Jeremaia 49 - Vakavakadewa Vou kei na iVola tale eso

Veilewai ni Kalou vei ira na Amoni

¹ Oqo na ka a tukuna na Turaga o Jiova me baleti ira na Amoni, “Sa e vei o ira na Isireli? Sa sega beka ni dua me taqomaka na nodra vanua? A cava era laivi ira kina na tamata era qaravi Moloke me ra taura ka tiko ena vanua ni mataqali i Kata?

² Sa vinaka, ena yaco mai na gauna au na cakava kina me ra rogoca na tamata mai na koro o Rapa na domo ni valu. Ena biu me rusa tu na koro levu kei Amoni ka ra kama yavu ki na qele na kena veikoro lalai. Ia sa na qai taura lesu tale o Isireli na nona vanua.

³ Kemuni na kai Esiponi, ni tagi sara e cake! Sa vakarusai na nomuni koro. Kemuni na yalewa mai Rapa ni tagi. Ni daramaka na i sulu taga ka tagi. Ni veiciciyaki ena veilecayaki. Na nomuni kalou o Moloke ena kau vakabobula kei ira na nona bete kei na nona turaga.

⁴ A cava o ni viavialevu kina na tamata sega ni yalodina. Sa tawa yaga na nomuni kaukauwa. A cava o ni vakararavi kina ki na nomuni kaukauwa ka kaya, ni sega ni dua e vinakata me valuti kemuni.

⁵ Au na kauta mai vei kemuni na rere mai na veiyasana kece. O ni na dro tani kece yani. Na tamata yadua ena dui drotaka na nona bula ka na sega ni dua me soqoni ira vata na nomuni mataivalu.” Sa kaya na Turaga Qaqa o Jiova ni lewevuqa.

⁶ Ia e muri au na cakava me ra tiko vinaka tale na Amoni. Oi au ga o Jiova sa kaya oqo.”

Veilewai o Jiova kei Itomi

⁷ Sa i koya oqo na ka a kaya na Turaga Qaqa o Jiova ni lewevuqa me baleti Itomi, “Sa yali beka na nodra lewa vinaka na kai Itomi? Era sa sega beka ni vakaraitaka rawa na nodra dauvakasala ki na ka me ra cakava? Sa takali tani beka na nodra vuku?

⁸ Kemuni na kai Titana, ni lesu ka dro! Ni lako ka la'ki vuni! Au sa na vakarusai ira na kawa i Isoa baleta ni sa yaco mai na gauna me'u na totogitaki ira kina.

⁹ Ni ra sa dau lako mai na daubeti qerepi, era qai vakavoca ga e vica na qerepi, ia ni ra sa lako mai na daubutako ena bogi, era sa kauta ga na ka era vinakata.

¹⁰ Ia au sa vakaluvaiwaletaki ira na kawa i Isoa vakadua ka cega na nodra i vunivuni me ra kakua ni vuni rawa tale. Era sa vakarusai na kai Itomi kei ira na wekadra. Sa sega tale ni vo e dua vei ira.

¹¹ Ni laivi ira tu mai na nomuni luveniyali vei au, au na maroroi ira. Laivi ira na nomuni yada me ra vakarorogo vei au.”

¹² A sa kaya o Jiova, “Kevaka era sa gunu mai na bilo ni veivakatotogitaki o ira e sega ni dodonu me ra totogi, o nanuma beka mo na sega ni totogi? Sega, sa dodonu mo gunu mai na bilo!

¹³ Oi au ga, au sa yalataka ni na yaco na koro o Posira me veivakidacalataki na kena i rairai ka lala tu; era na dredrevaka na tamata ka vakayagataka na yacana me yaca ni veivakamaduataki. Na veikoro era voleka era na vakarusai vakadua. Oi au o Jiova ka'u sa kaya oqo.

¹⁴ A sa kaya o Jeremaia, “Au sa taura e dua na i tukutuku mai vei Jiova. Sa tala yani e dua na mata ki na veimatanitu, ‘Ni vakasoqona vata na nomuni veimataivalu ka valuti Itomi. Ni vakarau me ia na i valu!

¹⁵ Ena vakamalumalumutaka na nomuni matanitu o Jiova ka na sega ni dua ena dokai kemuni.

¹⁶ Na nomuni viavialevu sa vakacalai kemuni. Sa sega ni dua e rerevaki kemuni vakalevu me vaka o ni nanuma. O ni vakaitikotiko e veibarinisavu ena dela ni ulunivanua cecere, ia e dina ga ni o ni tiko ena vanua cecere me vaka na ikeli, ena biuti kemuni mai na Turaga ki ra,’ a kaya o Jiova.”

¹⁷ A sa kaya o Jiova, “Ni veivakarusai rerevaki o ya ena yacovi Itomi ka ra na kidacala ka rere kecega kina o ira yadua era na lako sivia.

¹⁸ Ena yaco talega kina na veivakarusai e a yacovi Sotoma kei Komora ena gauna e rau a vakarusai kina kei na veikoro lalai volekati rau. Ena sega ni dua ena tiko e kea, ka na sega na vulagi me na lako kina.

¹⁹ Au na lako cake mai me vaka e dua na laione e lako mai na veikau-loa mai na bati ni uciwai na Joritani ki na vanua veico drokadroka, ka'u na vakavuna me ra dro vakidacala tani mai na kai Itomi mai na nodra vanua. Ena qai liutaka na matanitu na i liuliu au digitaka. O cei e rawa ni vakatautauvatataki kei au? O cei ena via bolei au? O cei na i liuliu ena rawa ni vorati au?

²⁰ Ia rogoca mada na nona i naki na Turaga me baleti ira na kai Itomi kei na ka sa nakita me baleti ira na lewe ni koro o Timana. Na luvedra lalai sara mada ga era na kau tani ka ra na kurabui kina na tamata kecega.

²¹ Na i rogorogo ni bale kei Itomi ena uneune kina na vuravura; na nodra tagi ena rogo sara ki na Wasa Damudamu.

²² Era na valuti Posira na meca me vaka e dua na ikeli sa co sobu mai lagi ka tevuka tu mai na tabana. Ena siga o ya era na domobula na sotia ni Itomi me vaka e dua na yalewa sa taratara.”

Veilewai o Jiova kei Tamasiko

²³ Sa i koya oqo na ka a tukuna na Turaga o Jiova me baleti Tamasiko. “Era sa vakataqayataki ka vakaleqai na tamata ena koro o Emaci kei Apati baleta ni ra sa rogoca na veitukutuku ca. Sa yacovi ira na taqaya me vaka na wasawasa ka ra na sega ni vakacegu rawa.

²⁴ Era sa malumalumu na kai Tamasiko ka ra sa lesu ka dro ena rere. Era sa mosi vakalevu ka vakaloloma me vaka e dua na yalewa sa taratara.

²⁵ Na koro ka dau mamarau sa vakalalai vakadua.

²⁶ Ena siga o ya era na vakamatei na cauravou e veigaunisala ni koro, era na vakarusai vakakina na nona sotia.

²⁷ Au na vakama na bai kei Tamasiko ena buka ka vakama na i tikotiko vakatui i Penietati.”

Veilewai o Jiova kei Kitari

²⁸ Sa i koya oqo na ka a kaya na Turaga o Jiova me baleta na yavusa o Kitari kei ira na i liuliu ena koro o Asori, o ira a vakamalumalumutaki ira o Nepukanesa na tui Papiloni, “Lako ka valuti ira na kai Kitari ka vakarusa na nodra yavusa na tamata mai na tokalau.

²⁹ Vesuka nodra valelaca kei na nodra manumanu, na i latilati ni nodra valelaca kei na veika kece ena loma ni veivalelaca. Taura na nodra kameli ka tukuna vei ira na tamata, “Sa wavoliti kemuni na rere!’ ”

³⁰ Kemuni na tamata mai Asori, sa vakaroti kemuni o Jiova mo ni dro sara vakayawa ka vunitaki kemuni. Sa bukiveretaki kemuni o Nepukanesa na tui Papiloni, ka sai koya oqo na ka e tukuna,

³¹ ‘Ni lako mai me da valuti ira na tamata era nanuma tiko ni ra sa taqomaki ka lalaga tu!’ A sa kaya ga vakaoqo o Jiova.

³² “Taura na nodra kameli kei na nodra manumanu kece. Au na vakasavi ira na tamata era kotiva vakalekaleka na uludra ki na veiyasana kecega, ka'u na kauta mai vei ira na veika ca mai na veiyasana kecega.” Sa kaya ga vakaoqo o Jiova.

³³ Ena yaco o Asori me vanua lala ka tawa mudu, e dua na vanua era bula ga kina na koli. Ena sega ni dua na tamata ena tiko e kea, se lako kina vakavulagi.”

Veilewai Baleti Ilama

³⁴ Ni cabeta oti na i tutu vakatui e Juta o Setekaia a vosa vei Jeremaia na parofita o Jiova o Jiova me baleta na matanitu o Ilama.

³⁵ A sa kaya na Turaga Qaqa o Jiova ni lewevuqa, “Au na vakamatei ira kece sara na dauvala ena dakaititi era sa vakavuna me vanua qaqa o Ilama.

³⁶ Au na cakava me ravuti Ilama na cagi mai na veiyasana kece sara ka vakavuna me ra veiseyaki na tamata ki na veivanua kecega, me yacova ni sa sega ni dua na vanua e vo era sega ni lako ka veiseyaki kina.

³⁷ Au na cakava me ra rerevaki ira na kedra meca na kai Ilama, o ira era via vakamatei ira. Au na vakarusai ira ena noqu cudru levu ka tala na veimataivalu me ra valuti ira me yacova ni ra sa qeavu vakadua.

³⁸ Au na vakarusai ira na tui kei na i liuliu mai Ilama, ka vakadabera kina na noqu tikotiko vakatui.

³⁹ Ia e muri au na vakasaututaki ira tale na kai Ilama, sa kaya o Jiova.”