Jeremaia 43 - Vakavakadewa Vou kei na iVola tale eso

Kau ki Ijipita o Jeremaia

¹ Ia ni tukuna oti o Jeremaia vei ira na tamata na veika kece a kaya o Jiova o Jiova na nodra Kalou me tukuna vei ira,

² A qai kaya vei Jeremaia o Asaraia na luve i Osia kei Jonani na luve i Karea, vata kei ira kece na tamata viavialevu. “E lasu na ka o mai tukuna. E sega ni talai iko mai o Jiova mo tukuna vei keimami me keimami kakua ni lako ka la'ki tiko ki Ijipita.

³ Ia sa vakauqeti iko o Baruki na luve i Neraia ena vuku i keimami mo soli keimami ki na ligadra na kai Papiloni, ka me ra vakamatei keimami se kauti keimami ki Papiloni.

⁴ A sega ni vakarorogo o Jonani se dua vei ira na turaganivalu, se dua vei ira na tamata ki na i vakaro ni Turaga me ra tiko ga ena vanua o Juta.

⁵ Ia a kauti ira kece na vo-ni-bula e Juta ki Ijipita o Jonani kei ira kece na turaganivalu. Era a kauti ira kece na tamata era a dui lako mai na veimatanitu era a dui tu kina me ra mai tiko e Juta;

⁶ na tagane, na yalewa, na gone, kei ira na luvena yalewa na tui. Era a kauti ira kece sara na tamata a biuti ira tu mai o Nepusaratani na turaganivalu liu ena ruku ni lewa i Kitalaia, ka rau wili kina o Jeremaia kei Baruki.

⁷ Era a sega ni muria na i vakaro ni Turaga ka ra sa lako ki Ijipita, ka yaco sara ki Tapanesi.

⁸ A sa kaya o Jiova vei Jeremaia mai Tapanesi,

⁹ Kauta eso na vatu lelevu ka la'ki biuti ira ena mata ni vale i tui Ijipita mai Tapanesi, ia me ra raica eso na Jiu na nomuni cakava na ka oqo.

¹⁰ Ia mo qai tukuna vei ira ni a tukuna na Turaga Qaqa na nodra Kalou na Isireli. Au na kauta mai na noqu dauveiqaravi o Nepukanesa na tui Papiloni. Ena mai vakadabera na nona i tikotiko vakatui ena dela ni veivatu oqo, ka na birika ena delana na nona valelaca vakaturaga vakatui.

¹¹ Ena lako mai o Nepukanesa ka ravuti Ijipita. O ira era sa lewai oti me ra mate ena mate ca, era na mate ga ena mate ca, na bobula era na kau tani ga vakabobula, kei ira era lewai me ra mate ena i valu, era na mate ga ena i valu.

¹² Au na vakama na nodra veivale tabu na kalou ni Ijipita, ia kevaka e sega ni vakama na nodra matakau ceuceu sa na kauti ira vakabobula na tui Papiloni. Me vaka na nomu tomika cake na nona i sulu e dua na i vakatawanisipi ka ceburaka tani na manumanu duka lalai sa na taura vakakina na vanua o Ijipita na tui Papiloni, ka vakasavasavataka ka na qai lesu tale ena qaqa.

¹³ Ena vakarusa na vatu tabu ni vakananumi mai na koro ni matanisiga mai Ijipita ka vakama na nodra vale tabu na nodra veikalou.”