Joni 15 - Vakavakadewa Vou kei na iVola tale eso

O Jisu na Vaini Dina

¹ “Oi au na vaini dina, ka sa dauqarava na loganivaini o Tamaqu.

² Sa dau kauta laivi na tabaqu kecega e sega ni vua o koya, ka samaka na tabaqu kecega e vua, me rawa ni ra vua vakalevu sara.

³ Dou sa vakasavasavataki oti mai na i vakatavuvuli ka'u sa solia vei kemudou.

⁴ Dou sema tikoga vei au, ka'u na sema tikoga vei kemudou. Me vaka ga ni na sega ni rawa ni vua vakai koya na taba ni vaini kevaka e sega ni semati tiko ki na vuni vaini, ena sega talega vakakina oi kemudou kevaka dou sa sega ni sema tiko vei au.

⁵ “Oi au na vaini, oi kemudou na tabaqu. O ira kece sara sa sema tiko vei au, ka'u sa sema tiko vei ira oi au, era na vua vakalevu sara; ni kevaka dou sa tawase tani mai vei au, dou na sega ni rawata e dua na ka.

⁶ Kevaka e sega ni sema tiko vei au e dua na tamata, ena biu laivi me vaka na taba ni vaini ka sa na malai mai; era na qai tomika na tamata ka biuta ki na bukawaqa me kama kina.

⁷ Kevaka dou sa sema tikoga vei au ka sa tiko vei kemudou na noqu vosa, a veika kecega dou sa vinakata ka kerea, ena vakayacori oqo vei kemudou.

⁸ Sa vakatakilai na lagilagi nei Tamaqu mai na nomudou vuavuai vakalevu; io, oqo na sala dou sa yaco kina mo dou noqu tisaipeli.

⁹ Au sa lomani kemudou me vaka sa lomani au o Tamaqu; mo dou tiko ga ena noqu loloma.

¹⁰ Kevaka dou sa talairawarawa ki na noqu i vakaro, dou na tiko ga ena noqu loloma, me vaka na noqu sa talairawarawa ki na i vakaro i Tamaqu ka'u tiko ga ena nona loloma.

¹¹ “Au sa tukuna na veika oqo vei kemudou me rawa kina ni tiko kei kemudou na noqu reki ka me vakataucokotaki talega kina na nomudou reki.

¹² Oqo na noqu i vakaro: dou veilomani, me vaka ka'u sa lomani kemudou.

¹³ Na loloma cecere duadua e rawa ni solia e dua na tamata vei ira na wekana sai koya me solia na nona bula ena vukudra.

¹⁴ Dou sa qai wekaqu dina kevaka dou sa dau cakava na veika au sa vakarota vei kemudou.

¹⁵ Au sa sega ni vakatokai kemudou tale mo dou noqu bobula, baleta ni sa sega ni dau kila na bobula na ka e cakava tiko na nona turaga; ia ka'u sa vakatokai kemudou mo dou noqu i tokani voleka sara, baleta ni'u sa vakatakila vei kemudou na ka kecega au sa rogoca mai vei Tamaqu.

¹⁶ Dou sa sega ni digitaki au, ia ka'u sa digitaki kemudou, ka'u sa lesi kemudou mo dou lako ka vuavuai vakalevu sara ena vuamudou sa tudei. Ena solia kina vei kemudou o Tamaqu na ka kecega dou sa kerea vua ena yacaqu.

¹⁷ Sa i koya oqo na ka au sa vakarota vei kemudou: mo dou veilomani.

Cati e Vuravura

¹⁸ “Kevaka sa cati kemudou o vuravura, dou kila ni sa cati au taumada ni bera ni cati kemudou.

¹⁹ Kevaka dou sa nei vuravura, ena lomani kemudou o vuravura me vaka na nona sa dau lomana na ka e nona. Ia ka'u sa digitaki kemudou mai na vuravura oqo, ni dou sa sega ni okati mo dou kai vuravura; o ya na vuna sa cati kemudou kina o vuravura.

²⁰ Dou nanuma tiko na vosa ka'u a tukuna vei kemudou, ‘E sega ni levu cake na bobula mai vua na nona turaga.’ Kevaka era sa vakacacani au na tamata, era na vakacacani kemudou talega; ni kevaka era sa muria na noqu vosa, era na muria talega na nomudou vosa.

²¹ Ia era na cakava na veika kecega oqo vei kemudou baleta ni dou sa noqu; ka ni ra sa sega ni kilai koya sa a talai au mai.

²² Kevaka au a sega ni lako mai me'u vosa vei ira, ke ra a sega ni liaca na nodra i valavala ca: ia oqo, sa sega na i ulubale ni nodra i valavala ca.

²³ O koya sa cati au, sa cati Tamaqu talega.

²⁴ Era na sega ni liaca na nodra i valavala ca kevaka au sa sega ni mai vakayacora ena kedra maliwa na veicakacaka ka sega ni se vakayacora rawa e dua na tamata. Ia oqo era sa raica na veika ka'u sa vakayacora, ka ra sa cati keirau kei Tamaqu.

²⁵ Sa vakayacori sara kina na ka e volai tu ena nodra Lawa, ‘Era sa cati au, ia sa sega na vuna era sa cati au kina.’

²⁶ “Ena lako mai na Dauveivuke, o ya na Yalo Tabu, o koya sa mai vakatakila na veika dina me baleta na Kalou. Sa lako mai vei Tamaqu o koya. Io au na talai koya yani vei kemudou mai vei Tamaqu, ka na vosa ena vukuqu o koya.

²⁷ Oi kemudou talega dou na dau vosa ena vukuqu, baleta ni dou sa dau tiko vata kei au mai na i tekivu ni gauna.