Joni 11 - Vakavakadewa Vou kei na iVola tale eso

Na Mate i Lasarusa

¹ E a qai tauvi Lasarusa e dua na mate. O Lasarusa e kai Pecani, na nodrau koro o Maria kei Marica na tuakana.

² Sa i Maria oqo ka a lumuta na Turaga ena waiwai, ka quata na yavana ena drauniuluna. A ganena o Lasarusa, o koya ka tauvimate.

³ E rau a talatala vei Jisu o rau na ganena, ka kaya, “Turaga, sa tauvimate o koya o ni sa dau lomana.”

⁴ Ni sa rogoca o Jisu, sa qai kaya, “Na i cavacava ni tauvimate oqo e sega ni mate nei Lasarusa; sa yaco ga oqo me vakarokorokotaki kina na Kalou, ni sai koya oqo na sala ena vakarokorokotaki talega kina na Luve ni Kalou.”

⁵ A sa dau lomani Marica, kei tacina, vata kei Lasarusa o Jisu.

⁶ Ia ni sa rogoca na nona tauvimate voli o Lasarusa, a sa tiko tale yani o koya ena vanua sa tiko kina me rua tale na siga.

⁷ Ni oti o ya, a sa qai kaya vei iratou na nona tisaipeli, “Me datou lesu tale mada ki Jutia.”

⁸ E ratou sa qai kaya vua na tisaipeli, “Vakavuvuli, ena dua walega na gauna e se qai oti oqo era a via vakaviriki kemuni o ira na Jiu; ia o ni sa via lesu tale kina oqo?”

⁹ Sa qai sauma o Jisu, “E sega li ni tinikarua na aua ena dua na siga? Kevaka sa lako e dua na tamata ena loma ni siga, ena sega ni tarabe, ni sa raica tiko na rarama ni vuravura oqo.

¹⁰ Ia kevaka sa lako e dua ena bogi, ena tarabe, ni sega ni tiko vua na rarama.”

¹¹ A sa kaya na vosa oqo o Jisu ka tukuna tale vei iratou, “Sa moce koto na nodatou i tokani o Lasarusa, ia au na lako me'u la'ki vakayadrati koya.”

¹² E ratou a qai kaya na nona tisaipeli, “Turaga, kevaka e moce walega, ia ena bula vinaka tale.”

¹³ A sa vosa vakaoqo o Jisu ni sa mate o Lasarusa, ia e ratou sa nanuma ni sa moce walega o koya.

¹⁴ Sa qai kaya vakamatata vei iratou o Jisu, “Sa mate o Lasarusa,

¹⁵ ia ena vukumudou ka'u sa vakavinavinaka kina ni'u a sega ni tiko mai kea, me rawa kina ni dou vakabauta oi kemudou. Me datou sa lako sara yani vua.”

¹⁶ Sa qai kaya vei iratou na nona i tokani tisaipeli o Tomasi (o koya sa vakatokai na Drua), “Tou lako kecekece kei na i Vakavuvuli, me datou la'ki mate vata kaya!”

O Jisu na Tu Cake Tale kei na Bula

¹⁷ Ni sa yaco kina o Jisu, sa qai kila ni sa koto bogi va oti o Lasarusa ena i bulubulu.

¹⁸ E tiko volekati Jerusalemi ga o Pecani, e rauta e rua vakacaca na kilomita.

¹⁹ Era lewe vuqa na Jiu era a lako vei rau o Marica kei Maria, me ra vakacegui rau ena vuku ni ganedrau.

²⁰ Ni se qai rogoca ga o Marica ni sa lako yani o Jisu, a sa la'ki tavaki koya; ia sa tiko ga mai vale o Maria.

²¹ Sa qai kaya vei Jisu o Marica, “Turaga, kevaka o ni a tiko eke, ke a sega ni mate na ganequ.

²² Ia au kila tiko ni na solia ga vei kemuni edaidai na Kalou na ka cava ga o ni kerea vua.”

²³ Sa qai kaya vua o Jisu, “Ena tu cake tale ki na bula na ganemu.”

²⁴ Sa kaya vua o Marica, “Au sa kila ni na tu cake tale o koya ki na bula ena i otioti ni siga.”

²⁵ Sa qai kaya vua o Jisu, “Oi au na vu ni tucake tale kei na vu ni bula: o koya sa vakabauti au, kevaka sa mate, ena bula ga;

²⁶ ia o koya sa bula tiko ka vakabauti au ena sega sara ni mate. O sa vakabauta na ka oqo, se segai?”

²⁷ Sa qai kaya vua o koya, “Io Turaga! Au sa vakabauta ni sai kemuni na Mesaia, na Luve ni Kalou, o koya ka sa namaki me lako mai ki vuravura.”

Sa Tagi o Jisu

²⁸ Ni sa kaya oti o ya o Marica, sa qai lesu yani, ka kaciva lo na tacina o Maria, ka kaya, “Sa tiko oqo na i Vakavuvuli, ka sa tarogi iko tiko.”

²⁹ Ni sa rogoca o Maria, sa tu cake sara, ka lako vei Jisu.

³⁰ Oqo e se bera tiko ni curu o Jisu ki na koro, ka se tiko ga ena vanua ka a tavaki koya kina o Marica.

³¹ Ia o ira na Jiu era sa tiko vata kei Maria e vale me ra vakacegui koya, era sa qai muri koya. Era nanuma ga ni sa lako ki na i bulubulu o koya me la'ki tagi kina.

³² A sa yaco yani o Maria ki na vanua sa tiko kina o Jisu. Ni sa raici koya, sa qai cuva sobu ki yavana, ka kaya, “Turaga, kevaka o ni a tiko eke, ke a sega ni mate na ganequ!”

³³ Ni sa raica o Jisu na nona tagi kei na nodra tagi na Jiu era a lako vata kaya yani, a sa vutugu na yalona ka rarawa vakalevu na lomana.

³⁴ A sa tarogi ira, “E vei na vanua o ni buluti koya kina?” Era sa kaya vua, “Turaga, ni lako mai ka raica.”

³⁵ Sa tagi o Jisu.

³⁶ Era sa kaya kina na Jiu, “Raica mada na levu ni nona lomani koya!”

³⁷ Ia era sa kaya eso vei ira, “E sega beka ni o koya oqo ka a vakavuna me rai rawa tale na mataboko? A rawa beka vua me a tarova na mate i Lasarusa?”

Vakabulai Tale mai na Mate o Lasarusa

³⁸ Sa qai vutugu tale kina e yalona o Jisu ka lako ki na i bulubulu. Na i bulubulu o ya e dua na qara vatu, ka kena i sogo e dua na vatu.

³⁹ Sa qai kaya o Jisu, “Ni kauta tani na vatu!” Sa kaya vua o Marica, na ganei koya ka a mate, “Turaga, oqo e sa na bona na yagona; ni sa oti e va na bogi na nona mate.”

⁴⁰ Sa qai kaya vua o Jisu, “Au a sega li ni kaya vei iko, ni o na raica ga na kaukauwa ni Kalou kevaka o vakabauta?”

⁴¹ Era sa qai kauta tani na vatu. Sa qai tacake o Jisu, ka kaya, “I Tamaqu, au sa vakavinavinaka vei kemuni ni o ni sa rogoci au.

⁴² Au kila ni o ni sa dau rogoci au ena veigauna kecega, ia au sa cavuta ga oqo ena vukudra na tamata era sa tu vakavolivoliti au oqo, me ra vakabauta kina ni o ni sa talai au mai.”

⁴³ Ni sa cavuta oti o Jisu na veivosa oqo, sa qai kaci ena domo levu ka kaya, “Lasarusa, mo tucake mai!”

⁴⁴ Sa qai tucake mai o koya, ka sa viviraki tu na yavana kei na ligana ena i sole ni mate, ka viviraki na uluna ena dua na i sulu. Sa qai tukuna vei ira o Jisu, “Dou sereki koya, ka laiva me lako.”

Na Bukiveretaki i Jisu

⁴⁵ Ni ra sa raica na veika sa cakava o Jisu o ira na Jiu ka la'ki sikovi Maria, era sa vakabauti koya.

⁴⁶ Ia eso vei ira era a lesu tale vei ira na Farisi ka la'ki tukuna na veika sa cakava o Jisu.

⁴⁷ Era sa mani soqoni vata kina me dua na nodra bose o ira na bete levu kei ira na Farisi, ka ra sa kaya, “Na cava me da cakava? Ni sa vuqa na veicakacaka mana sa cakava na tamata oqo.

⁴⁸ Kevaka eda vakalaivi koya tikoga vakaoqo, era na vakabauti koya na tamata kecega, ka ra na qai lako mai na kai Roma ka kauta tani ruarua na noda i tikotiko tabu kei na noda matanitu.”

⁴⁹ Ia e dua vei ira o ya o Kaiava, na Bete Levu ena yabaki o ya. Sa qai kaya vei ira o koya, “O ni sa sega ni kila e dua na ka!

⁵⁰ E sega li ni o ni kila ni vinaka cake me mate e dua na tamata ena vukudra na tamata, ka ca ni mai vakarusai na matanitu taucoko?”

⁵¹ A sa sega ni tukuna ga vakataki koya na veika oqo; ia, me vaka ni sa Bete Levu o koya ena yabaki o ya, a sa parofisaitaka ni na mate o Jisu ena vukudra na Jiu,

⁵² ka segai walega ena vukudra, ia me yaco oqo me rawa ni ra vakasoqoni vata tale mai na tamata ni Kalou era sa veiseyaki tu, me ra sa duabau ga.

⁵³ Me tekivu mai na siga o ya ka lako yani, era sa dau bosei koya na nodra i liuliu na Jiu se me ra na vakamatei koya vakacava.

⁵⁴ Sa mani sega kina ni veilakoyaki ena matana votu o Jisu ena kedra maliwa na Jiu; ia sa lako ga ki na vanua sa voleka ki na vanua lala, ki na koro o Ifereimi, ka sa tiko kina kei iratou na nona tisaipeli.

⁵⁵ A sa voleka mai na gauna ni Solevu ni Lakosivia, ka ra sa lako ki Jerusalemi e lewe vuqa mai taudaku me ra la'ki vakasavasavataki ira ni bera na solevu.

⁵⁶ Era a vakasaqarai Jisu voli, ka veitarogitaka vakai ira ni ra sa la'ki tu ena Valenisoro, ka kaya, “A cava o ni nanuma? Ena lako beka mai o koya ki na Solevu?”

⁵⁷ Era sa vakarota oti o ira na bete levu kei ira na Farisi ni kevaka e dua e kila na vanua e tiko kina o Jisu, me qai tukuna sara vei ira, ka me ra la'ki vesuki koya.