Joni 21 - Vakavakadewa Vou kei na iVola tale eso

Na Rairai nei Jisu vei Iratou na Tisaipeli e Vitu

¹ Ni sa oti na veika o ya, sa qai vakaraitaki koya tale o Jisu vei iratou na tisaipeli mai na drano mai Taiperia; ka a vakaraitaki koya vakaoqo.

² E ratou a tiko vata voli o Saimoni Pita, kei Tomasi, o koya ka vakatokai na “Drua”, kei Nacanieli na kai Kena mai Kalili, kei rau na luve i Sepeti, ka lewe rua tale na nona tisaipeli.

³ A qai kaya vei iratou o Saimoni Pita, “Au sa lako mada ki qoli.” E ratou a mani kaya vua, “Keitou na lako talega yani.” E ratou sa qai lako ka vodo ki na dua na waqa. Ia e ratou a sega ni rawata e dua na ika ena bogi o ya.

⁴ Ia ni sa mataka mai, sa tu mai matasawa o Jisu; ia eratou a sega ga ni kila na tisaipeli ni sai Jisu o ya.

⁵ Sa qai kaya vei iratou o Jisu, “Ra cauravou, e sa bau rawa eso na ika?” E ratou a sauma, “E sega sara ga ni bau dua.”

⁶ Sa qai kaya vei iratou o koya, “Dou balata na lawa ki na i matau ni waqa, dou na kunea kina eso.” E ratou a mani balata kina, ka ratou a sega ni yavia rawa na lawa, ni sa ka levu sara na ika.

⁷ A ka oqo sa kaya kina vei Pita na tisaipeli ka dau lomana o Jisu, “Na Turaga bagi ka tu oqo!” Ni sa rogoca o Saimoni Pita ni sai koya na Turaga o ya, sa qai daramaka na nona i sulu vakagonedau (ka ni a luvata tu na nona i sulu) ka lade yani ki wai.

⁸ E ratou sa qai yaco ki vanua ena waqa lailai o iratou na vo ni tisaipeli, ka yavia yani na lawa sa sinai tu ena ika. E ratou sa sega ni yawa sara mai vanua, ka ni rauta beka ga e dua na drau na mita na kena yawa.

⁹ Ni ratou sa sobu ki vanua, eratou sa raica sara e dua na matanibuka sa waqa tu, ka sa tavu toka ena kena qilaiso eso na ika, kei na madrai.

¹⁰ Sa qai kaya vei iratou o Jisu, “Dou kauta mai eso na ika dou se qai rawata ga oqo.”

¹¹ Sa qai lako o Pita ki waqa ka yavia mai ki vanua na lawa sa sinai tu ena ika lelevu, e 153 taucoko na kena levu. Ia e dina ga ni a levu vaka o ya na ika, sa sega ga ni bote na lawa.

¹² Sa qai kaya vei iratou o Jisu, “Dou mai katalau.” Ia sa sega ga ni doudou e dua vei iratou na tisaipeli me tarogi koya, “O cei oi kemuni?” baleta ni ratou sa kila ni sai koya ga na Turaga.

¹³ Sa qai lako mai o Jisu, ka taura na madrai, ka solia vei iratou; a sa vakayacora vakakina ena ika.

¹⁴ Sa i koya oqo na i katolu ni gauna sa vakaraitaki koya kina o Jisu vei iratou na nona tisaipeli ni sa tu cake tale mai na mate.

O Jisu kei Pita

¹⁵ Ni ratou sa katalau oti, sa qai kaya vei Saimoni Pita o Jisu, “I Saimoni na luve i Jona, o sa lomani au vakalevu cake mai vei iratou oqo, se segai?” Sa kaya vua o koya, “Io Turaga, o ni sa kila ni'u sa lomani kemuni.” Sa qai kaya vua o Jisu, “Vakani ira na noqu lami.”

¹⁶ Sa kaya tale vakarua vei koya o Jisu, “I Saimoni na luve i Jona, o sa lomani au li, se segai?” Sa kaya vua o Pita, “Io Turaga, o ni sa kila ni'u sa lomani kemuni.” Sa qai kaya tale vua o Jisu, “Qaravi ira na noqu sipi.”

¹⁷ A sa taroga tale, “I Saimoni na luve i Jona, o sa lomani au se segai?” Sa rarawa na loma i Pita ni sa kena i katolu na nona taroga vua, “O sa lomani au, se segai?” A mani kaya vua, “Kemuni na Turaga, o ni sa kila na ka kecega, o ni sa kila ni'u sa lomani kemuni!” A qai kaya vua o Jisu, “Vakani ira na noqu sipi.

¹⁸ Au sa kaya vakaidina vei iko oqo: ni o a se gone, o a dau tu vakarau ka lako yani ki na vanua ga o sa digitaka mo lako kina; ia ni o sa qase cake, o na dodoka na ligamu ka na vesuki iko e dua tale na tamata, ka kauti iko ki na vanua o sa sega ni vinakata.”

¹⁹ (A sa vosa vakaoqo o Jisu me vakatakila kina na mataqali i matemate nei Pita ena gauna ena mate kina, ka me na vakacerecerei kina na Kalou.) Sa qai kaya vua o Jisu, “Muri au mai!”

O Jisu Kei na Tisaipeli Kadua

²⁰ E a qai vuki o Pita, ka raica na tisaipeli sa dau lomana o Jisu ni muri tiko yani, o koya ka a dabe raviti Jisu ena nodratou vakayakavi ka taroga, “Turaga, o cei ena soli kemuni yani?”

²¹ Ni sa raici koya o Pita, sa qai tarogi Jisu, “Turaga, e vakaevei o koya oqo?”

²² A sauma vua o Jisu, “Kevaka sa lomaqu me bula tikoga o koya ka yacova ni'u lesu tale mai, a cava o ya vei iko? O iko, mo muri au ga!”

²³ Sa qai rogo yani vei ira na i lawalawa era sa muri Jisu ni na sega ni mate na tisaipeli oqo. Ia sa sega ni kaya o Jisu ni na sega ni mate o koya; a sa kaya ga, “Kevaka sa lomaqu me bula tikoga o koya ka yacova ni'u lesu tale mai, a cava o ya vei iko?”

²⁴ Sa i koya na tisaipeli oqori ka sa vakadinadinataka na veika oqo, ka vola talega; ka keitou sa kila ni sa dina na nona i tukutuku.

Ai Tinitini

²⁵ Sa vuqa sara na veicakacaka tale eso sa cakava o Jisu. Kevaka era sa volai kecega, au nanuma ni na oso o vuravura ena veivola ena volai.