Jona 4 - Vakavakadewa Vou kei na iVola tale eso

Na Cudru i Jona

¹ A sa sega ni marautaka o Jona na ka oqo, ka sa tuburi koya na cudru.

² A mani masu yani kina ka kaya, “I Jiova, e sega li ni ka oqo ka'u a sa tukuna ni o ni na cakava ni'u se bera ni biuta na noqu vanua? O ya na vuna ka'u a saga kina ena noqu i gu taucoko me'u dro ki Tasisi mai Sipeini. Au sa kila ni o kemuni na Kalou yalovinaka ka yalololoma. O ni sa rui dauvosota, o ni dau lomavinaka ka dauvakarau tu mo ni veisautaka na nomuni vakasama mo ni kakua ni dauveitotogitaki.

³ Ia oqo, kemuni Jiova, ni laivi au ga me'u mate. E vinaka cake vei au me'u mate mai na noqu bula tiko.”

⁴ A sa qai tarogi Jona o Jiova, “Na dodonu cava mada e tu vei iko mo cudru kina?”

⁵ Sa mani gole yani o Jona vaka ki na tokalau ka la'ki tiko kina. A sa qai cakava e dua na i vakavakaruru ka tiko sobu e rukuna, ka waraka toka me sarava se na cava ena qai yaco ki na koro o Ninive.

⁶ Sa qai vakavuna na Kalou o Jiova me tubu cake mai e dua na kau me vakarurugi Jona, me rawa ni kunea kina eso na vakacegu. A sa marautaka sara vakalevu o Jona na kau o ya.

⁷ Ia ena mataka lailai ni siga e tarava, a sa qai lewa na Kalou me mai vakamatea na kau oqo e dua na banuve, ka mani mate sara kina.

⁸ Ni cabe oti na matanisiga, a qai vakaliwava mai na Kalou e dua na tokalau katakata, ka voleka me matabuto kina o Jona ena vuku ni katakata ni siga sa cilava sobu na uluna. A sa gadreva sara me mate, ni sa kaya, “E vinaka cake vei au me'u mate mai na noqu bula tiko.”

⁹ Ia sa kaya vua na Kalou, “Na dodonu cava li e tu vei iko mo cudruvaka kina na kau?” A sa kaya o Jona, “Sa tu vei au na dodonu me'u cudruvaka — io me'u cudru ka mate sara kina!”

¹⁰ A sa kaya vua o Jiova, “Na kau oqo sa tubu ga ena dua na bogi ka yali tale ena bogi e tarava; o a sega ni bau cakava kina e dua na ka, o a sega ni vakavuna talega na kena tubu cake mai — ia o sa qai rarawataka ga!

¹¹ Me'u na qai sega vakacava ni lomani Ninive, na koro levu o ya. Era sa tiko talega kina e sivia na 120,000 na gone tawa cala, ka vakakina e vuqa sara na manumanu!”