Jona 3 - Vakavakadewa Vou kei na iVola tale eso

Sa Talairawarawa vei Jiova o Jona

¹ A sa vosa tale vei Jona o Jiova, ka kaya,

² “Mo lako ki na koro levu o Ninive ka la'ki vunautaka vei ira na tamata na i tukutuku ka'u na solia vei iko.”

³ A sa qai talairawarawa o Jona ki na vosa i Jiova, a sa lako ki Ninive, e dua na koro levu ka sa taura e tolu na siga na kena lako takosovi.

⁴ A sa tekivu o Jona me lako kosova na koro, ia ni oti e dua na siga na nona lako voli, a sa vakatekivu me vunau ka kaya, “Sa vo ga e vasagavulu na siga me vakarusai kina o Ninive!”

⁵ Era sa vakabauta na vosa ni Kalou na kai Ninive. Ia era a qai lewa me ra lolo na tamata kecega, a tekivu sara mai vei ira era cecere me yacovi ira era lalai sara, me ra vakaisulu taga me ra vakaraitaka na nodra sa veivutuni.

⁶ Ia ni sa rogoca na tui Ninive, a sa tucake mai na nona i dabedabe vakatui, sa luvata na nona i sulu vakatui ka daramaka na i sulu taga me la'ki tiko sobu ena dravusa.

⁷ Sa qai vakauta e dua na i tukutuku vei ira na lewe i Ninive me vakaoqo: “Oqo na i vakaro mai vua na tui kei ira na nona vakailesilesi: me kakua sara ni dua me kania e dua na ka; na tamata kece sara, na bulumakau, kei na sipi me ra kakua ni kania e dua na ka se me ra gunu.

⁸ Na tamata kece sara kei ira na manumanu kece me ra vakaisulu taga. Na tamata yadua me masu vagumatua vua na Kalou ka me biuta talega na nona i valavala kei na i vakarau ca.

⁹ De sa na veisautaka kina na lomana na Kalou; de sa na oti beka kina na nona cudruvi keda, ka da na qai sega ni mate!”

¹⁰ A sa raica na Kalou na ka era sa vakayacora; a sa raica ni ra sa biuta tani na nodra i valavala vakasisila. Sa qai mani veisautaka kina na lomana ka sega ni cudruvi ira me vaka sa kaya oti ni na vakayacora.