Joeli 2 - Vakavakadewa Vou kei na iVola tale eso

Vakatakilakila ni Siga i Jiova na Qele ni Vodre

¹ Dou uvuca na davui e Saioni; Dou vakatagica na alamu Ena noqu ulunivanua tabu! Dou sautaninini na leweniveivanua, Ni sa lako mai na siga i Jiova.

² E dua na siga vakaturubuto, E siga ni veio butobuto levu! Sa tadu mai na mataivalu qele ni vodre levu A sa vaka na buto e solega na veiulunivanua; E se qai yaco vakadua oqo, Ka na sega ni yaco tale maimuri.

³ Sa liu vei ira na bukawaqa ka veivaqeavutaki; E dakudra talega na yameyame ni buka ka veivakamai; Sa koto e matadra na vanua sa tautauvata kei na i teitei o Iteni; Ia, e dakudra, na dravuisiga ka sega na ka e dro bula.

⁴ Na kedra i rairai sa vaka na ose; Era sa cici me vaka na ose ni valu.

⁵ Ni ra sa ladeva na dela ni veiulunivanua, Era sa vaka na rorogo ni qiqinivalu; Ka cacalidilidi me vaka na rorogo ni kama ni co mamaca. Era sa tuvani tu me vaka e dua na mataivalu levu Sa vakarau me vakacibi i valu.

⁶ Era sa taqaya sara na tamata ni ra basika mai; Sa tavuki na matadra kecega ena rere.

⁷ Era sa vakataki ira na mataivalu sa kaba koro Me vakataki ira na sotia era sa kabata na bai. Era ravuravu vakadodonu ki na nodra dui sala Ka sega e dua me gole tani mai na nodra gaunisala.

⁸ Era sega ni veidrigidrigiti, Era dui muria ga na nodra gaunisala; Era bolea na gasau ka sega ni tu vakasuka.

⁹ Era ladeva na koro, Ka ra ciciva na dela ni bai; Era curu botea yani na veivale, Ka curu yani e katubaleka me vaka na daubutako.

¹⁰ Sa uneune na vanua era butuka yani Ka sakure na lomalagi. Sa tabogo na matanisiga kei na vula, Ka ra tabonaka na kedra rarama na veikalokalo.

¹¹ A sa tabalaka na domona na Kalou Ki vua sa liutaki ira na nona mataivalu; Ni sa vakaitamera na nona mataivalu, O koya sa tu vua na lewa Me vakayacora na nona vosa sa kaukauwa. Ni sa ka levu ka rerevaki na siga i Jiova; O cei ena vosota rawa?

¹² “Ia oqo ga,” sa kaya o Jiova, “Dou lesu mai vei au ena yalomudou taucoko, Dou lolo talega, ka tagi ena vakaloloku.

¹³ Me dusia na nomudou veivutuni dina Na yalo sa raramusumusu; Ni sa sega ni yaga na dresulaki wale ga ni nomudou i sulu.” Dou lesu vei Jiova na nomudou Kalou, Ni sa yalovinaka ka yalololoma o koya; Sa berabera na nona cudru Ka vutuniyau ena loloma sa tudei; Dou veivutunitaka na nomudou caka cala.

¹⁴ O cei li e kila rawa De veisautaka na lomana o Jiova na nomudou Kalou Ka vakalougatataki kemudou ena sautu ni kakana. Dou na qai rawa ni vakacaboisoro kina vua.

¹⁵ Dou uvuca na davui mai Saioni; Dou vakatabuya e dua na siga ni lolo; Dou kaciva e dua na vakasoqoni vata!

¹⁶ Vakasoqoni ira mai na tamata; Vakasavasavataki ira na lewenivanua; Vakasoqoni ira vata mai na qase, Kauti ira mai na gone lalai, Kei ira talega na gone dramidrami. O ira talega era se qai vakawati vou Me ra biuta na nodra rumu ka lako mai.

¹⁷ Me ra tagi ga ka cabo masu O ira na bete kei na i talatala i Jiova dauveiqaravi Ena maliwa ni matamata ki na Valenisoro Kei na i cabocabonisoro, ka kaya: “Ni yalololoma vei ira na nomuni tamata, na Kalou, Ni kakua ni cudruvi keimami Se me ra vakalialiai keimami na veimatanitu Ni ra sa kaya, “Evei na nomudou Kalou?”

Na Kalou sa Vakalougatataka Tale na Vanua

¹⁸ A sa kauwaitaka tale o Jiova na nona vanua Ka yalololoma tale vei ira na nona tamata.

¹⁹ Sa qai kaya o Jiova Vei ira na nona tamata: “Raica, au na solia yani vei kemudou Na sila, na waini, kei na waiwai Mo dou mamau kina: Ka'u na sega ni laivi kemudou tale Mo dou vakalialiai mai vei ira na veimatanitu.

²⁰ “Au na kauti tani na mataivalu qele ni vodre sa lako mai na vualiku; Ka'u na vakatala eso vei ira ki na vanua lala, Na i yatu e liu era na vakatalai ki na Waitui Mate, Kei na i yatu e muri ki na Meditereni. Ena tete na boi ca ni yagodra mate. Au na vakarusai ira ena vuku ni veika era sa cakava vei kemudou.

²¹ Mo kakua ni rere, na vanua; Mo reki ga ka marau, Ni sa cakava na veika lelevu o Jiova!

²² Dou kakua ni rere, na manumanu ni vanua, Ni sa tubu na veico ena veikau; Sa vuataka na vuana na kau, Na lolo kei na vaini sa vua vakalevu sara.

²³ Dou marau, na luve i Saioni, Ka reki ena Turaga, na nomudou Kalou, Ni sa vakatauca na uca Me nomudou i vakadinadina; Sa vakatauca vakalevu na uca vei kemudou, Na uca taumada kei na uca taumuri Me vaka ena gauna e liu.

²⁴ Na buturara ni qaqi sila Ena sinai ena sila, Ena vuabale na taqe Ena waini kei na waiwai.

²⁵ Au na sauma lesu vei kemudou na veiyabaki Sa kania na qele ni vodre, Na vodre ladelade, na vodre ququru Kei na vodre dauveivakarusai. Ni sai au ga sa tala yani vei kemudou Na mataivalu oqo.

²⁶ “Dou na sautu ena kakana ka mamau, Ka vakacaucautaka na yaca ni nomudou Turaga Na nomudou Kalou, O koya sa mana na nona cakacaka vei kemudou Ia era na sega tale ni na vakamaduataki na noqu tamata.

²⁷ Dou na qai kila ni'u sa tiko kei ira na Isireli, Sa i au ga o Jiova, ka'u sa nomudou Kalou, Ka sa sega tale e dua. Era na sega tale vakadua Ni vakamaduataki na noqu tamata.

²⁸ Ia ena qai yaco ena gauna mai muri, Ka'u na sovaraka na yaloqu Vei ira na tamata kecega; Era na parofisai na luvemudou gonetagane Kei ira na luvemudou goneyalewa, O ira na nomudou qase Era na tadra na tadra eso, Kei ira na nomudou cauravou Era na raica na raivotu.

²⁹ Au na sovaraka talega na yaloqu Vei ira na bobula tagane kei na yalewa Ena gauna o ya.

³⁰ Ia ka'u na vakatakila na veika e veivakidacalataki mai lomalagi e vuravura talega, na dra, kei na bukawaqa kei na duru kubou.

³¹ Na matanisiga ena vuki me butobuto, kei na vula me dra, ena qai yaco mai e muri na siga i Jiova, na siga levu ka rerevaki.

³² Ia mai muri, o koya yadua ena masuta na yaca i Jiova e bula: Io, ena ia na veivakabulai mai na ulunivanua o Saioni, kei Jerusalemi, me vaka sa kaya o Jiova. Io, vei ra sa vakabulai ena tiko kina eso au sa kaciva.