Joni 2 - Vakavakadewa Vou kei na iVola tale eso

Na Vakamau mai Kena

¹ Ena i katolu ni siga, sa qai caka e dua na vakamau mai na koro o Kena mai Kalili. A tiko kina na tina i Jisu,

² ka ratou a bau sureti talega ki na vakamau o Jisu kei iratou na nona tisaipeli.

³ Ia ni sa oti na waini, sa qai kaya vei Jisu o tinana, “Sa oti vei ira oqo na waini.”

⁴ Sa qai kaya vua o Jisu, “Yalewa, a cava me daru mai leqataka kina? E se bera ni yaco mai na noqu gauna.”

⁵ A sa qai kaya ga vei ira na dauveiqaravi o tina i Jisu, “Na ka kecega e kaya vei kemudou o koya, dou cakava.”

⁶ E tu ena tikina o ya e ono na saqa vatu ni wai, ka rauta ni dua na drau na lita na levu ni ka e rawa ni ra tawana yadudua, ka ra dau vakasavasavataki ira kina na Jiu.

⁷ Sa qai kaya vei ira o Jisu, “Dou vakasinaita na saqa ena wai.” E ratou sa qai vakasinaita sara na saqa kece o ya.

⁸ Sa qai kaya tale vei ira o koya, “Dou takiva ka kauta yani vua na i liuliu ni soqo.” E ratou sa qai kauta yani na wai,

⁹ na kena ka sa vukici tu oqo me waini, ka sa tovolea sara na i liuliu ni soqo. E a sega ni kila o koya se kau mai vei (ia o iratou ga na dauveiqaravi era a takiva yani na wai sa kila tiko); a sa qai kaciva na tagane vou

¹⁰ ka kaya vua, “Na tamata kecega era dau solia taumada e liu na waini vinaka duadua, ia ni sa oti toka na nodra gunu vakalevu na vulagi, era na qai solia na waini vinaka vakarauta ga. Ia o iko sa maroroya tikoga na waini vinaka duadua me yacova sara mai na gauna oqo!”

¹¹ A sa vakayacora o Jisu na i matai ni nona cakacaka mana oqo ena koro o Kena mai Kalili. E a vakatakila mai kea na nona kaukauwa, ka ratou sa vakabauti koya na nona tisaipeli.

¹² Ni sa oti o ya, e ratou sa qai lako ki Kapenaumi o Jisu kei tinana, kei iratou na tacina, kei iratou na tisaipeli, ka tiko mai kea ena loma ni vica na siga.

Sa Lako ki Valenisoro o Jisu

¹³ Sa voleka sara mai na nodra gauna ni Solevu ni Lakosivia na Jiu, ka sa lako yani kina ki Jerusalemi o Jisu.

¹⁴ A sa kunei ira ena Valenisoro na dauvolitaki bulumakau, kei na sipi, kei na ruve, kei ira na dauveisau i lavo ni ra qarava tiko na nodra teveli ni veivoli.

¹⁵ Sa qai cakava o koya e dua na kuita waqaliqali ka vakasavi ira kecega mai na Valenisoro, ka wili kina o ira na sipi kei ira na bulumakau. E a qai sovaraka na nodra i lavo na dauveisau i lavo, ka vukica na nodra teveli,

¹⁶ ka kaya vei ira na volitaki ruve, “Dou kauti ira tani sara eke! Kakua tale ni dou cakava na vale nei Tamaqu me makete ni veivoli!”

¹⁷ E ratou sa qai nanuma na nona tisaipeli ni sa volai vakaoqo ena i Vola Tabu: “Na noqu gadreva na nomuni Vale Tabu, na Kalou, sa vaka ni waqa tiko e lomaqu e dua na buka!”

¹⁸ Era sa qai sauma na Jiu, ka kaya vua, “Na cakacaka mana cava e rawa ni o cakava me vakaraitaki kina vei keimami ni sa dodonu na ka o cakava?”

¹⁹ Sa qai kaya vei ira o Jisu, “Dou talaraka sobu ki ra na vale oqo, ka'u na tara cake tale ena tolu na siga.”

²⁰ Era sa qai kaya kina na Jiu, “Na vale oqo sa tara ena loma ni 46 na yabaki, ia o na tara cake tale li ena tolu ga na siga?”

²¹ Ia na valenisoro sa tukuna tiko oqo o Jisu sai koya na yagona ga.

²² Ia ni sa vakaturi cake tale mai na mate, e ratou sa qai nanuma na tisaipeli ni a sa tukuna oti vei iratou o koya na veika oqo, ka ratou sa vakadinata kina na i Vola Tabu kei na vosa i Jisu.

Sa Kila na Tamata Kece ga o Jisu

²³ Ena nona a tiko voli mai Jerusalemi o Jisu ena gauna ni Solevu ni Lakosivia, sa lewe vuqa sara era sa vakabauti koya ena vuku ni nodra raica na veika mana sa vakayacora.

²⁴ Ia sa sega ga ni nuitaki ira kece sara o Jisu, baleta ni sa kilai ira vakavinaka kece sara.

²⁵ A sa sega ni yaga vua me dua e tukuna vua na ka e baleta na tamata, ka ni sa kila o koya na ka e tu e loma ni tamata.