Jeremaia 40 - Vakavakadewa Vou kei na iVola tale eso

Tiko o Jeremaia vei Kitalaia

¹ A sa vosa vei Jeremaia na Turaga o Jiova ena gauna a sereki koya oti kina mai Rama o Nepusaratani na turaganivalu liu. E a vesu yani ena sinucodo ki kea kei ira na lewe i Jerusalemi kei Juta era a kau yani vakabobula ki Papiloni.

² A kauti Jeremaia vakatikitiki na turaganivalu liu ka kaya vua, “Sa tukuna o Jiova na nomuni Kalou me yaco mai na veivakarusai ena vanua oqo,

³ ia oqo sa vakayacora na ka e tukuna me na cakava. Sa yaco na veika kece oqo baleta ni o ni sai valavala ca vei Jiova ka sega ni talairawarawa vua.

⁴ Ia oqo au sa luvata tani na sinucodo mai na ligamu ka sereki iko. Kevaka o via lako vata kei au ki Papiloni sa na rawa. Ka'u na maroroi iko. Ia kevaka o sega ni via lako, sa vinaka talega. Sa tu e matamu na vanua taucoko, mo lako ga ki na vanua o vinakata. Lako ga ki na vanua o via lako kina.”

⁵ Ia kevaka o tiko mai, mo lesu tale vei Kitalaia na luve i Aikami na makubui Sefani ka digitaka na tui Papiloni me kovana e Juta. Lako, ka la'ki tiko kei ira na tamata mai kea se mo lako ki na dua na vanua o nanuma mo lako kina.” A qai solia vei Jeremaia na turaganivalu liu e dua na i loloma kei na so na kakana me kauta, ka mai lako yani ena nona i lakolako.

⁶ A lako o Jeremaia vei Ketalaia na luve i Aikami ki Misipa ka la'ki tiko vei ira na tamata, ka ra vo tu ena vanua o ya.

Veretaki o Kitalaia

⁷ Ni ra rogoca na turaganivalu kece era bera ni soro kei ira na nodra sotia ni a lesi Kitalaia o tui Papiloni me kovana ena vanua o ya, ka liutaki ira kece na tamata era sega ni kau vakabobula ki Papiloni; sai ira oqori na tamata dravudravua ena vanua o ya.

⁸ Era a mai lako yani vei Kitalaia ki Misipa o Isimeli na luve i Necanaia, o Jonani na luve i Karea, o Seraia na luve i Tanumeci, o iratou na luve i Efani mai Nitofa, kei Jesenaia e dua na kawa i Mea vata kei ira na nodra tamata.

⁹ A bubului vei ira o Kitalaia na luve i Aikami na makubui Sefani ka kaya, “Ni kakua ni rerevaki ira na kai Papiloni. Ni tiko ga ena vanua oqo ka qarava na tui Papiloni, ka na daumaka na veika kece vei kemuni.

¹⁰ Oi au ga, au na tiko e Misipa me'u na matataki kemuni vei ira na kai Papiloni ni ra lako mai ki ke. Ia sa rawa mo ni kumuna ka maroroya na nomuni waini, vuanikau, kei na waiwai; ka vakaitikotiko ena veikoro o ni taura.”

¹¹ Era a qai rogoca na Jiu era tiko mai Moapi, Amoni, Itomi kei na veivanua tale eso ni a vakatara na tui Papiloni me ra tiko ga e Juta eso na vo-ni-bula, ka lesi Kitalaia me nodra kovana.

¹² Era a biuta na Jiu na veivanua kece era dui tu kina ka lesu tale ki Juta. Era a lako mai vei Kitalaia ki Misipa, ka ra kumuna e levu sara na waini kei na vuata.

¹³ Ni oti o ya a qai lako mai vei Kitalaia ki Misipa o Jonani na luve i Karea kei ira kece na turaganivalu era a sega ni soro,

¹⁴ ka ra kaya vua, “O sega ni kila ni sa talai Isimeli mai na luve i Necanaia o Palisi na tui Amoni me labati iko? Ia a sega ni vakabauta o koya.

¹⁵ A qai tukuna lo o Jonani vei Kitalaia, “Laivi au me'u lako ka vakamatei Isimeli na luve i Necanaia, ka na sega ni dua e kila se o cei e labata. A cava na ka me laivi kina o koya me vakamatei iko? Na ka oqo ena vakavuna me ra veidroyaki kina na Jiu era a soqoni mai vei iko ka na vuna talega na nodra rusa na vo-ni-bula mai Juta.”

¹⁶ A qai kaya o Kitalaia na luve i Aikami vei Jonani na luve i Karea, “Mo kakua ni cakava na ka oqo! E sega ni dina na ka o tukuna me baleti Isimeli!”