Jeremaia 52 - Vakavakadewa Vou kei na iVola tale eso

Bale o Jerusalemi

¹ A cabeta na i dabedabe vakatui o Setekaia ena i ka ruasagavulu ni yabaki ni nona bula, ka veiliutaki tiko e Jerusalemi ena loma ni tini kadua na yabaki. Na yaca i tinana o Lipina.

² A cakava o Setekaia na tui na veika ca ena mata ni Turaga o Jiova me vaka e dau cakava o Jo-akimi.

³ Sa toro sobu sara na veika e yaco e Jerusalemi kei Juta ka sa cudru sara kina o Jiova ka lewa me ra kau tani vakabobula. A bese ni vakarorogo o Setekaia vua na tui Papiloni.

⁴ Ia ena i ka tini ni vula ena i kaciwa ni yabaki e tui kina o Setekaia e Juta, sa lako mai kina o Nepukanesa na tui Papiloni kei na nona mataivalu taucoko ka valuti Jerusalemi. Era sa mai tara na nodra i tikotiko ni valu ena taudaku ni koro ka tara cake na i kabakaba me ra samuta wavokita kina na bai ni koro.

⁵ A valuti tiko na koro me yacova na i katini kadua ni yabaki i Setekaia.

⁶ Ena i kaciwa ni siga ni ka va ni vula ena yabaki o ya a kaukauwa sara kina na viakana ka sa sega na ka me ra kania na tamata.

⁷ Ia a qai kabasu na bai ni koro. Era a qai tovolea na sotia kece me ra dro ena bogi, ia era a wavokita tu na koro na kai Papiloni. Era a muria na sala ki na i teitei ni tui, ka lako ena veimama ni bai ka dro yani vaka ki na buca ki Joritani.

⁸ Ia era a qai vakasavi Setekaia na tui na kai Papiloni ka la'ki vesuki koya ena buca volekati Jeriko. Era a drotaki koya kece na nona sotia.

⁹ Era a vesuki Setekaia ka kauti koya vei Nepukanesa na tui ka tiko mai na koro o Ripila ena vanua o Emaci, ka veilewaitaki koya mai kea o Nepukanesa. A vakamatei iratou na luve i Setekaia mai Ripila o Nepukanesa ni rai tu ga o Setekaia.

¹⁰ A vakamatei ira talega na turaga e Juta.

¹¹ A qai leuta tani na mata i Setekaia ka vesuki koya ena sinucodo me kau ki Papiloni. A tiko o Setekaia ena vale ni veivesu mai Papiloni me yacova na siga a qai mate kina.

Vakarusai ni Vale ni Soro

¹² Ena i katini ni siga ni kalima ni vula ni i katini kaciwa ni yabaki i Nepukanesa na tui Papiloni a curu kina ki Jerusalemi o Nipusaretani na dauvakasala ni tui ka i liuliu ni nona mataivalu.

¹³ A vakama na Valenisoro, na valenitui kei na nodra vale kece na tamata cecere mai Jerusalemi,

¹⁴ ka ra sa basuka sobu na bai ni koro na nona sotia.

¹⁵ Ia a qai kauti ira yani vakabobula ki Papiloni o Nepusaratani na tamata era vo tu mai ena koro vata kei ira era a vuki me ra to vua na tui Papiloni kei ira kece na kila cakacaka era vo tu.

¹⁶ Ia a qai biuta tu ga mai e Juta eso na tamata dravudravua sara, ka sega na ka era taukena, sa biuti ira tu me ra qarava na veivaini kei na i teitei.

¹⁷ Era a vorolaka vakamatailalai na veiduru parasa na kai Papiloni kei na veitutu ena Valenisoro vata kei na beseni parasa ni wai ka tu e kea. Era a kauta kece na parasa ki Papiloni.

¹⁸ Era a kauta talega na i sivi kei na ka e dau tawa kina na dravusa ka dau vakayagataki ena kena vakasavasavataki na i cabocabonisoro, na i bokoboko ni cina, na beseni era dau tawa kina na dra ni manumanu vakacabori, kei na beseni e dau tawa kina na ka boi vinaka me vakamai, kei na veiyaya parasa kecega e dau vakayagataki ena Valenisoro.

¹⁹ Era a kauta kece yani na veiyaya e caka ena koula se na siliva: na beseni lalai, na miqa e dau kau kina na qilaiso waqa, na beseni era dau tawa kina na dra ni manumanu era vakacabori, na ka era dau tawa kina na dravusa, na i tutu ni cina, na disi ni ka boi vinaka kei na beseni era dau tawa kina na i soro liviraki.

²⁰ Na veiyaya parasa e a cakava na tui o Solomoni me baleta na Valenisoro, na duru e rua, na i tutu, na beseni levu, na bulumakau parasa e tini karua era sa tokona tu sa sivia sara na kena bibi.

²¹ Sa tautauvata na duru ruarua e 8 na mita na kedrau balavu yadua ka 5.3 na mita wavokita na tolodrau. E rau sa vakalomana ka 75 na milimita na vavaku ni kaukamea.

²² Ena ulu ni duru yadua sa yadua kina na i wasewase ni parasa, sa 2.2 na mita na kena cere ka sa ceuti wavoki ena talitali kei na pomekaraneti ena veiyasana.

²³ Sa 96 na pomekaraneti ena veiyasana; ka 100 na pomekaraneti era vakavolivolita na talitali.

Kau ki Papiloni na Jiu

²⁴ Ia na turaganivalu liu sa kauti Seraia na bete levu, o Sefanaia e dua tale na bete e taravi koya, kei na tolu tale na vakailesilesi cecere ena Valenisoro.

²⁵ A sa kauta tani mai na koro e dua na tamata sa liutaki ira na sotia, e vitu na dauvakasala ni tui era tiko ena koro, na turaganivalu liu veivuke, ka qarava na i tukutuku vakaivalu, kei na 60 tale na tamata vakailesilesi.

²⁶ A kauti ira o Nepusaratani vua na tui Papiloni ka tiko mai Ripila.

²⁷ A vakanakuitataki ira ka vakamatei ira na tui Papiloni mai Ripila ena vanua o Emaci. Era a kau tani vakabobula na lewe i Juta mai na nodra vanua.

²⁸ Oqo na kedra i tukutuku na tamata a kauti ira vakabobula o Nepukanesa; ena i kavitu ni nona yabaki ena i tutu vakatui e a kauta tani kina e 3,023 na tamata;

²⁹ ena i ka 18 ni nona yabaki, era lewe 832 na tamata mai Jerusalemi;

³⁰ ia ena i ka 23 ni yabaki, a kauta tani kina o Nepukanesa e 745 na tamata. Na levu kece ni tamata era kau vakabobula era sa lewe 4,600 na tamata.

³¹ Ena yabaki a tui kina e Papiloni o Ivilimirotaki, a qai yalo loloma vei Jo-akini ka sereki koya mai na vale ni veivesu. E a yaco na ka oqo ena i ka 35 ni yabaki mai na gauna a kau kina vakabobula o Jo-akini.

³² A sa caka vinaka vei Jo-akini o Ivilimirotaki ka solia vua e dua na i tutu dokai mai vei ira na tui kece era a vakabobulataki vata kaya mai Papiloni.

³³ A solia talega vei Jo-akini me veisau mai na nona i sulu ni bobula ni kai vesu ka me dau kana vata kei na tui ena vo ni nona gauna ni bula sa vo.

³⁴ A dau soli tiko vua e dua na i wase ni lavo me dau vakayagataka ena veisiga yadua me yacova sara na gauna a mate kina.