Jeremaia 5 - Vakavakadewa Vou kei na iVola tale eso

Na i Valavala Ca i Jerusalemi

¹ Kemuni e Jerusalemi, Ni vaqaqara mada Ena nomuni veigaunisala! Ni vakararai wavoki! Mo ni raica vakataki kemuni! Ni vaqara ena loma ni veimakete! Ni tovolea mo ni kunea E dua na tamata sa kitaka na ka dodonu, Ka vakasaqara na ka dina, Kevaka o ni rawata, Sa na vosoti Jerusalemi o Jiova.

² E dina ga o ni bubului Ena yaca i Jiova, O ni sa sega ni kauwaitaka Na ka o ni sa tukuna.

³ E dina sa vaqara na yalodina o Jiova. Sa mokuti kemuni, Ia o ni sa sega ni via vakadodonutaki. O ni sa rui yalo kaukauwa Ka bese ni gole tani Mai na nomuni valavala ca.

⁴ Au a qai nanuma, “Era sa tamata lecaika ga oqo. Era sa sesewa; Ka ra sega ni kila na loma ni Turaga Se na ka e vinakata na nodra Kalou.

⁵ Au na lako vei ira era vakaitutu cecere, Ka veivosaki kei ira. Era kila dina na loma i Jiova; Ka ra kila na ka e vinakata na nodra Kalou.” Ia era sa vakanadakuya kecega na Kalou; Ka ra bese ni muri koya.

⁶ Oqo na vuna ena vakamatei ira kina E dua na laioni ni veikau; Ena vakarusai ira E dua na oliva ni lekutu, Ka na vakacuruma na nodra veikoro E dua na leopate Kevaka e dua ena lako ki taudaku ni koro Ena basuraki, Baleta ni sa rui levu Na nodra i valavala ca, Ka ra sa gole tani vakavuqa Mai vua na nodra Kalou.

⁷ A sa kaya o Jiova, “A cava me'u vosota kina Na nodra i valavala ca na noqu tamata? Era sa biuti au na luvedra, Ka ra bubului ki na veika sa sega ni kalou. Au a vakani ira na noqu tamata Me yacova ni ra sa mamau, Ia era sa ia na veibutakoci, Ka vakaotia na nodra gauna Vata kei ira na yalewa dautagane.

⁸ Era vaka na ose vakani vinaka sa sinai ena garogaro, Era sa dui vinakati ira na wati ni kai nona.

⁹ Me'u kakua li ni totogitaki ira Ena ka oqo? Me'u kakua li ni sauma ki na dua na vanua Na ka oqo?

¹⁰ Au na vakaroti ira Me ra musulaka sobu na nodra vaini, Ia me ra kakua ni vakarusai ira vakadua. Au na tukuna me ra musuka laivi na veitabana, Baleta ni ra sa sega ni noqu.

¹¹ O ira na Isireli kei ira na Juta Era sa cakitaki au vakadua sara ga.” A sa kaya ga oqo o Jiova.

Sa Cakitaki Ira na Isireli o Jiova

¹² Era sa cakitaka na Kalou na nona tamata. Era kaya, “Ena sega ni cakava e dua na ka. Eda na sega ni sotava e dua na gauna dredre; e da na sega ni sotava na i valu se na dausiga.”

¹³ Era kaya, ni ra sa cagi wale ga na parofita, sa sega vei ira na i tukutuku mai vei Jiova. Oi au, o Jiova na Kalou Kaukauwa, au na tukuna vei iko Jeremaia na ka ena yacovi ira na tamata oqo baleta ni ra sa kaya na veika oqo.

¹⁴ Au na cakava na noqu vosa me vaka na bukawaqa ena gusumu. Era na vaka na buka na tamata oqo, ka ra na kama ena bukawaqa.”

¹⁵ Kemuni na Isireli sa kauta mai o Jiova e dua na matanitu mai na vanua yawa me valuti kemuni. E dua na matanitu qaqa ka matanitu makawa, e dua na matanitu o ni sega ni kila na nodra vosa, o ni sega talega ni kila na ka ra kaya.

¹⁶ Na nodra tamata i valu dauvana ena dakaititi era tamata qaqa ka sega na loloma ena nodra veivakamatei.

¹⁷ Era na kania na nomuni teitei kei na kemuni; ra na vakamatei na luvemuni tagane kei na yalewa; ra na vakamatea na nomuni sipi kei na bulumakau ka vakarusa na nomuni veivaini kei na veivunilolo; na nomuni veikoro turaga vakabai vakaukauwa o ni nuitaka era na vakarusa na nodra mataivalu.

¹⁸ A sa kaya na turaga, “Ia ena veisiga o ya, au na sega ni vakarusai kemuni sara vakadua na noqu tamata.”

¹⁹ Ni ra taroga se cava sara mada au vakayacora kina na veika oqo, “Mo kaya vei ira Jeremaia, me vaka ni ra sa vakanadakui au ka qaravi ira na veikalou tani ena nodra vanua dina, era na qai la'ki qaravi ira na vulagi vakakina ena vanua sa sega ni nodra.”

Na Kalou sa Vakasalataki Ira na Nona Tamata

²⁰ Mo tukuna oqo ki na vale i Jekope ka kacivaka ki Juta.

²¹ Mo rogoca oqo, oi kemuni na i yavu tamata tawa yaga ka sesewa, e tu na matamuni ia o ni sega ni rai, e tu na daligamuni, ia e sega ni rogo.

²² Oi au na nomuni Kalou, a cava o ni sega ni rerevaki au kina? A cava o ni sega ni sautaninini kina e mataqu? Au yalana na i yalayala ni waitui ena nuku me sega ni mudu ka na sega ni rawa ni voroki ena vadugu kei na kaukauwa ni ua.

²³ Ia o ira na tamata oqo era sa tamata loma qa ka yalo kaukauwa, era sa dauvuki ka lako tani.

²⁴ Era sega ni dau kaya ena lomadra, ‘Me da sa rerevaki na noda Kalou, o koya sa solia mai na uca ena kena gauna, na uca ni vula i laulau kei na vula i tubutubu ka sa dau taqomaka tiko na macawa ni gauna ni tatamusuki.

²⁵ Na nomuni caka cala sa kauta tani na veika oqo kei na nomudou i valavala ca sa kauta tani vei kemudou na veika vinaka.

²⁶ Sa kune na veivakaisini vei ira na noqu tamata era sa taura na nodra i yau na tani, era sa coriti ira na tamata me vaka na daubiri dai.

²⁷ Me vaka na dai sa sinai tu ena manumanu vuka sa coriti sa sinai na nodra i tikotiko ena ca, ka ra sa vutuniyau kina.

²⁸ Era sa levulevu ka lumilumisa. Sa sega ni vakaiyalayala na nodra caka ca ka ra sa sega ni vakatulewa ena lewa dodonu, ena vu ni leqa ni luveniyali me tuberi ira cake, era sega talega ni taqomaka na nodra dodonu na dravudravua.

²⁹ A sa kaya o Jiova, “Me'u na sega li ni lewai ira ena vuku ni veika oqo. Me'u na sega li ni ia na veivakadodonutaki ena matanitu sa vaka tu oqo?

³⁰ Na ka vakadomobula kei na ka velavela sa yaco tiko ena vanua.

³¹ Era sa parofisai vakailasu na parofita kei ira na bete era sa veiliutaki ena i vakasala ni parofita, ia o ira na noqu tamata era sa vinakata na veika oqo, ia a cava o na cakava ni sa yaco mai na kena i otioti?”