Jona 2 - Vakavakadewa Vou kei na iVola tale eso

Na Masu i Jona

¹ A sa masu o Jona vei Jiova na nona Kalou mai na loma ni kete ni ika, ka kaya,

² “I Jiova, au sa kaci yani vei kemuni Ena dela ni noqu rarawa, Ka o ni sa sauma na noqu kaci. Mai bulu, na vuravura ni mate Au sa masuta na nomuni veivuke Ka o ni sa rogoci au mai.

³ O ni a biuti au ki na wasa liwa titobu, Ki na boto ni sauloa, Ki na vanua sa voliti au kina na wai, Ka sa viviraki au na nomuni biau lelevu.

⁴ Au sa nanuma wale ga De'u sa tawasei tani mai na matamuni Ka sega ni raica tale na nomuni vale tabu.

⁵ Sa ubi au na wai ka'u voleka ni luvu; Sa ubi au vakadua na wasawasa, Ka viviraka na uluqu na lumi ni waitui.

⁶ Au sa lutu dromu sara ki na vu ni veiulunivanua, Ena vanua sa sogolati vakadua na kena matamata. Ia oi kemuni Jiova, na noqu Kalou O ni sa vueti au bula tale mai na rusa.

⁷ Ni'u vakila ni sa seyavu yani na noqu bula, Ia ka'u sa qai masuti kemuni, i Jiova, Ka o ni sa rogoci au mai na nomuni vale tabu.

⁸ O ira sa dauqarava na veimatakau tawayaga Era sa biuta tani na nodra yalodina vei kemuni.

⁹ Ia oi au, ka'u na seretaki kemuni ga; Ka'u na vakacaboisoro vei kemuni, Ka cakava na ka au sa yalataka. Sa vu ga mai vei Jiova na veivakabulai!

¹⁰ A sa qai vakarota na ika o Jiova me luaraki Jona ki matasawa, a sa yaco me vakakina.