Jeremaia 47 - Vakavakadewa Vou kei na iVola tale eso

Vosa ni Turaga vei ira mai Filisitia

¹ Ni bera ni valuti o tui Ijipita, e a vosa na Turaga o Jiova vei Jeremaia na parofita.

² A sa kaya, “Raica, sa tubu cake na wai Mai na yasana vaka ki na vualiku, Ka sa coka mai me vaka e dua na uciwai sa waluvu. Ena luvuca na vuravura kei na ka kece sa tu kina, Na veikoro kei na tamata era bula kina. Era na tagica mai na tamata na veivuke, Ka ra na tagi na lewe ni vanua kecega ena rarawa.

³ Era na rogoca na vadugu ni yavadra na ose, Na tamosa ni kareti, Kei na rorogo ni yava ni qiqinivalu. Era na sega ni rai vuki na tama vei ira na luvedra: Ka na damele mai na ligadra ena yasadra.

⁴ Ni sa yaco mai na gauna Me ra vakarusai kece kina na kai Filisitia, Ka muduki tani mai Taia kei Saitoni Na veivuke kece sara e sa tu. Ena vakarusai ira na kai Filisitia o Jiova O ira na vo-ni-bula ena baravi kei Kafitori.

⁵ Sa yaco mai na rarawa levu Vei ira na lewe i Qasa, Ka sa rusa o Asikiloni. A cava so na kena dede Era na tagi kina Na vo-ni-bula ni Filisitia?

⁶ O iko na i Seleiwau ni Turaga! A cava na kena dede o na qai galu? Lesu tale ki na kemu taga, La'ki tiko kina ka vakacegu!

⁷ Ia me na vakacegu vakacava, Ni'u sa solia vua na cakacaka me cakava? Au sa vakaroti kina me ravuti Asikiloni, Kei ira na tamata era tiko ena baravi.