Joni 19 - Vakavakadewa Vou kei na iVola tale eso

¹ Sa qai kauti Jisu o Pailato ka vakanakuitataka.

² Era a talia e dua na i sala wavakavotona o ira na sotia, ka vakaisalataki Jisu kina, ka vakaisulutaki koya ena dua na i sulu lokaloka,

³ ka ra sa kaya, “Me bula balavu na nodra Tui na Jiu!” Era sa qai lako cake ka sabici koya.

⁴ Sa qai curu tale ki tautuba vei ira na lewe vuqa o Pailato, ka kaya vei ira, “Raica, au na kauti koya mai ki tautuba vei kemuni, mo ni raica kina ni'u sa sega ni kunea vua e dua na cala me cudruvi kina.”

⁵ Sa qai curu ki tuba o Jisu; ka sa vakaisala tu ena i sala wavakavotona ka vakaisulu ena i sulu lokaloka. Sa qai kaya vei ira o Pailato, “Raica! Sa tu oqo o koya!”

⁶ Ni ra sa raici koya o ira na bete levu kei ira na ovisa, era sa qai kailavaka mai, “Vakota ki na kauveilatai! Vakota ki na kauveilatai!” Sa qai kaya vei ira o Pailato, “Ni kauti koya o kemuni, ka vakota ki na kauveilatai. Au sa sega ni kunea vua e dua na cala.”

⁷ Era a kaya yani vua o ira na Jiu, “Sa vauci tu ena neimami lawa ni sa dodonu me mate o koya oqo, baleta ni sa tukuna ni sa Luve ni Kalou o koya.”

⁸ Ni sa rogoca o Pailato na vosa o ya, sa qai levu cake ga kina na nona rere;

⁹ ka sa curu tale ki na valeniveilewai, ka kaya vei Jisu, “E vei na vanua o lako mai kina?” Ia sa sega ni sauma o Jisu.

¹⁰ Sa qai kaya kina vua o Pailato, “O na sega li ni vosa vei au? O sega beka ni kila ni tu vei au na kaukauwa me'u sereki iko, ka tu talega vei au na kaukauwa me'u vakoti iko ki na kauveilatai?”

¹¹ Sa qai sauma vua o Jisu, ka kaya, “E sega ni dua na kaukauwa e tu vei iko me baleti au, kevaka e sega ni soli vei iko mai vua na Kalou; o koya oqo e levu cake kina na nona i valavala ca o koya ka a soli au yani vei iko.”

¹² Ni sa rogoca oqo o Pailato, sa qai saga eso na sala me sereki koya kina. Ia o ira na Jiu era sa qai qoqolou ga, ka kaya, “Kevaka o ni sereki koya na tamata oqo, o ni sa sega ni to vata kei Sisa. O koya ga e tukuni koya tiko ni tui sa saqati Sisa tiko.”

¹³ Ni sa rogoca na veivosa o ya o Pailato, sa qai kauti Jisu ki tautuba ka dabe ena i dabedabe ni veilewai ena vanua sa vakatokai “Na Raravatu”. (Oqo na vanua o “Kapaca” ena vosavakaiperiu.)

¹⁴ Na gauna oqo sa rauta toka na siga levu tutu ni siga ni Vakavakarau ni Lakosivia. Sa qai kaya vei ira na Jiu o Pailato, “Sa i koya oqo na nomuni tui!”

¹⁵ Era sa qai kailavaka lesu, “Vakamatei koya! Vakamatei koya! Vakoti koya ki na kauveilatai!” Sa qai tarogi ira tale o Pailato, “O ni sa vinakata li me'u vakota na nomuni tui ki na kauveilatai?” Era a qai sauma yani na bete levu, “Sa neimami tui duadua ga o Sisa!”

¹⁶ Sa qai soli Jisu yani vei ira o Pailato me vakoti ki na kauveilatai. Era sa qai tauri Jisu.

Sa Vakoti ki na Kauveilatai o Jisu

¹⁷ Sa qai lako yani o koya, ka colata na nona kauveilatai, ka yaco ki na vanua e vakatokai na “Vanua ni Qavokavoka” ka vakatokai o Kolikoca ena vosa vakaiperiu.

¹⁸ E kea era sa qai vakoti koya kina, vata kei na lewe rua tale na tamata, e rau a yadua na yasana, ka tiko o Jisu ena kedrau maliwa.

¹⁹ Sa qai vola o Pailato e dua na i vakatakilakila, ka tokara ena ulu ni kauveilatai. E volai toka kina, “O Jisu na kai Nasareci, na nodra Tui na Jiu.”

²⁰ Era a wilika na i vakatakilakila o ya e lewe vuqa vei ira na Jiu, ka ni voleka tikoga ki na koro na vanua ka a vakoti kina ki na kauveilatai o Jisu. E a volai na i vakatakilakila ena vosa vakaiperiu, vaka-Roma, kei na vosa vaka-Kirisi.

²¹ Era a qai kaya vei Pailato na nodra bete levu, “Mo ni kakua ni vola, ‘Na nodra Tui na Jiu’; me volai ga, ‘E kaya, Oi au na nodra Tui na Jiu.’ ”

²² Sa qai sauma o Pailato, ka kaya, “Na ka au sa vola, au sa vola!”

²³ Ni ra sa vakoti Jisu oti ki na kauveilatai o ira na sotia, era sa qai taura na nona i sulu, ka wasea vakava, me ra yadua na tikina o ira na sotia; era a taura talega vakakina na i tutuvi: ia na i tutuvi o ya e sega ni cula, ka ni tali taucoko ga na tutuna mai cake ka kauta sara ki ra.

²⁴ Era a mani veivosakitaka kina na sotia, “Me da kakua ni dresuka; me da vakawirimadigi ga, se o cei me qai nona.” A sa yaco oqo me vakayacori kina na i Vola Tabu, ni sa kaya, “Era sa qai veivotayaka na noqu i sulu. Ia na noqu i tutuvi era sa vakawirimadigi kina.” Sa i koya o ya na ka era a cakava na sotia.

²⁵ E ratou a tu voleka tu ena kauveilatai i Jisu o tinana, kei na taci tinana, o Maria na wati Kilopa kei Maria na yalewa ni Makitala.

²⁶ A sa raici tinana o Jisu kei koya na tisaipeli sa dau lomana ni rau tucake vata tu e kea; a sa qai kaya kina vei tinana, “Yalewa, na luvemu oqori.”

²⁷ Sa qai kaya vua na tisaipeli, “Oqori na tinamu!” Mai na tiki ni gauna o ya, a sa kauti koya sara na tisaipeli o ya ki na nona vale.

Na Mate i Jisu

²⁸ Ni sa oti o ya, ka sa kila o Jisu ni sa vakacavari na ka kecega, me vakayacori sara kina na i Vola Tabu, sa qai kaya, “Au sa viagunu.”

²⁹ E a tu e kea e dua na bilo sinai ena wai wiwi. Era a mani tonisua e dua na vutovuto ena wai wiwi, ka ciqira ena dua na taba ni isopi, ka dulaka cake ki gusuna.

³⁰ Ni sa gunuva oti na wai wiwi o Jisu, sa qai kaya, “Sa oti!” Ni sa oti o ya sa qai vakacuvara na uluna, ka solia yani na yalona.

Lausua na Sarisari i Jisu

³¹ Me vaka ni sa Siga Vakaraubuka na siga o ya, ka sega ni dodonu kina me na rube tu na yagodratou me yacova yani na Siga ni Vakacecegu, era a mani kerei Pailato kina o ira na Jiu me musuki na yavadratou ka me ratou kau tani mai kea.

³² Era sa mani lako na sotia ka musuka na yavana na i matai ni tamata ka vakakina na kena i karua erau sa vakoti vata kei Jisu ki na kauveilatai.

³³ Ia ni ratou sa yacovi Jisu yani, e ratou sa raica ni sa mate oti tu, era sa sega kina ni musuka na yavana.

³⁴ Ia e dua vei ira na sotia sa qai suaka na sarisarina ena dua na moto, ka sa dave mai kina na dra kei na wai.

³⁵ (Sa tukuna na veika oqo o koya ka sa vakadinadinataka e matana, me rawa kina ni o ni vakabauta vakakina. Sa dina sara na veika sa tukuna, ka sa kila talega vakai koya ni sa tukuna voli na i tukutuku dina.)

³⁶ Era sa yaco na veika oqo me vakayacori sara kina na i Vola Tabu: “Ena sega ni ramusu e dua na suina.”

³⁷ E dua tale na tiki ni Vola Tabu e kaya, “Era na rai yani vua, o koya era a suaka.”

Na Bulu i Jisu

³⁸ Ni sa oti na veika o ya, sa qai kerei Pailato o Iosefo na kai Arimacea me kauta na yago i Jisu. O Iosefo oqo e dua na tisaipeli i Jisu, ia sa dau muri koya vunivuni tu ga, ka ni a rerevaki ira tiko na Jiu. A mani vakadonuya vua o Pailato, ka sa lako sara o Iosefo ka la'ki kauta na yagona.

³⁹ E a lako talega yani o Nikotimo, o koya ka a la'ki raici Jisu ena dua na bogi, ka kauta yani na mura e veiwaki vata kei na yasi, ka rauta e tolusagavulu na kilokaramu na kena bibi.

⁴⁰ E rau sa qai kauta na yago i Jisu ka solega vata kei na ka boi vinaka ena i sole lineni, me vaka na i vakarau ni nodra veibulu na Jiu.

⁴¹ A sa tiko ena dua na i teitei ena vanua sa vakamatei kina o Jisu, ka sa tiko e kea e dua na i bulubulu vou ka sega mada ni se bau vakayagataki.

⁴² E rau sa mani buluti Jisu e kea me vaka ni sa voleka sara na Siga ni Vakacecegu kei na kena sa toka voleka ga e kea na i bulubulu oqo.