Jeremaia 41 - Vakavakadewa Vou kei na iVola tale eso

Labati o Ketalaia

¹ Ena i kavitu ni vula, a qai lako ki Misipa o Isimeli na luve i Necanaia na makubui Elisama, e dua na kawa ni tui, vata kei na lewe tini na tamata me ratou raici Ketalaia. Ena gauna era kana vata kece tiko kina mai Misipa,

² a sa qai tucake o Isimeli kei iratou na lewe tini ka vakamatei Ketalaia, baleta ni sa lesi koya na tui Papiloni me lewa na vanua.

³ A vakamatei ira kece talega na Jiu era tiko kei Ketalaia mai Misipa o Isimeli, ka vakakina o ira na sotia ni Papiloni sa tiko e kea.

⁴ Ena mataka ka tarava, ni bera ni dua e kila na labati i Ketalaia,

⁵ era a yaco mai e walusagavulu na tamata mai Sikemi, Sailo kei Samaria. Era a toroya tani na kumidra, ka dresulaka na nodra i sulu, ka tavalaka na yagodra. Era a kau sila kei na ka boi vinaka me la'ki cabori ena Valenisoro.

⁶ A mai lako yani o Isimeli mai Misipa me tavaki ira, ka tagi voli. Ia ni yaco yani vei ira a kaya, “Ni mai lako mada ki loma mo ni raici Ketalaia na luve i Aikami.

⁷ Ena gauna era yaco yani kina ki loma ni koro, a qai vakamatei ira o Isimeli kei ira na nona tamata ka ra viritaka na yagodra ki na i keli.

⁸ A lewe tini vei ira na i lala o ya era a kaya vei Isimeli, “Ni yalo vinaka ni kakua ni vakamatei keitou, baleta ni vunitaki tu na neitou witi, na barile, na waiwai ni olive kei na oni ena loma ni vanua.” Ia a mani vakatalai iratou ka sega ni vakamatei iratou kei ira na nodratou i lawalawa.

⁹ Na i keli a biuta kina na yagodra na tamata a vakamatea o Isimeli e i keli levu sara. Sa i koya na i keli e a kelia o Asa na tui me taqomaki kina mai vei Pasa na tui Isireli. A vakasinaita o Isimeli ena yagodra na tamata a vakamatea.

¹⁰ A qai kauti iratou vakavesu na luvenitui kei ira kece na vo ni tamata mai Misipa, sai ira e a soli ira o Nepusaratani na turaganivalu liu vei Ketalaia me vakatawai ira. A kauti ira vakavesu o Isimeli ka lako vaka ki na vanua o Amoni.

¹¹ A qai rogoca o Jonani na luve i Karea kei ira kece na turaganivalu era tiko kaya na ka ca a vakayacora o Isimeli.

¹² E ratou a mai kauti ira yani na nodratou tamata ka lako me ratou vala kaya. E ratou a mai vesuki koya volekata na i keli levu mai Kipioni.

¹³ Ni ra raici Jonani kei ira kece na turaganivalu era lako kaya mai na tamata a kauti ira tiko vakavesu o Isimeli, a duatani na nodra marau.

¹⁴ Era a vuki na tamata ka dro vei Jonani.

¹⁵ E a qai dro o Isimeli kei na lewe walu vei ira na nona tamata mai vei Jonani ka gole yani ki na vanua i Amoni.

¹⁶ Ia o Jonani na luvei Karea, kei ira kece na vakailesilesi ni mataivalu era tiko kaya, era sa kauta na vo-ni-bula sa vakabula o koya mai vei Isimeli na luvei Necanaia, mai Misipa, ni sa vakamatei Kitalaia na luvei Eaikami. A sa kauti ira tale mai Kipioni na vo ni sotia, na yalewa, na gone, kei na enuki.

¹⁷ Era sa lako, ka la'ki cegu vakalailai ena bure ni vulagi i Kimami volekati Peceliema. Era a nakita me ra lako ki Ijipita,

¹⁸ me ra yawa tani mai kina vei ira na kai Papiloni. Era a rerevaki ira na kai Papiloni baleta ni a labati Ketalaia o Isimeli, ka lesia na tui Papiloni me kovana e Juta.