Jeremaia 51 - Vakavakadewa Vou kei na iVola tale eso

Veika ena Yacovi Papiloni

¹ A sa kaya o Jiova o Jiova, “Au na kauta mai e dua na cagi e veivakarusai me liwavi Papiloni kei ira na kena tamata.

² Au na talai ira na kai matanitu tani me ra vakarusai Papiloni me vaka e dua na cagi ni liwava tani na qa ni sila. Ni na yaco mai na siga o ya era na valuta mai na veiyasana kece ka laiva me lala tu na vanua.

³ Kakua ni solia vei ira na sotia ni Papiloni e dua na gauna me ra vanataka kina na nodra gasau ni dakaititi se daramaka na nodra i sulu ni valu. Kakua ni vakabulai ira na cauravou! vakarusa na mataivalu taucoko!

⁴ Era na mavoa ka mate tu ena veigaunisala ni nodra veikoro.

⁵ Ni sa sega sara ni laivi Isireli kei Juta na Turaga na Kalou Kaukauwa o Jiova ni lewevuqa, e dina ga era sai valavala ca vei au na Lewe Dua Bau Yalo Savasava ni Isireli.

⁶ Ni dro tani mai Papiloni! Ni dui drotaka na nona bula! Ni kakua ni mai mate ena vuku ni nodra i valavala ca na kai Papiloni me vaka na i sau ni nodra i valavala.

⁷ O Papiloni e a vaka e dua na bilo ena ligaqu, ka sa vakamatenitaka na vuravura taucoko. Era sa gunuva na veimatanitu na kena waini ka sa yali kina na yalodra.

⁸ Sa rusa vakasauri o Papiloni, ka vakarusai! Ni tagicaki koya! Ni kauta mai na wai ni bula me baleta nona mavoa, de na rawa ni vakabulai.

⁹ Era kaya na kai matanitu tani era tiko e kea, “Keimami tovolea me vukei Papiloni, ia sa bera. Ni vakarusa. Me da cavutu ka lesu ki na noda vanua. Sa vakatotogitaki Papiloni na Kalou ena nona kaukauwa taucoko ka vakarusa vakadua.”

¹⁰ A sa kaya o Jiova, “Ni kailavaka na noqu tamata,” sa vakaraitaka o Jiova na noda Kalou ni da dodonu. “Me da lako ka tukuna vei ira mai Saioni na ka sa cakava o Jiova na noda Kalou!”

¹¹ Sa yavalata o Jiova na yalodra na tui Mitia baleta ni sa nakita me vakarusai Papiloni. Ena vakaoqo na nona sauma na kena vakarusai na nona Valenisoro. Era sa vakarota na turaganivalu, “Ni vagatara na nomuni gasau ni dakaititi! Ni vakarautaka na nomuni sasabai.

¹² Ni vakaraitaka na i vakatakilakila me basuraki na bai kei Papiloni. Ni vakayaloqaqataki ira na tamata yadra. Me ra lesi na yadra. Me ra dui lako na tamata ki na nodra i tutu ni vala!” Sa cakava o Jiova na ka sa nakita me cakava, na ka sa kaya me na vakayacora vei ira na kai Papiloni.

¹³ Sa levu na uciwai kei Papiloni kei na kena i yaya talei, ia sa yaco mai na gauna me sa muduki kina na wa ni nona bula.

¹⁴ Sa bubului na Turaga Qaqa o Jiova ni lewevuqa ki na nona bula me na kauta mai e vuqa na tamata me ra valuti Papiloni me vaka e dua na qele ni vodre ka ra na kaila ena qaqa.

Sere ni Veivakacaucautaki

¹⁵ A bulia na vuravura na Turaga o Jiova Ena nona kaukauwa; A cakava na vuravura ena nona vuku, Ka sa tevuka na lomalagi ena nona maqosa.

¹⁶ Ni tau nona lewa Sa vadugu kina na wai mai lomalagi e cake; Ka kauta cake mai na o Mai na i yalayala kei vuravura. Sa vakavuna me tibi na livaliva Ni sa tau na uca, Ka tala mai na cagi mai na nona lololo.

¹⁷ Na ka oqo Sa vakavuna me ra lialia Ka sega ni yalomatua kina Na tamata kecega; Ka ra sa vakamaduataki Na dautuki kaukamea kece Ena nodra matakau Baleta ni ra sa kalou lasu; Ka sa sega vei ira na bula.

¹⁸ Era sa tawa yaga, Ka ra beci sara. Ena gauna era totogi kina Era na rusa laivi.

¹⁹ Sa sega ni vaka o ya na Kalou i Jekope; Sa i koya ga a bulia na ka kecega, Ka sa digitaki Isireli me nona tamata. O Jiova ni lewevuqa na yacana.

Na i Tuki ni Turaga

²⁰ A sa kaya na Turaga, o Jiova, “Papiloni sai iko na noqu i tuki, Na noqu i yaragi ni valu. Au sa vakayagataki iko Mo vakavurumemeataka na veivanua, Ka vorolaka na veimatanitu,

²¹ Mo basuraka na ose kei koya sa vodoka, Ka vorolaka na kareti kei koya sa kauta,

²² Mo vakamatea na tagane kei na yalewa; Ka mokuti ira na qase sara Kei ira na cauravou.

²³ Mo vakavurumemeataki ira na i vakatawa Kei na nodra qele ni manumanu, Ka basuraki ira na dauteitei Kei na nodra ose ni siviyara. Sa i iko na noqu i yaragi ka'u na voroki ira kina Na i liuliu kei na turaga.”

Totogi i Papiloni

²⁴ A sa kaya na Turaga o Jiova, “O ni na raica ni'u na sauma lesu vei Papiloni, kei ira na kena tamata na veika ca kece era sa cakava mai Saioni.

²⁵ Papiloni o sa vaka e dua na ulunivanua sa vakarusa na vuravura taucoko, ia sai au o Jiova na nomu meca. Au na tauri iko, ka vakalolovirataki iko ki na dela ni qele ka laivi iko tu ena dravusa.

²⁶ Ena sega tale ni dua na kemu vatu ena vakayagataki ena tara vale. O na vaka e dua na vanua lala ka tawa mudu.” Sa kaya ga oqo o Jiova.

²⁷ Solia na i vakatakilakila ni sa ia na tuva i valu. Vakatagica na davui ka me ra rogoca na veimatanitu. Vakarautaki ira na veimatanitu tani me ra vala kei Papiloni. Tukuna vei iratou na matanitu o Ararata, Mini kei Asekenesi me ra samu mai. Digitaka e dua na turaganivalu me liutaka na i valu. Kauti ira cake na ose me vaka e dua na qele ni vodre.

²⁸ Kauti ira mai na tui Mitia, o ira na kena i liuliu, ira na kena turaga kei ira na kena veimatanitu qali me ra vakarau vala kei Papiloni.

²⁹ Sa uneune ka yavala na vuravura baleta ni sa vakayacora na nona i naki o Jiova. Ena cakava me dua na vanua lala o Papiloni ka sega na tamata e bula kina.

³⁰ Era sa sega ni vala na sotia ni Papiloni ka ra sa tiko ga ena nodra bai ni valu. Era sa yalo lailai ka yaco me vakataki ira na yalewa. Sa kabasu na matamata ni koro ka ra sa vakamai na veivale.

³¹ Era sa cici vakaveitarataravi yani na mata me ra tukuna vua na tui Papiloni ni sa kabasu na nona koro mai na veiyasana kece.

³² Era sa taura na meca na i tatakoso e kosova na uciwai ka vakama na veico. Era sa kurabui vakalevu na sotia ni Papiloni.

³³ Ena sega ni dede era sa tamusuki ira sobu o ira na meca ka buturaki ira me vaka na sila ena rara ni butu sila. Sa kaya na Turaga Qaqa o Jiova ni lewevuqa na nodra Kalou.

³⁴ Sa tamusuki Jerusalemi na tui Papiloni ka kania. Sa vakalala sara na koro me vaka na saqa; E vaka e dua na manumanu vakaitamera sa tilomi koya. Sa taura na ka sa vinakata ka viritaka na ka sa cata.

³⁵ Laiva me ra kaya na lewe i Saioni, Me colata o Papiloni na veika kaukauwa e a caka vei keda! Laiva me ra kaya na lewe i Jerusalemi, Me colata o Papiloni na ka e da a vosota.

Vukei Isireli o Jiova

³⁶ Ia oqo a kaya na Turaga o Jiova vei ira na lewe i Jerusalemi, “Au na totaki kemuni, ka sauma na veika a caka vei kemuni. Au na vakamaca na i vurevure ni wai kei Papiloni ka vakamacara na kena wai ena kena veiuciwai.

³⁷ Ia ena yaco o Papiloni me vaka e dua na i binibini ka sa rusa ka ra vakaitikotiko kina na manumanu kila. Ena veivakurabuitaki, na kena i rairai; ena sega ni dua me na tiko e kea, ka ra na rere o ira era raica na ka sa yaco kina.

³⁸ Era na tagi kece na kai Papiloni me vaka na laione, ka kudrukudru me vaka na luve ni laione.

³⁹ Era sa didi beka? Au na vakarautaka vei ira e dua na magiti. Au na vakamatenitaki ira ka vakamarautaki ira. Era na lako me ra na moce ka sega ni yadra tale.

⁴⁰ Au na kauti ira me ra vakamatei me vaka na lami, me, kei na sipi tagane. Sa kaya ga oqo o Jiova.

Leqa Yacovi Papiloni

⁴¹ Sa vakavuai o Papiloni na koro sa vakacaucautaka o vuravura taucoko. Sa veivakurabuitaki na kena i rairai vei ira na veimatanitu.

⁴² Sa lako cake mai na waitui ki Papiloni, ka ubia na veibiau sa vadugu.

⁴³ Sa veivakurabuitaki na kena i rairai, sa vaka e dua na vanua dravuisiga sa sega kina na wai, ka sega ni dua e bula kina se bau lako kina.

⁴⁴ Au na totogitaki Bele na kalou kei Papiloni ka na vakavuna me biuta na veika a butakoca; ka ra sa na sega tale ni qaravi koya na veimatanitu. “Sa bale na bai kei Papiloni. Kemuni na Isireli, ni dro tani mai kina.

⁴⁵ Era sa drotaka na tamata yadua na nodra bula mai na noqu cudru rerevaki.

⁴⁶ Ni kakua ni yalo lailai se rere ena vuku ni tukutuku lasu o ni rogoca. Sa dau tete yani e dua na i tukutuku lasu ena veiyabaki na i tukutuku ni tovo kaukauwa kei na nona vala e dua na tui kei na dua tale na tui.

⁴⁷ Ia ena yaco mai na gauna me'u na cudruva kina na veimatakau ceuceu kei Papiloni. Ena vakamaduataki na matanitu taucoko ka ra na vakamatei kece na kena i taukei.

⁴⁸ Era na kaila na veika kece e vuravura kei na maliwa lala ni sa bale o Papiloni vei ira na tamata era lako mai na vualiku me ra vakarusa.

⁴⁹ Sa vakavuna o Papiloni na nodra mate na tamata e vuravura taucoko ia oqo sa na bale o Papiloni ni sa vuna na nodra mate e vuqa na Isireli. Sa kaya ga oqo o Jiova.

Vosa ni Kalou vei ira na Jiu

⁵⁰ Kemuni na noqu tamata o ni tiko e Papiloni o ni sa drotaka na mate. Ia oqo mo ni lako sara! Ni kakua ni wawa. E dina ni o ni sa yawa mai na nomuni vanua, ni nanumi au, na nomuni Turaga, ka nanumi Jerusalemi.

⁵¹ O ni sa kaya, ‘Keimami sa vakalolomataki ka vakamaduataki, keimami sa malumalumu sara baleta ni ra sa taura na kai tani na vanua tabu ena Valenisoro.’

⁵² Ia oqo au sa kaya ni na yaco mai na gauna me'u na cudruvi ira kina na matakau ni Papiloni ka ra na tagi na vuetaki ena nona vanua taucoko.

⁵³ Kevaka sara mada ga e rawa ni dro cake o Papiloni ki na loma ni macawa ka tara e dua na bai ni valu e kea, au na tala eso na tamata me ra vakarusai koya,” a kaya o Jiova.”

Na i Kuri ni Veivakarusai nei Papiloni

⁵⁴ Vakarogoca na domo ni tagi mai Papiloni, Na tagi baleta na veivakarusai Ena loma ni vanua.

⁵⁵ Au sa vakarusai Papiloni, Ka biuti koya me tiko lo. Era sa cici ki loma na veimataivalu Me vaka na vadugu ni ua, Ka ravuta ena domo ni kaila.

⁵⁶ Era sa lako mai me vakarusai Papiloni Era sa vesu na kena sotia, Ka musulaki na nodra dakaititi. Oi au na Kalou sa cudruva na ca, Au na cakava ki Papiloni na ka sa ganita.

⁵⁷ Au na vakamatenitaki ira na kena i liuliu, Na tamata vuku, na i liuliu, kei na sotia. Era na la'ki moce ka sega ni yadra tale. Sa i koya oqo na ka sa kaya na tui, Na yacana o Jiova ni lewevuqa.

⁵⁸ Ena kolotaki ki na qele Na bai vavaku kei Papiloni, Ka vakamai na kena matamata cecere. Sa tawa yaga kece Na nodra oga na tamata Ni sa cagina cake ena yameyame Na i gu ni matanitu,” Sa kaya ga oqo o Jiova ni lewevuqa.

Tukutuku i Jeremaia ki Papiloni

⁵⁹ O Seraia na luve i Neria ka makubui Maesaia, e a dua na dauveiqaravi nei Setekaia na tui. Ena i ka va ni yabaki a tui kina o Setekaia e Juta, a lako kina ki Papiloni o Seraia ka mani solia vua o Jeremaia eso na i vakaro.

⁶⁰ A vola o Jeremaia ena dua na i vola na i tukutuku kece ni veivakarusai ena yacovi Papiloni ka vakakina na veika tale eso me baleti Papiloni.

⁶¹ A sa kaya vei Seraia, “Ni o sa yaco ki Papiloni mo qarauna mo na wilika sara e cake vei ira na tamata na veika kece sara sa volai tiko e ke.

⁶² Ia mo qai masu vakaoqo, Kemuni na Turaga o ni a kaya ni o ni na vakarusa na vanua oqo me na kakua tale ni dua na ka me na bula kina, me kakua na tamata se manumanu, ka me na vaka na vanua lala me tawa mudu.

⁶³ Ni sa oti na nomu wilika na i vola oqo vei ira na tamata mo qai vesuka kina e dua na vatu ka qai viritaka ki na uciwai na Uferetisi,”

⁶⁴ ka kaya, “Oqo na ka ena yacovi Papiloni, ena dromu ka na sega ni basika cake tale baleta na veivakarusai sa vakarau kauta mai o Jiova!” A yala e kea na vosa i Jeremaia.