Joeli 1 - Vakavakadewa Vou kei na iVola tale eso

¹ Oqo na vosa i Jiova vei Joeli na luve i Pecueli.

Era Tagicaka na Tamata na Vakacacani ni Teitei

² Dou rogoca oqo, oi kemudou na qase, Ka vakatudaliga na lewenivanua kecega! A sa yaco beka e dua na ka vakaoqo Ena nomudou gauna? Se na nodra gauna na nomudou qase?

³ Dou tukuna vei ira na luvemudou; Ka me ra tukuna o ira na luvemudou Vei ira na luvedra; Kei na luvedra me ra qai tukuna Ki na i tabatamata e tarava yani.

⁴ A ka sa vakavoca na vodre dauquru, Sa kania na vodre dina, A ka sa vakavoca na vodre dina, Sa kania na vodre dramidrami. A ka sa vakavoca na vodre dramidrami, Sa kania na kena yavato.

⁵ Dou yadra ka tagi, na daumateni; Dou qoqolou, na daugunu waini; Na qerepi me qaqi baleta na waini vou Sa vakacacani.

⁶ Sa lako mai e dua na matanitu Ka sa kaba na noqu vanua; Sa kaukauwa ka sega ni wiliki rawa; Sa gagata sara na batidra Me vaka na bati ni laione.

⁷ A sa vakarusa na noqu veivaini, Ka sa kania na noqu vunilolo. A sa vocia tani na kulidra Ka kolotaka sobu ki ra. Sa vuki me vulavula na tabadra.

⁸ Mo tagi me vaka e dua na goneyalewa Sa sulumaka na taga ena vakalolokutaki Vua na tagane sa dodonu me rau vakamau.

⁹ Sa muduki mai na vale i Jiova Na i madrali laukana kei na i madrali liviraki; Era sa tagi na bete, Na i talatala i Jiova.

¹⁰ Sa dravuisiga na veivanua, Sa tagi ni vakaloloku na qele Baleta ni sa vakacacani na sila. Sa mamaca vakadua na waini, Ka sa malai na vuniolive.

¹¹ Dou yalorarawa, na dauteitei; Dou tagi na dausasamaki ni veivaini Baleta ni sa vakarusai na witi kei na barile Io, sa vakarusai na vuata kece ni vanua.

¹² Sa malai na vunivaini, Ka raqosa na vunilolo. Na pomekaraneti, niusawa kei na apolo — Io, na kau kecega ni vanua sa malai; Sa yali vakakina na reki vei ira na tamata.

¹³ Dou vakaisulu taga na bete ka tagi Oi kemudou na bete dauvakacaboisoro! Dou curu ki loma ni Valenisoro Ka vakaloloku ena bogi taucoko! Sa sega sara na sila se na waini Me i madrali vua na nomudou Kalou.

¹⁴ Dou vakatabuya e dua na siga Me ia kina na lolo; Dou vakasoqoni ira vata mai Na lewenivanua e Juta Ki na vale i Jiova na nomudou Kalou Ka tagi ki vua.

¹⁵ Oilei na siga o ya! Ni sa voleka mai na siga ni Turaga, Na siga ni veivakarusai ni Kalou kaukauwa.

¹⁶ Sa sega li ni muduki vei keda Mai na vale ni noda Kalou Na keda kakana Kei na marau vata na reki?

¹⁷ Sa vuca na sorenikau E loma ni qana; Sa sega na sila me maroroi Ka sa rusa na kena lololo.

¹⁸ Sa tagi ena vutugu na manumanu! Era kidroa na qele ni bulumakau Ni sa sega na vanua veico; Era sa vakaloloma talega O ira na qele ni sipi.

¹⁹ Au sa tagi vei kemuni na Kalou Ni sa kania na bukawaqa Na veico kei na veikau, Ka sa vakama na yameyame Na veivunikau kecega ni vanua.

²⁰ Era sa tagi talega yani kemuni Na manumanu kila Baleta ni sa maca na veiwaidrodro; Ka sa vakarusa na veico kei na veikau Na yameyame ni buka.