

²⁴ (E a se bera ni biu o Joni ki na valeniveivesu ena gauna o ya.)

²⁵ E a tubu e dua na veileti vei ira na tisaipeli i Joni kei na dua na Jiu ena vuku ni veivakasavasavataki.

²⁶ E ratou sa qai lako vei Joni na nona tisaipeli ka kaya vua, “Vakavuvuli, o ni nanuma tiko na tamata o drau a tiko vata mai na tai kadua ni Joritani, o koya o ni a mai tukuna tiko, e sa veipapitaisotaki tiko ena gauna oqo o koya, ka ra sa lako kece tikoga vua na tamata!”

²⁷ Sa qai sauma o Joni ka kaya, “E sega ni dua na tamata e rawata e dua na ka, kevaka e sega ni soli vua mai lomalagi.

²⁸ Oi kemudou vakai kemudou e rawa ni o dou vakadinadinataka ni'u a kaya, ‘Ni'u sega ni Mesaia oi au, ia ni'u a talai ga me'u liu mai vua.’

²⁹ Sa nona ga na tagane vou na yalewa vou; ia na i tokani ni tagane vou, o koya ka tu voli e kea ka vakarorogo tiko, sa reki ni sa rogoca sara na domo ni tagane vou. Oqo na vuna au sa rui marau dina kina vakalevu.

³⁰ Sa dodonu me levu cake tikoga o koya, ka me'u lailai sobu tikoga oi au.”

O Koya sa Lako mai Lomalagi

³¹ O koya sa lako mai cake, sa levu cake vei keda kecega; o koya sa tubu e vuravura sa kai vuravura ga ka sa vosataka ga na veika vakavuravura. O koya sa lako mai lomalagi sa levu cake vei keda kecega.

³² Sa mai tukuna o koya na ka sa raica ka rogoca, ia e sega ga ni dua e vakabauta na nona i tukutuku.

³³ Ia o koya sa vakabauta na nona i tukutuku sa vakadinadinataka kina ni sa dina ga na Kalou.

³⁴ O koya sa tala mai na Kalou sa mai tukuna na vosa ni Kalou; sa tukuna rawa ena vuku ni Yalo Tabu ka a solia vakayauyau vua na Kalou.

³⁵ Sa lomana na Luvena na Tamana ka sa solia ki ligana na veika kecega.

³⁶ O koya sa vakabauta na Luvena sa nona na bula tawamudu; ia o koya sa talaidredre vua na Luvena ena sega ni raica na bula, ia ena tiko ga vua na cudru ni Kalou ka tawamudu.