Jeremaia 46 - Vakavakadewa Vou kei na iVola tale eso

Lewa Baleti Ijipita

¹ A sa vosa na Turaga o Jiova vei Jeremaia me baleti ira na veimatanitu.

² Sa i koya oqo na ka e a tukuna me baleti Ijipita. Oqo na ka sa tukuna o Jiova me baleta na mataivalu i Niko na tui Ijipita, o koya ka a vakamalumalumutaka o Nepukanesa na tui Papiloni mai Kakimisi ka volekata na uciwai na Uferetisi ena i kava ni yabaki sa tui kina e Juta o Jo-akimi na luve i Josaia:

³ Era sa kailavaka na turaganivalu ni Ijipita. Ni vakarautaka na nomuni sasabai, Ka lako yani ki na i valu!

⁴ Ni vakadarama na i yaya ni nomuni ose ka vodoka sara! Ni tuva vakaiyatu ka daramaka na nomuni sulu ni vala! Ni vagata na nomuni moto! Ni daramaka na nomuni sulu vakaivalu!”

⁵ A sa kaya na Turaga, “Ia a cava ka'u sa raica?” Era sa suka lesu tale ena domobula. Sa moku mate eso na kedra meca; Era sa dro lesu vakatotolo yani Ka sega ni rai vuki tale, Ni ra sa sinai ena rere.

⁶ O ira era cici vakatotolo sara Era na sega ni dro bula rawa na sotia Ka ra na sega ni vakabulai ira rawa na qaqa. Mai na yasana vaka ki na vualiku, Ena bati ni uciwai na Uferetisi, Era la'ki tarabe kina ka bale.

⁷ O cei oqo sa cere cake Me vaka na uciwai na Naile, Me vaka e dua na uciwai sa tu?

⁸ Sa i Ijipita ga, Sa cere cake me vaka na Naile, Me vaka e dua na uciwai sa dobui tu. Sa kaya o Ijipita, “Au na cere cake ka ubia na i vuravura, Ka vakarusa na veikoro kei ira na tamata era tiko kina.

⁹ Vakarota me ra cici yani na ose, Ka qiqi yani na kareti! Talai ira yani na sotia qaqa; Na tamata mai Eciopea kei Puti, O ira era sa tauri i sasabai, Kei na dauvavana Ena dakaititi mai Luti!”

¹⁰ Sa i koya oqo na siga ni Turaga Na Kalou Kaukauwa: Edaidai sa na saumi kina, Edaidai sa na totogitaki ira kina na kena meca. Na nona i seleiwau Sa na tilomi ira me yacova ni sa sinai Ka gunuva na nona dra me yacova ni sa mamau; Ni sa vakacabora o Jiova na kena meca ena vualiku, Mai na bati ni uciwai na Uferetisi.

¹¹ Kemuni mai Ijipita, Ni lako ki Kiliati Ka vakasaqara na wainibula! Sa tawa yaga kece na nomuni wainibula; Sa sega na ka ena vakabulai kemuni rawa.

¹² Era sa rogoca na veimatanitu na nomuni madua: Sa rogoca na tamata kece na nomuni tagi. Sa tarabe e dua na sotia Vua e dua tale na sotia, Ka rau sa bale ruarua ki na qele.

¹³ A sa vosa o Jiova vei Jeremaia ena gauna a lako mai kina o Nepukanesa na tui Papiloni me valuti Ijipita:

¹⁴ “Tukuna na ka oqo ki na veikoro mai Ijipita, Ki Mikitoli, Mefisi kei Tapanesi, ‘Ni vakarau mo ni taqomaki kemuni; Ni na vakarusai ena i valu Na ka kece e tu vei kemuni!

¹⁵ A cava sa bale kina na nomuni kalou qaqa? Sa mokuti koya sobu o Jiova!’

¹⁶ Era sa tarabe na nomuni sotia ka bale; Era sa veitukunitaka vakai ira, ‘Me da cavutu Ka lesu tale vei ira na kai noda. Ki na noda vanua dina e da a sucu kina, Ka dro mai na nodra i seleiwau na meca!’

¹⁷ Vakayacani tui Ijipita ena dua na yaca vou, O ‘Gusu Levu o Koya sa Laiva Me Sivi na Nona Gauna Vinaka.’

¹⁸ Oi au o Jiova ni lewevuqa, Oi au na Tui. Oi au na Kalou bula. Me vaka na cecere i Tepori mai na veiulunivanua, Kei na cere i ulu i Kameli mai na wasawasa, Sa na vakakina na kaukauwa i koya sa mai valuti kemuni.

¹⁹ Ni vakarautaki kemuni mo ni kau vakabobula, Oi kemuni na luve i Ijipita! Sa na vuki o Mefisi me dua na vanua lala, Ena rusa tu ka sega na tamata me tiko kina.

²⁰ Sa vaka e dua na bulumakau yalewa rairai vinaka o Ijipita, A sa katilaki koya e dua na lago kata mai na vualiku.

²¹ O ira sara mada ga na kena sotia saumi Era sa malumalumu Me vaka na luve ni bulumakau Ka ra sega ni tu rawa me ra vala; Era sa saumaki kece ka dro Baleta ni sa yaco mai na siga ni nodra cudruvi, Na gauna me ra vakarusai kina.

²² A dro yani ki Ijipita, Ka tagi me vaka e dua na gata Ni sa voleka mai na mataivalu ni meca. Era na ravuti koya ena matau, Me vakataki ira na dauta kau.

²³ Era taya sobu na kena veikau. Sa vuqa na nodra tagane, Sa sega ni rawa ni wiliki, Na nodra sotia Era sa sivia na kedra i wiliwili na vodre.

²⁴ Era na vakamaduataki na lewe i Ijipita; Era na soli yani ki na ligadra na tamata Mai na yasana vaka ki na vualiku. Sa i Jiova ga sa kaya oqo.”

²⁵ A sa kaya na Turaga Qaqa na nodra Kalou na Isireli, “Au na totogitaki Amoni, na nodra kalou na Cepi vata kei Ijipita kei ira na kena kalou kei na kena tui. Au na totogitaki tui Ijipita kei ira era vakararavi vua.

²⁶ Au na soli ira vei ira era via vakamatei ira, vei Nepukanesa na tui Papiloni kei na nona mataivalu. Ia e muri ena qai tawa tale o Ijipita ena tamata me vaka e liu.

Vakabulai na Tamata ni Turaga

²⁷ “Kemuni na kawa i Jekope na noqu tamata ni kakua ni rere. Kemuni na Isireli ni kakua ni taqaya. Au na vakabulai kemuni mai na vanua yawa oqori, Mai na vanua o ni bobula tu kina. O ni na lesu tale mai ka mai bula ena sautu, O ni na galala ka na sega e vakarerei kemuni.

²⁸ Au na tiko kei kemuni me'u vakabulai kemuni. Au sa na vakarusai ira na veimatanitu kece Au a vakasavi kemuni yani kina, Ia au na sega ni vakarusai kemuni. Au na sega ni laivi kemuni Mo ni kakua ni totogitaki Ia ni'u na totogitaki kemuni Ena sega ni bibi sara. Sa i Jiova ga sa kaya oqo.